Read njo ISAIA 53 Bible Online

ISAIA 53 - njo bible

ISAIA 53

¹ Shibai onoki angashiba amang? Aser shiba dang KIBUBA tashi jungkai adoka sayu?

²Kechiyong pa tsüngdang pa süngsem lanu ama aser ali takong nungi süngra ama mei, pa asoajen mesüra tobur ajungba maliasü; aser kodang aseni pa ngudir, asenoki pa aginütsüsa pa dak tobur ajungba maket.

³Pa sensamasa aser nisungi jentok, tejashi anguba, aser toushi den metetepa aliba nisung; aser nisungi pa nungi parnok tejak miimshia ayu ama pa sensamasatsü, aser aseni pa mezüngok.

⁴ Atangji pai asen toushi benlok, aser asen tejashi pai aben. Saka Tsüngremi pa merenshi, pa dak azük, aser timtemdaktsü, ta asenoki pa indang züngshi.

⁵ Saka asen ozüng raksaba asoshi pa dak zübu aket, asen tai menaba atema pa temang mendaktsü, aser tesünep asoshi pa dak temerenshi atong; aser pa dak azükba agi asenok aneba lir.

⁶ Asenok ajak san ama lenmang aia ao, asenok nisung shia pei lenmangi meyip, aser asen tai menaba ajak KIBUBAi pa dak benloktsüogo.

⁷ Pa rishikangshi, saka pai pei sasa ajemalua aküm aser pei bang melapok; tetepsetdaki anir aoba san chanu ama, aser pa tezüng mejeptsür tsüngdang ola madokba san ama, pai pei bang melapok.

⁸Rishikangshi aser o bendangba agi pa bener ao, akümlir lima nungi pa petdanga yokogo ta pa putuia shibai parnok rongnung shisadang? Asen ozüng raksaba asoshi pa dak züka südaktsü.

⁹ Pai tashiyim agi kecha meinyak mesüra pa tebang nung tekülak kecha melika, parnoki pa leper tamajunger den yanglutsü, aser tasü dang takar ka den yutsü.

¹⁰Aji saka KIBUBAi pa temang raksadaktsütsü mulunga liasü, pai pa toushidaktsü; kodang pai pa tanela temenen tenla ka agütsüdir, pai pei metsü angutsü, pai pa taküm talang kümdaktsütsü, aser KIBUBA tepela pa ket nung azükarudaktsütsü.

¹¹Pa tanela tim atemba nungi pai angutsü aser temulung chia alitsü; pa shisatsü agi, kü Temeshi Kiliri, jenti pur temeshi kümdaktsütsü; aser pai parnok taitem abentsü.

¹² Anungji tulur den ni pa shilem lemzüktsütsü, aser tashi aiter den pai oset lemzüktsü; kechiaser pai pei taküm tasü tonga agütsü, aser ozüng raksartem den züngsem; aji saka jenti pur temenen pai aben, aser ozüng raksartem asoshi pai mepishi.