Read njo ISAIA 54 Bible Online

ISAIA 54 - njo bible

ISAIA 54

¹ Ken tenang, Oh tapungla, na tanur masola; ken tena ola adokang, aser tashi agi ayimtenang, na nusotsü tim matemla; kechiyong kiyi aola tetsür chirtem dang nungi kija alir chirtem timba lir.

²Ne süki ulushiang, na talidak teyindangba sü atsülangang. Anünga teyu, ne lisü talang kümdakjang, aser ne süng tasongba tashi itdakjang.

³Kechiyong na tajichilen aser tabelen prokshia aotsü, aser ne semchisemnuri kintem amangtsü, aser azüngmeyaka aliba yimtitem nung nisung lidaktsütsü.

⁴Tetsübu, kechiyong na mak mesüdaktsütsü mesüra na mesüngmangdaktsütsü, kechiyong nai ne lanuwa maksü amadoktsü, aser na amia aliba mapang nung tarütsüba nai joko mebilemtettsü.

⁵Kechiyong ne Teyanglusangji ne kinungpu lir; pa tenüng Temeranger KIBUBA, aser Israel Temeshiba na Alangzüksang lir, pa dang alima ajak madak Tsüngrem ta ajatsü.

⁶Kechiyong senzüka yutsüba aser temulung raksa-a aliba kibutsü mesüka, kar lanuwa asüdang senzüka yutsüba amato KIBUBAi ne dang aja.

⁷Kechiyong mapang teraka ni na senzüka toktsü, saka aria bilemba tulu agi ni na tanaben anir arutsü.

⁸Ain adoka rasaba mapang nung ni na kenpiga asoshi na nungi kü tejak atsükadok, saka teti tatem maka temeim agi ni ne dak taochi akatsü, ta na Alangzüksang KIBUBAi ashir.

⁹ Kechiyong kü dang ya Noa anogo mesüka lir; ni Noa-er tzü joko alimai tanaben marudaktsütsü ta nangzükba ama yamaji ni ne den ain adoka merasatsü mesüra marütsütsü nangzükogo.

¹⁰Kechiyong tenemtem pilatsü aser ungsemtem aenshitsü; saka kü temeim ne dang nungi mepilatsü, mesüra tesünep indang kü tezüngzüktepba maenshitsü, ta ne dak taochi akaba KIBUBAi ashir.

¹¹ Oh na timtem tekangshi angusang, yipru mopungi azüshiba aser tesünep mangusang, ajiang, ni na senti lung agi yanglutsü aser ne kimung sapfir senti lung agi yangertsü.

¹²Ni ne kichibatem berem senti lung agi yanglutsü, aser ne süngkhüm karbankel senti lung agi, aser ajaklen meketa lung tajung agi yanglutsü.

¹³ Ne chir ajak KIBUBAi sayutsü, aser ne chirnur tepela tulu alitsü.

¹⁴Temeshiba nung ya yanglutsü, na rishikangshiba nungi talangka pila-a alitsü, kechiyong na tetsübutsü kecha malitsü, aser tesamatsüba nungi talangka pila-a alitsü, kechiyong aji na anasa marutsü.

¹⁵Kari raratep adokdaktsüra aji ni nungi arur masü; shibai na anema raratep adoktsüdir pa ne madak laotsü.

¹⁶Ajiang, ni yintsünger yangluogo, shibai mijang mi semshir, aser iba atema osettsüset adokdaktsür; ano ni samatsütsü asoshi tesamatsür yangluogo,

¹⁷aser na anema yangluba nok o nü kecha azükaru masütsü, aser obendangdak na anema jembiba temeli shiaji nai aitsütsü. Ibai KIBUBA tenzükertem tia, aser kü indang parnok temeshiba lir ta KIBUBAi ashir.