Read njo ISAIA 55 Bible Online

ISAIA 55 - njo bible

ISAIA 55

¹ Hai, shiba tzürar aser shiba sen maka nenok tzü jagi arung; nenok arung, aliang, aser chiang; hau, arung, yi aser mamatzü sen magütsüi aser jenjang magütsüi aliang.

²Kechi amtsük masü iba asoshi kechiba nenoki sen endoker, aser kechi agi temulung masür idakji kechiba nübu atsüker? Kü dang tenok tenoka angang, aser kechi tajung aji chiang, aser chiyungtsü tajung agi ne nela jangratemjang.

³ Ne tenarong tenang, aser kü dangi arung; ne nela taküm alitsü, kechiyong Dawid dang taochi sayutsü nangzükba teti tatem maka tezüngzüktepba nenok den ni yanglutsü.

⁴Kechiyong mapang ka nung ni pa nisungtem tsüngdang kuli ka kümdaktsüba kintem tanishir aser ozüng agütsür kümdaktsüba ama,

⁵yamaji nai memetetba nai ajatsü, aser nai memetetba kin ka ne dangi asema arutsü, KIBUBA ne Tsüngrem atema, aser Israel Temeshiba atema, kechiaser pai na sentsüwangshidaktsü.

⁶KIBUBA ngutettsüsa alidang pa bushiang, pa anasa alidang nenoki pa ja-ang;

⁷tamajunger pei lenmang, aser memeshiba nisungi pei tebilemba tokjang, KIBUBA dangi pa meyipa arudakjang, aser pa dak pai taochi akatsü; aser asen Tsüngrem dangi tanaben meyipdakjang kechiyong pai tai jenti atoktsü.

⁸Kechiyong kü tebilembatem nenok tebilembatem masü, mesüra kü sentongtem nenok sentongtem masü, ta KIBUBAi ashir.

⁹Kechiyong alima dang nungi anüng temaba ali ama, yamaji kü sentongtem nenok sentongtem dang nungi talangba, aser kü tebilembatem nenok tebilemba masü.

¹⁰ Kechiyong tzünglu aser rürjeb anüng nungi aluba ama, aser ilenjagi meyipa moi, saka alima nem tzü agüja, metsü adokdaktsür aser temechi adokdaktsür, aser metsü proker nem metsü agütsür, aser tachir nem amtsük agütsüba ama;

¹¹yamaji kü bang nungi aoba kü o alitsü; aji amajok nung kü dangi meyipa marutsü, saka aji agi ni aginüba ataloktsütsü, aser ni koba asoshi yok iba nung azükarutsü.

¹²Kechiyong nenok pelashishia adoktsü, aser tesünep nung anir aotsü; tenem aser ungsemtemi nenok jakdang ken tena ola adoktsü, aser moapu süngdong ajaki parnoki teka matentsü.

¹³Ayi melena fir süngdong adoktsü, aser ayidong melena myrtle süngdong adoktsü; aser ibaji KIBUBA atema mamatetba tenüng teti mesamatsü temaitsü asoshi alitsü.