Read njo ISAIA 56 Bible Online

ISAIA 56 - njo bible

ISAIA 56

¹Yamai KIBUBAi ashir, “Nenoki ozüng benshiang, aser ochi inyakang; kechiyong kü tekümtet arutsü anasa lir, aser kü ochiba jungkai adoktsüba lir.

²Nisung shibai ya inyaker, nisung chir shibai iba nung akang akanga sota alir, shibai amungnü meraksai benshir, aser tamajung kecha meinyaki pei teka sota ayur parnok temoatsü.

³Mesüra bendanger shibai pei sasa KIBUBA nung dena lir, pai KIBUBA atangji pei nübur nungi ni piladaktsütsü ta tejembi, mesüra teyangluba nisungi, ‘Ajiang, ni süngdong tasü’ ta tejembidaktsü.”

⁴Kechiyong KIBUBAi yamai ashir, “Teyangluba nisung shibai amungnü benshir aser ni aginüba shimteter aser kü tezüngzüktepba nung akang akanga alir,

⁵parnok nem jabaso aser jalatem dang nungi tajungba nüngshi ka, aser tenüng ka kü kidang aser kü jara kübok parnok nem ni agütsütsü; ni parnok nem mesamatsüba teti aliba tenüng ka agütsütsü.”

⁶Ano bendanger shirnoki KIBUBA den parnok sasa dena ali, pa dang tenzüktsü asoshi aser KIBUBA tenüng meimtsü pa tenzüker asütsü oda amungnü meraksatsür nisung shia aser kü tenangzükba akang akanga sota alir,

⁷ ni parnok kü temeshi tenemi bener arutsü, aser kü sarasademba kidang parnok pelashishia kümdaktsütsü; parnok tarongba tenla aser tetepsetba tenla kü tenladak manung agizüktsü, kechiyong kü ki nisung ajak asoshi sarasademba ki ta ajatsü.

⁸KIBUBA Tsüngrem shibai Israel nung matenba pur anitener pai ashir, “Ni kü meyong anitena aliba dak alema tangar ano anitentsü.”

⁹Moapu nung nenok arem shiruru ajak, arem nung shiruru ajak meyoktsü arung.

¹⁰Kü mitkar nisungtem parnok ajak tenük tapok shisatsü maka; parnok azü suwar, parnoki asangtsü makok, pungmang pungmanga mepitaka mejanga alitsü aginür.

¹¹Hau, azütem merumerua, parnok kodanga teperi akatsü makok, aser tangatetba maliba ibala sannükertem lir; parnok ajak pei lenmangi meyipa nisung shia pei tajangzük bushia, ka danga meli-i ogo.

¹²Parnoki ashi, “Nenok arung, ni yi bena arutsü, aser asenok sasa mejemtzü agi süngdaktsüdi aser asünga tanü ama anogo tulu alitsü.”