Read njo ISAIA 57 Bible Online

ISAIA 57 - njo bible

ISAIA 57

¹Temeshipur samar aser nisung shingaia temulungjang nung mayur, aser Tsüngrem tsübuba nisung bener oadoker, aser shingaia tarutsü tamajung nungi temeshipur bener aor ta meshisadanger.

²Pa tesünepdaki air; parnok lep nung parnok anisüngzüker, pa temeshi aser tindangba lenmangi aor.

³Saka anasa ileni arung, nenok arasentsürla chirtem, nüktapangtar chirtem aser jabujarirtem.

⁴Shiba anema nenoki asayatsür? Shiba anema nenoki tebang kar temeli sakzüka sayur? Nenok ozüng raksaba chirtem aser tiyazü chirtem,

⁵nenok sülemdong rongnung aser süngdong tamak shia kübok nenok sasa ain adoka lungren tsüngda lenten nung tanurtem tepseter masü no?

⁶Lenten nung lung tesüsü rongnung ne shilem lir, itemji ne tia lir. Item dang ne tajemtsü tenla shiloktsü, nai chiyungtsü tenla agütsü. Item asoshi ni ajemajema lidi ma?

⁷Tenem talang aser ajungketa alidak nai ne yipten yanglu, ajagi nai tenla agütsütsü atu.

⁸Kishi aser tongnü tesülen nai süngyanglu noksa ayu. Kü dang nungi pila-a nenoki pei sasa tangar bushitetdaktsüogo, nai ne yipten ulua kümdaktsüogo, aser na asoshi parnok den tezüngzüktepba yangluogo, nai parnok mangsa noksa angudak ne yipten aginür.

⁹Nai totzü bener Molek dangi ao, aser teronem menemtsü jenti aküm; aser nai ne o tongtartem talangi oda sheol tarok tashi yok.

¹⁰Ne lenmang talang agi na belemsetdaktsü; aji saka, “Teimla mali” ta nai mashi; nai ne tashi tasen ang angu, anungji nai mechiok.

¹¹Shiba dang nai ajem aser tsübu nungji, nai tiyazü jembi, aser ni mebilemtet, mesüra ne mulungjang nung rizünga mayu? Oda ni mapang talangka ola madoki aliba asoshi nai kü akhüm metsübui maküm no?

¹²Saka ni ne ochiba aser ne mapatem rakpoka metetdaktsütsü, item jagi ne nem tajangzük magütsütsü.

¹³Kodang nai ayimtendir nai koba bendena ali, item jagi na kümzükdakjang; saka mopungi itemji bener aotsü, khen tangu sashiba agi bener oadoktsü; saka shibai kü dak jenokdir alima senmang angutsü aser kü temeshi tenem amangtsü.

¹⁴Ya koda ashitsü, “Nenoki yangluang, nenoki yangluang, lenmang renemang, kü nübur lenmang nungi temetsüdaktsüji bener oadokang.”

¹⁵Kechiyong temaba aser tulusang tatem maka dak aliba shiba tenüng Temeshi lir, pai yamai ashir, “Ni temaba nung aser temeshidak shiba tanela teraksa aser ajemalu nung lir pa den ajemalur tanela tasen kümdaktsütsü aser temulungjang raksaba pur tasen kümdaktsütsü.

¹⁶Kechiyong ni tetibo atsütepa meraratsü mesüra tetibo ain adoka meraratsü; kechiyong kü dak nungi tanela aser ni yangluba taküm aliba adoker.

¹⁷Pa azüabungba tai yong ni ain adoka liasü aser pa dak azük, ni kü tejak atsükadok aser ain adoka liasü; aser pai pa mulungjang leni meyiper oadok.

¹⁸Ni pa lenmangtem angu, aser pa anebtsütsü ni ano pa anitsü, aser pa nem aser pa mangyimer nem tesünep abensa-a lepa agütsütsü.

¹⁹ “Tesünep, tesünep, talang nung alirtem aser anasa alirtem asoshi lir” ta KIBUBAi ashir; aser ni pa anebtsütsü.

²⁰Saka tamajungerbo arakzüa aliba tzüyim mesüker, kechiaser pa süngjema alitsü makok aser iba tzütemi lishi aser anakawa nungteta yoker.

²¹ “Tamajunger asoshibo anisüngzük mali” ta kü Tsüngremi ashir.