Read njo ISAIA 58 Bible Online

ISAIA 58 - njo bible

ISAIA 58

¹Tashi agi ayimtenang arentaka teli. Jangzü ama ne ola adokang. Kü nübur dang parnok ozüng raksaba indang aser Yakob kidong dang parnok temenen indang metetdakjang.

²Kechi shitak lir aji inyakba, aser iba Tsüngrem ozüng sentoka metoktsüba kin ka mesüka anogo shia atangji parnoki ni bushir aser kü lenmang metettsü jangrar. Parnoki kü dang temeshi ozüng asoshi asüngdanger, parnoki Tsüngrem anasa arunür.

³“Kechiba onok lumi aser naibo mangur?” ta parnoki ashir, “kechiyong onok tanela kangshidaktsü aser naibo kecha memetet.” Ajiang, nenok lumiba anogo nung nenoki pei sünütsü asür aser nenoki mapa inyaker ajak rishikangshir.

⁴Ajiang, nenoki rarabangsen aser tokteptsü asoshi aser tamajungba teka ajetreper tsüngteptsü lumir, nenok ola temalen angashidaktsütsü, nenoki tanü inyakba amai nenoki melumitsüla.

⁵Iba ama lumiba ni shimtetba asü? Oda nisung ka pei tanela timtemdaktsütsü anogo ka asü? Ibaji pei tekolak ai ama mechizüka alua, aser pa anemsü aser aut agi lungbanger senzütsüba no? Iba dang lumiba aser KIBUBA anogo ta nai ajatsü no?

⁶Ni shimtetba telumiba jagi tamajung talenba salatsü, süngra talentepba salatsü, aser rishikangshir nüji kümdaktsütsü aser nenoki süngra shia sükdangtsütsü, ya masü no?

⁷ Ne amtsük yaseta alirtem den lemsateptsü, aser ki makar sensaker kidangi anir arutsü; kodang nai mangsa ngudir, pa nembangtsütsü, aser pei shi nungi atsükshishia malitsü, ya masü no?

⁸Idangji ne tesangwa anepdang ama adoktsü, aser ne tanebtsüba karaa adoktsü, aser ne temeshiba ne jakdang aotsü, KIBUBA sentsüwangshiji ne sülen tanüker.

⁹Idangji nai ajatsü, aser KIBUBAi langzütsü; nai ayimtentsü aser pai ashitsü, “Ni yangi lir.” Nai rishikangshiba, jaktaka atalatsüba aser tamajung jembiba endokdi süra,

¹⁰aser ne amtsük yaseta alir den lemsatepa aser timtem nung alir süneptsüdi süra, idangji na asoshi ammang nung sangwa adoktsü aser shimak shimaka aliba anüngdang sangwa ama alitsü.

¹¹KIBUBAi na maneni nüka alitsü aser chiyungtsü tajung agi na temulung südaktsütsü aser pai ne tashi tasen kümdaktsütsü, aser tzü jungjunga agütsüba atsüki ama, aser mesepi aliba ayong tzü ama alitsü.

¹²Ne nüburi akhidang raksaba yanglushitsü, nai putu aika kimung yangertsü; aser ne dang teraksa tsüki yanglushir yimdong nung talidak yanglutsü nisung ta ajatsü.

¹³Amungnü nungi nai ne tsüng meyipa ora, kü temeshi anogo nung na pei mapa meinyaki nai amungnü dang tepelatsü, aser KIBUBA temeshi amungnü tetushitsü ta jara, nai pei mulungka agi meinyaki tushira, mesüra na süneptsütsü mebushi-i, mesüra nai samesa o mejembira;

¹⁴idangjiang nai KIBUBA nungi tepela angutsü; aser alima temalen takokba nung ni na mendaktsütsü, aser nebu Yakob senmang agi mesütsü; kechiyong KIBUBA bang agi aji jembiogo.