Read njo ISAIA 59 Bible Online

ISAIA 59 - njo bible

ISAIA 59

¹Ajiang, kümzüktsü atema KIBUBA teka tatsü masü, mesüra mangashitettsüsa pa tenarong anüa mali;

²saka nenok tai temenen agi, nenok aser nenok Tsüngrem tsüngda nung piladaktsü, aser nenok temenen agi pai nenok mangutsüsa pa tejak nenok nungi atsükadok.

³Kechiyong nenok teka azü agi aser nenok temeyongtem tai agi menena lir, nenok tebang temeli agi tiyazü jembir.

⁴Ochi asoshi shingaia memepishir, ochi pukhümer shinga mali; parnoki amajok nung temulung alemer aser tiyazü jembir tai shisar aser tai temenen adokdaktsür.

⁵Per entsü parnoki rüzüker aser sorak tera parnoki mesanger shibai item entsü chidir asür, aser koba tsükpokdir per adoker.

⁶Item sorak raji süoshi atema tenüngdaktsü masü, item nungi adokba agi shingaia mabener; parnok mapaji tai temenen mapa, aser teka yitepba mapa parnok ket nung lir.

⁷ Parnok tetsüng tamajung leni asümer, tai makaba zü tokshitsü parnoki ilungteper, parnok tebilemba tamajung sentong lir; azüngmeyaka toktsütsü aser teraksatsüba parnok lenmang nung lir.

⁸Tesünep lenmang parnoki memetet aser parnok aolen ochi mali. Itemji parnoki tekirak lenmang yanglutsüogo, ajagi shibasa idir, tesünep memeteter.

⁹Anungji asen dang nungi ochiba talang nung oa lir, mesüra temeshiba agi asenok matonger, asenoki tesangwa bushir saka ammang angur; sentsüprang bushir, saka asenok tammang nung jajar.

¹⁰Tenük tapok nisungtem ajemzüba ama, atsü meketa asenoki ajemzüa senzür, mangsema alidang ama asenoki anüngdang metsüdaker; tashikar rongnung asenok nisung tasü ama lir.

¹¹Shirem ama asenoki arr, aser guduru ama jashia asar: o bendangtsü asoshi asenoki bushir, saka shinga mali; tekümtet asoshi bushir, saka aji asenok nungi talang nung lir.

¹²Kechiyong onok ozüng raksaba ne madang jenti lir, aser onok temenen agi onok anema kuli agütsür; onok ozüng raksabatem onok den lir aser onok tai temenen indang onoki metet;

¹³tashi mangai apusoba, KIBUBA dang temulung matangi inyakba, aser Tsüngrem tsütsü tesülen shitsüba, o tesashi aser anema jembiba temulungjang nungi tiyazü jembiba aser shisadangba.

¹⁴Ochiba tesüleni atsüngzüka ogo, aser temeshiba talang nung oagi lir; kechiyong yimdong nung ochiba laoa lir, aser tindang jakla aitsü makoker.

¹⁵Hau, ochi agi anünga lir; aser shibai tamajung nungi piladir, pei sasa tetepsettsü kümdaktsür; aser KIBUBAi aji angu aser idakji ochi mali ta pa iba jagi jashidaktsü.

¹⁶ Pai nisung shinga yangji mangu, aser temepishitsür mali ta süngmang, anungji pa pei ket agi pa dangi tekümtet bener aru; aser pa temeshiba agi pa ajungket.

¹⁷ Aser tuku semoktsü asoshi pai temeshiba sobu, aser pa tekolak nung tekümtet merang korang aser süoshi asoshi pai mangyangba sü aben aser tema sepoktsü tejangraba sobua liasü.

¹⁸Parnok mapa yari yamaji pai taa agütsütsü, pa temerirtem ain aitba, pa tsükchirtem nem lepa agütsüba, tzüküm linük nung pai tanaben lepa agütsütsü.

¹⁹Yamaji parnoki KIBUBA tenüng anüolen nungi aser anüdoklen pa sentsüwangshi tsüngken tsübutsü; kechiyong KIBUBA tangulai apuoktsüba ayong ayimba ama pa arutsü.

²⁰ Zioni Tekümzüktsüba arutsü, aser Yakob nungi ozüng raksaba agientsütsü ta KIBUBAi ashir.

²¹Aser ni asoshibo ibai nenok den kü tezüngzüktepba lir, ta KIBUBAi ashir. Kü tanela koba nenok madak lir, aser kü o koba ni nenok bang nung enoktsüogo, nenok bang nungi mepilatsü, mesüra nenok chirnur bang nung mesüra nenok chirnur chirtem bang nungi, tang nungi aser teti mepilatsü ta KIBUBAi ashir.