Read njo ISAIA 6 Bible Online

ISAIA 6 - njo bible

ISAIA 6

¹ Uzzia chuba asüba küm nung chuba menden nung mener, azüklen ajungketa, tamaren sobutsü agi tenla ki sünga ni KIBUBA angu.

²Pa temalen serafim noktak; ka ka shia tashikang trokrok liasü; ana agi pai pei tejak nembang, ana agi pai pei tetsüng nembang, aser ana agi yimzü.

³ Kati ka dang ayimtentepa ashi, “Temeshi, Temeshi, Temeshi, Temeranger Telok KIBUBA; Pa sentsüwangshi agi alima ajak sünga lir.”

⁴ Aser ayimtenba ola jagi kimung azüngdakji anokshi, aser mokozü agi kiji asüng.

⁵Idangji ni ashi, “Ni aiatai! Kechiyong ni makaka; kechiaser ni temeli memerükba nisung, aser ni temeli memerükba nübur rongnung alir; kechiyong kü tenük agi, Chuba, Temeranger Telok KIBUBA nguogo.”

⁶Idangji tenladak nungi mijepru agi mijang tait ka agiteta bener serafim rongnung ka kü dangi yima aru;

⁷aser iba jagi kü bang nung kongshia ashi, “Ajiang iba yagi ne bang nung kongshiogo, aser ne taitemenen bener ogo, aser ne temenen tokogo.”

⁸Aser KIBUBA ola agi shia ni angashi, “Ni shiba yoktsü, aser asenok asoshi shiba aotsü?” Idangji ni ashi, “Ni yangi lir! Ni yokangma.”

⁹ Anungji pai ashi, “Oang, aser iba nübur dang shiang, ‘Atangji nenoki angashir, saka mangateter, nenoki atangji angur, saka memeteter.

¹⁰Parnok tenük agi ngua, parnok tenarong agi angashia, parnok temulungjang agi angateta, aser tanaben meyipa, anebadoka lir ta, iba nübur mulungjang shimaka, parnok tenarong anüa, aser parnok tenük nembanga kümdakjang.’ ”

¹¹Idangji ni ashi, “KIBUBA kopiga?” Idangji pai langzü, “Yimtitem nung nisung meli-i maküm tashi, aser kidang nisung meli-i maküm tashi, aser linük meshimeshia mejentoktsü tashi,

¹²aser KIBUBAi nisung talang kati magiendaktsü tashi, aser linük tiyong nung tesem aika jentoka meyutsü tashi.

¹³Item rongnung tersü nung ka danga iba nung anünga, sülemdong aser terebint süngdong lensükba tembang ama liaka, aji tanaben rongtoktsü.” Yamaji temeshi kinji iba tembang lir.