Read njo ISAIA 60 Bible Online

ISAIA 60 - njo bible

ISAIA 60

¹Sakang, pelatepang, kechiyong ne tesangwa arua lir, aser KIBUBA sentsüwangshi ne madak adokogo.

²Kechiyong ajiangjo, tammang agi alima nembangtsü, aser tammang temelem agi nisungtem nembangtsü, saka ne madak KIBUBA adoktsü, aser pa sentsüwangshi ne madak angutsü.

³Kintem ne sangwa nung jajatsü, aser chubatem na adokba sentsüprang nung jajatsü.

⁴Ne tenük akasoa meketa reprangang, parnok ajak külemi senteper, parnok ne dangi arur; ne jabasotem talang nungi arutsü, aser ne jalatem teka nung ajungtsü.

⁵Idangji nai angutsü, aser sangwa akümtsü, aser ne mulungjang arakzütsü aser tongtonglatsü atutsü; kechiaser tzüyim rongsentem ne dangi meyiptsü, aser kintem rongsen ne dangi arutsü.

⁶Ut teloki na nungbangtsü, Media aser Efa ut chanutem, item ajak Sheba nungi arutsü, parnoki hon aser liangmesen bener arutsü, aser KIBUBA tenüngsang metetdaktsütsü.

⁷Kedar san telok ajak ne dangi külemi sententsü, aser Nebaiot san tepungtemi na tenüngdaktsü agütsütsü; parnok kü tenladak manung agizüka atutsü, aser kü sentsüwangshi ki ni mera ketdaktsütsü.

⁸Mepet ama yimzüba aser guduru kichiba nung yimzüba ama itemi shirnok?

⁹Atangji tzüküm limai ni asoshi atar, tamasa Tarshis rongtem, ne jabasotem talang nungi parnok taribi aser parnok hon KIBUBA ne Tsüngrem asoshi aser Israel Temeshisang asoshi, parnok den bener arutsü, kechiaser pai na sentsüwangshidakja lir.

¹⁰Bendangertemi ne jaratem yanglutsütsü, aser parnok chubatemi ne dang tenzüktsü, kechiyong kü ain adok dang ni ne dak azük, saka kü maongka agi ni ne dak yimlibilem aka.

¹¹ Ne süngkhüm ano maneni lapoka alitsü; aser chubatemi anir nisungtemi kintem rongsen bener ne dangi arutsüsa, anüngdang mesüra aonung itemji meshi-i alitsü.

¹²Kechiyong na metenzükba kin aser chuba yimli samadoktsü; hau, item kin meshimeshia endokadoktsü.

¹³Kü temeshidak tobur jungdaktsütsü asoshi, Lebanon sentsüwangshi, fir süngdong, mitsüktsü süngdong, aser lareg süngdong, ne dangi arutsü, aser ni kü tetsüng alidak sentsüwangshidaktsütsü.

¹⁴ Shirnoki na timtemdaktsü, parnok chirtem ne dangi apudaka arutsü, aser na sensatsür ajaki ne tsüng temepu züngdang parnok sasa apudaktsü; aser parnoki ne dang KIBUBAr yimti, Israel Temeshisang meyong Zion, ta ajatsü.

¹⁵Na senzüka tokja aser sempadakja, aser nisungi senzüka yuja aliba melena ni na teti tatem maka tejak tenteta alitsü aser putu aika tepela kümdaktsütsü.

¹⁶Nai kintem nungi mamatzü meseptsü, aser chubatem tukubang nungi meseptsü aser ni KIBUBA na kümzükba, aser na alangzükba, Yakober Tulusang ta nai metettsü.

¹⁷Yongmenyin melena ni hon bener arutsütsü, aser merang melena ni taribi bener arutsütsü, süng melena yongmenyin, lung melena merang; aser nenok yimsüsürtem tesünep, aser ne mapa kibur temeshiba kümdaktsütsü.

¹⁸Teka yitepba mapa joko ne lima nung mangashitsü, azüngazünga toktsüba mesüra teraksa ne linük nung joko mangashitsü; saka nai ne jara dang Tekümtet aser ne süngkhüm dang Tenüngsang ta ajatsü.

¹⁹ Joko anüngdang anüji ne tesangwa malitsü, mesüra sentsüprang asoshi itai ne nem tesangwa magütsütsü; saka na asoshi KIBUBA teti tatem maka tesangwa, aser ne Tsüngrem ne sentsüwangshi alitsü.

²⁰Ne anü joko maitsü, mesüra ne ita pei sasa mesamatsü, aser ne mangyimba anogo tatem akümtsü.

²¹Na sentsüwangshidaktsütsü asoshi ni atemba kongsang, kü ket agi inyakba mapa, ano ne nübur ajak temeshi kümdaktsütsü, teti asoshi parnok lima amangtsü.

²²Tajemzüksangji meyirijang ka akümtsü, aser tilasangji tashi tait kin ka akümtsü. Ni KIBUBA lir, ni mapang shitak nung aji yakta inyaktsü.