Read njo ISAIA 61 Bible Online

ISAIA 61 - njo bible

ISAIA 61

¹ KIBUBA Tsüngrem tanela kü madak lir, kechiaser sensaker dang osang tajung sayutsü KIBUBAi ni mezüja shimtet; temulungjang teraksa alenteptsütsü, tepuokertem dang nüji tia sangoktsütsü aser alena alir dang tepuokdak lapokba indang sangoktsütsü,

²KIBUBA pelaba sangoktsütsü, aser asen Tsüngrem mangyangba anogo sangoktsütsü, mangyimer ajak süneptsütsü;

³Zion nung mangyimertem asoshi anebalutsütsü, parnok nem aut melena naro zük agütsütsü, mangyimba melena tepelatsü totzü, zürepa aliba tanela melena tenüngsang sobutsü agütsütsü, oda pa sentsüwangshi atema parnok dang temeshi süngdong KIBUBAi atemba ta ajatsü asoshi, pai ni yok.

⁴Parnoki akhidang raksabatem yanglushitsü, alemli azüngazünga toktsüba, putu aika sendokadokba, aser endoka aliba yimtitem parnoki yanglushitsü.

⁵Bendangertem noktaktsü aser ne santem mesütsü aser aener semloka alirtem nenok alu alartem aser nenok tsükmenatzü menüngertem asütsü.

⁶Saka nenokbo KIBUBA putirtem ta tenüng ajatsü; nisungtemi nenok dang asen Tsüngrem tenzükertem ta ajatsü; nenoki kintem rongsen achitsü, aser parnok sentsüwangshi atema nenoki takok angutsü.

⁷Nenok maksüba asoshi nenok anasü akatsü, aser rongrongshishi melena parnoki pei shilem nung pelateptsü; anungji parnok lima nung parnok anasü angutsü. Teti tatem maka tepela parnok asoshi alitsü.

⁸Kechiyong ni KIBUBAi ochi meimer, aser tai mena-a rakzükraktemba sempar; ni parnok nem parnok taa lepa atangji agi agütsütsü, aser ni parnok den teti tatem maka tezüngzüktepba yanglutsü.

⁹Parnok metsü kin rongnung, aser parnok chirnur nisung rongnung meteta akümtsü, parnok angur ajaki oda parnok KIBUBAi moatsüba metsü ta parnok metettsü.

¹⁰ Ni KIBUBA nung kanga pelatsü, kü nelai kü Tsüngrem dak pelashishia alitsü, kechiyong pai ni tekümtet süoshi agi abendaktsü, kiyimsangi pei sasa süoshi agi mera keta sobuba ama, aser kiyimlai pei sasa senti zük agi azükdaktsüba ama, pai ni temeshiba sobutsü agi nembangja lir.

¹¹Kechiyong alimai pei temeshiba adokdaktsü ama, aser atsüki nung prokba osettem adokdaktsü ama, yamaji KIBUBA Tsüngremi kin ajak madak temeshiba aser tenüngsang adokdaktsütsü.