Read njo ISAIA 62 Bible Online

ISAIA 62 - njo bible

ISAIA 62

¹Zion atema ni ajemajema malitsü, aser Yirusalem atema pa temeshiba prangpranga madok tashi, aser pa tekümtetet jangrua aliba milen ama madok tashi ni anisüngzüka malitsü.

²Aser kin ajaki ne temeshiba, aser chuba ajaki ne sentsüwangshi angutsü; aser KIBUBA tebang agi na tenüng tasen ka agi ajatsü.

³Ano, na KIBUBA ket nung tobur tajung chuba korang ka, aser ne Tsüngrem ket nung chubar temaitsü ka alitsü.

⁴Joko ne dang, “Senzüka yutsüba” ta majatsü, mesüra joko ne lima dang, “Azüngmeyakdak” ta majatsü. Saka ne dang Hefziba ta aser ne lima dang Beula ta ajatsü.[11] Kechiyong KIBUBAi ne dang pelar, aser ne lima ki ayimtsü.

⁵Kechiyong asangur kati tasüngtet aiür ka den ki ayimba ama, yamaji ne jabasotemi ne den ki ayimtsü; aser kiyimsangi kiyimla dang pelaba ama, yamaji ne Tsüngremi ne dang pelatsü.

⁶Oh Yirusalem, ne jara manung ni mitkar yuja lir; anüngdang süshia, aonung süshia parnoki kodanga ola madoki malitsü; nenok shir KIBUBAi mamartem lir, nenok ola madoki teli.

⁷Alima nung Yirusalem nüngsang nüngtugu kümdakja KIBUBAi meyanglu tashi pa nem anisüngzük tagütsü.

⁸KIBUBAi pa teka tajichi agi aser pa teka tashi tait agi azüngashi; atangji joko ne tsükchirtem chiyungtsü asoshi magütsütsü; aser yi koba asoshi nai belema inyak aji bendangertemi majemtsü.

⁹Saka shirnoki aji ongtena ayur, parnoki aji achitsü, aser KIBUBA tenüng asangtsü, aser shirnoki aji benden, parnoki aji kü temeshidak kilempok nung achitsü.

¹⁰Ajanga oang, süngkhüm ajanga oang, nenoki nübur lenmang renemang; lentongbang süsüang, lung shitenang, nisungtem madak nisan ajungketang.

¹¹ Ajiang, alima tatem tashi KIBUBAi sangdongdaktsüogo; nenoki Zion jala dang shiang, “Ajangla, nenok tekümtet arur, ajiang, pa tajangzük pa den lir, aser pa mapa pa jakdang lir.”

¹²Aser parnoki parnok dang “Temeshi nübur KIBUBAi alangzükba; ne dang bushitetba, senzüka metoktsüba yimti” ta ajatsü.