Read njo ISAIA 63 Bible Online

ISAIA 63 - njo bible

ISAIA 63

¹ “Bozra nungi temerem sü abener, Edom nungi aruba, pa süoshi sentsüwangshia sobur tashi ita jaja aruba ya shiba? Aji ni, shibai temeshiba nung jembir aser kümzüktsü tashi tulu lir.

²Kechiba ne süoshi tsükmenatzü menüngdak ajemshiba nisung süoshi ama temerem lir?

³ Tsükmenatzü menüngdak ni kija jaja, kü den nisung shinga maliasü, hau, ni ain adokdang ajemshi, aser kü mit tulu nung parnok ajemzüka yok; aser parnok zü kü süoshi nung rüklok, aser ni kü süoshi ajak menenogo.

⁴Kechiyong mangyangba anogo kü mulungjang nung liasü, aser kü talangzükba küm arua lir.

⁵ Ni reprang, aser teyaritsü shinga maliasü; aser ajungkettsütsü shinga maliba agi ni süngmang, anungji kü pei tepen agi ni yari, aser kü ain adokba agi ni ajungket.

⁶Kü ain adokba nung ni nisungtem ajemzüka yok, aser kü mit nung parnok anüka ajasatsü, aser parnok taküm zü ali nung shiloktsü.”

⁷KIBUBAi asenok nem agütsüba yari, ni KIBUBA tenüngsang indang, aser Israel kidong dang kanga ajungba, koba pa taochi yari pai parnok nem agütsü, aser pa yimlibilem jenti indang ashitsü.

⁸Kechiyong pai ashi, “Atangji parnok kü nübur kü madang meyazütsüba techirtem lir;” anungji pa parnok kümtettsüba aküm.

⁹Parnok timtem tekangshi angu, aser pa dena aliba tenyari parnok kümzük; pa temeim agi aser pa mulung ayangba agi pai parnok kümzük aser pai parnok bena aru, aser alemli anogo ajak nung pai parnok aben.

¹⁰Saka parnoki tashi manga aser pa Tanela Temeshi jashidaktsü; anungji pa parnok tsükchir kümdaktsü aser pa sasa parnok anema rara.

¹¹Idangji pa nüburi alemli Mosa anogotem bilemteta ashi, “Sannüker shiba pei san telok dena tzüyim nungi parnok shibai anitet pa kong ali? Parnok rongnung Tanela Temeshi shibai yutsü pa kong ali?

¹² Shibai pei sentsüwangshi tepen Mosa teka tajichileni odaktsü? Shibai pei sasa teti tatem maka tenüng asoshi parnok jakdang tzü sadangtsü?

¹³Shibai parnok taroktem ajanga, parnok memetsüdaktsü asoshi arem nung kor ama,

¹⁴nashi telok lenteni aluba ama anir alu?” Yamaji KIBUBA tanelai parnok anük. Yamaji ne sasa sentsüwangshi tenüng kümdaktsütsü nai ne nübur anishi.

¹⁵Kotak nungi reprangzüka yokang, aser ne temeshi aser sentsüwangshi talidak nungi ajiang; ne tejangraba aser ne tashi tulu mapa nai jangraa temulung ayangba aser aria bilemba onok asoshi kong ali? Ne sasa tim tetem.

¹⁶Kechiyong Abrahami onok memetetaka aser Israeli onok magizükaka na onok tebu lir, na Oh KIBUBA, onok tebu lir: teti tatem maka nungi ne tenüng onok Alangzüksang lir.

¹⁷Oh KIBUBA, kechiba nai ne lenmang nungi onok nemzüa toktsür, aser kechiba ne tsüngken metsübudaktsüi onok temulungjang merangdaktsür? Ne senmang amangba kintem, ne tenzükertem asoshi meyipang.

¹⁸Ne temeshi nüburi kenpiga asoshi aji agi, onok tsükchirtemi ne temeshidak nung ajemshitsüogo.

¹⁹Shirnok ne tenüng agi maja parnok ama, alemli nungi shir madak nai yimsü masü parnok mesüka onok kümzükogo.