Read njo ISAIA 64 Bible Online

ISAIA 64 - njo bible

ISAIA 64

¹Oh nai anüngtem rakpoker, tenemtemi ne tsüngdang arakzütsüsa na alu asübo,

²kodang ai takong nung mi kaodir, aser mi jagi tzü jaa muludaktsüba ama ne tenüng ne tsükchirtem dang metetdaktsütsü aser oda kintemi ne madang atententsü.

³Onoki meimlai aliba tetsübutsü mapatem koba alemli nungi nisungi mangashidang,

⁴ mesüra tenarongi mangashidang, tenüki na Tsüngrem ne dak alema mungudang, shibai pa asoshi ata-a alirtem asoshi inyaker.

⁵Shiri temeshiba inyaker aser tepela angur, shiri ne lenmangtem bilemteter nai pa sota ayur; ajiang, na ain adoka liasü, aser onoki temenen mena. Onoki inyakba ajanga onoki tai nung tsük.

⁶Onok ajak memerükba nisung ama kümogo, aser onok temeshiba ajak süjen temenen ama lir; onok süngo to ama azülar, aser onok tai agi mopung ama onok bener aor.

⁷Ne tenüng ajar nisung mesüra ne dak azüita alitsü pei sasa ajongmesoba shinga mali; kechiaser nai pei tejak onok nungi atsükadok, aser onok temenen tashi nem bendanga agütsü.

⁸Saka tang, Oh KIBUBA, na ozü Tebu lir; onok ajongli, aser na ozü poteper; onok ajak ne teka agi inyakba lir.

⁹Oh KIBUBA, onsarabo ain tadok ma, mesüra onok tai menaba teti bilemteta telima. Ajiang, onoki ne dang mepishir kechiyong onok ajak ne nübur lir.

¹⁰Ne temeshi yimtitem arem kümogo, Zion arem kümogo, Yirusalem azüngmeyakdak kümogo.

¹¹Ozü temeshi aser tobur tajung ki, kong ozü tsüraburtemi ne tenüng asang, aji mi agi rongtokogo, aser onoki aginüba osettem endokadokogo.

¹²Item asoshi, Oh KIBUBA, na pei sasa sota lidi ma; na ola madoki lidi ma, aser onok sayatenyatsüka timtemdaktsüdi ma?