Read njo ISAIA 65 Bible Online

ISAIA 65 - njo bible

ISAIA 65

¹Shirnoki kü dang masüngdang parnoki kü den tongtepa jembidaktsütsüba ni renema liasü, shirnoki ni mebushi parnoki bushidaktsütsüba ni renema liasü; kü tenüng nung majaba kin dang ni shiogo, Ni yangi lir! Ni yangi lir!

²Shirnoki pei tebilemba sülen lenmang tamajung nung jaja, tashi mangaba nübur parnok dang ni anogo tepiyong kü teka songtok;

³nübur shirnoki maneni kü jakdang atsüki nung shiruru tenla tepseta, lungru manung teronem menemtsü ronga ali ni adokdaktsü;

⁴parnoki leper rongnung amener, aser temiimdak alir; shirnoki ak shi achir aser memerükba shi parnok po nung lir; parnoki ashir.

⁵“Pila-a oagi noktakang, ni anasa taru kechiaser ni na asoshi kanga temeshi lir.” Itemi kü teni telung nung mokozü lir, maneni arongba mi lir.

⁶Ajiang, aji kü madang zülur noktaka lir; ni mokorai malitsü, saka meyipa agütsütsü;

⁷KIBUBAi ashi, hau, tenem nung liangmesen arongdang aser tenemtem manung ni sensatsüba nenok temenen aser nebu nunger temenen nenok tuku tonga meyipa agütsütsü; anungji parnok tuku nung parnok mapa tamasa ni asadangtsü.

⁸Yamai KIBUBAi ashir, “Yi tasen süngjang tejep nung angu nungji kari ashir, Aji teraksa, kechiyong iba nung temoatsü lir, yamaji kü tenzükertem atema parnok dak ni inyaktsü.

⁹Ni Yakob metsü nungi metsü ka aser Yihuda nungi kü tenem senmanger adokdaktsütsü aser kü teshimtet puri aji amangtsü, aser kü tenzükertem yangji alitsü.

¹⁰ Ni bushiba kü nübur asoshi Sharon san telok asoshi ki akümtsü, aser Akhor lenten nashi telok asoshi chiyimdak alitsü.

¹¹Saka KIBUBA senzüka toktsüba nenok asoshi, aser kü temeshi tenem[12] amadokba aser tia tajung asoshi langbang renemer, aser tarutsü tia asoshi temeyoktepba yi marok süngdaktsür.

¹²Ni nenok nok agi tepsettsü tiatsütsü, aser nenok ajaki tetepsetba madang apudaktsü, kechiaser ni ajadang nenoki melangzü, kodang ni jembi nenoki anga-a mali; saka kü nükdang kechi majung aji nenoki inyak aser kechi agi ni mepeladaktsü aji shimtet.”

¹³Anungji yamai KIBUBA Tsüngremi ashir, “Ajiang, kü tenzükertem chiyungtsü, saka nenokbo ayatsü; ajiang, kü tenzükertem ajemtsü, saka nenokbo tzüratsü; ajiang kü tenzükertem pelashishia alitsü, saka nenokbo akdaktsütsü,

¹⁴ajiang, kü tenzükertem temulungjang pelaba agi ken atentsü; saka nenok temulungjang tejashi agi ajebtsü, aser tanela raksaba yong ajebtsü.

¹⁵Nenoki nenok tenüng teshimtet pur asoshi atakatemtsü toktsütsü; yamaji KIBUBA Tsüngremi nenok tepsetangma; saka kü tenzükertembo tanga tenüng agi ajatsü.

¹⁶Idangji shibai linük nung temoatsü asoshi sarasademdir, atangji Tsüngrem ajanga sarasademtsü, aser shibai linük nung azüngashiba ka züngyazüngkodir, atangji Tsüngrem ajanga azüngashitsü; kechiyong taoba mapang timtem amadokogo aser kü tenük nungi miimogo.”

¹⁷ “Kechiyong ajiang, ni anüng tasen aser alima tasen ka yangludagi; aser taoba mapangtem mebilemtettsü aser temulungjangi maitdaktsütsü.

¹⁸Saka ni kechi yanglur iba nung nisungi pelateptsü aser teti tatem maka ajungkettsü; kechiaser ajiang ni Yirusalem ulutsütsü aser kü nübur tepela akümtsü yangludagi;

¹⁹ aser ni Yirusalem madak ulutsü aser kü nübur dak pelatsü; joko la dak tajepba ola mesüra ayimtenba ola mangashitsü.

²⁰Joko la dak nungi tanur süshia tain süshia pei taküm arishi mabensai mesüitemtsü; saka tanubutiba küm noklang ka lir-ang asütsü, aser shirnok küm noklang ka mejungi tsükdir atakatem ta züngshitsü.

²¹Parnoki ki süa yangji nisung alitsü aser parnoki tsükmenatzü lu ayimtsü, aser item süngjang achitsü.

²²Tangar alitsü parnoki meyanglutsü, tangar achitsü parnoki metsünütsü, kechiyong süngdong arishi anogo ama kü nübur arishi alitsü, aser parnok teka agi inyakba mapa kü teshimtet puri tatem tonga agitsü.

²³Amajok nung parnoki mebelemtsü, mesüra tesamatsü asoshi chirnur, mesotentsü, kechiyong parnok KIBUBAi moatsüba kin lir, parnok chirnur parnok den alitsü.

²⁴Parnoki majadang ni langzütsü, parnoki jembia alidang ni angashitsü.

²⁵ Tsünü aser san chanu külemi chiyimtsü, aser nashi pungchi ama molusongzüi monü achitsü, saka perbo pa chiyungtsü ali asütsü, parnoki kü temeshi tenem ajak nung tamajung kecha meinyaktsü mesüra mesamatsütsü” ta KIBUBAi ashir.