Read njo ISAIA 66 Bible Online

ISAIA 66 - njo bible

ISAIA 66

¹KIBUBAi yamai ashir, “Kotak kü menden aser alima kü tetsüng ajemetdak; ajangla kobala ki ka nenoki ni asoshi yanglutsütsü? Aser kü anisüngzükdak kechi nung alitsü?

²Kü ket agi ya ajak yanglu, ya ajak kü meyong lir, ta Tsüngremi ashir; aji saka shiba ajemalu aser tanela teraksa ali aser shibai kü o nung atentena ali, pa dang ni reprangtsü.”

³Shibai nashi pungchi ka tepsetdir pa nisung ka tepsetba ama alitsü; shibai san ka tepseta tenladir, pa azü tekong nung lenseta südaktsür ama alitsü; shibai chiyungtsü tenla tenladir pa ak zü agi tenlaba ama alitsü; shibai tebilemtettsü liangmesen tenla tenlar, pa süngyanglu moatsür ama alitsü: parnoki pei lenmangtem shimogo, aser parnok tanelai parnok tesempatsütem nung pelar.

⁴Anungji nia parnok sensamasatsü shimtettsü aser parnok madak parnok tetsübutsü bena arutsütsü, kechiaser ni ajadang shingaia melangzü, ni jembidang parnoki mangashi: saka kü nükdang kechi tamajung aji parnoki inyak aser ni kechi nung mepelar aji parnoki shimtet.

⁵KIBUBA O angang, nenok pa o nung atentena alirtem, nenok kü tenüng atema parnok rongnungi nenok sentoka toktsürtem aser nenok sempaba adianutemi ashir, “Nenok tepela onoki angutsü asoshi KIBUBA sentsüwangshidakjang,” saka parnoki akseta alitsü.

⁶“Angang yimti nungi rongrongshishi ola, tenla ki nungi ola, pa tsükchirtem nem meyipa agütsüba KIBUBA ola.

⁷ Saka la nuso mashidang lai sotsüogo; la mekangshidang lai tebur ka sotsüogo.

⁸Shibai iba amai angashidang? Shibai iba amai ngudang? Kenüyongi linüki pei nübur adokdaktsüdi ma? Khenyongi kin ka adokdaktsüdi ma? Kechiyong Zion nuso ashitsü tenzükli lai pei chirtem sotsü.

⁹Tasotsü ni kechi bena arutsü aji ni mesodaktsüli ma? KIBUBAi ashir, ni ashiba bena arudaktsür nu menden shibangdi ma?” ta ne Tsüngremi ashir.

¹⁰Nenok pa meimer ajaki Yirusalem den pelatepang, aser la asoshi pelaseta liang, nenok la asoshi mang ayimertem.

¹¹Kechiaser la tesüneptsüba mama nungi nenoki sünga meseptsü, la dak nungi moshia ayimba sentsüwangshi agi nenok jangratema ajemtsü.

¹²Kechiyong KIBUBAi yamai ashir, “Ni ayong ama tesünep, aser kintem sentsüwangshi moshia aliba ayong ama la dangi yoktsü, aser idangji nenoki iba nungi meseptsü; nenok teka nung ajungtsü aser temokok manung metemshitsü.

¹³Pei tetsüi süneptsüba ama ni nenok süneptsütsü; aser nenok Yirusalem nung süneptsütsü.

¹⁴Aji nenoki angutsü, aser nenok temulungjangi pelateptsü, aser rem lanu ama nenok teret akümtsü, aser KIBUBA teka pei tenzükertem dang meteta akümtsü aser pa tsükchirtem anema pa ain adokba alitsü.”

¹⁵Kechiyong ajiang, KIBUBA mi ama arutsü, pa talungtsü Tsüngrem mopung ama, pa mit agi ain adokba aser pa tarütsüba milak agi arudaktsütsü.

¹⁶Kechiyong mi agi aser pa nok agi shi ajak madak pai o bendang akatsü aser KIBUBAr tetepsetba jenti alitsü.

¹⁷Shirnoki atsüki nung külemtsü asoshi pei sasa bendanga merüktetdir, tiyong nung ka sülen anidaka, ak shi aser temenen aser koya chia, külemi tatem kümdaktsütsü ta KIBUBAi ashi.

¹⁸Kechiyong parnok mapa aser parnok tebilemba ni metet aser kin aser oshi ajak anitenba ni metet aser kin aser oshi ajak anitentsü ni arudagi; parnok arutsü aser kü sentsüwangshi angutsü.

¹⁹Parnok ajanga ni temaitsü ka ayutsü, shirnok parnok nungi jentetdir kintem dangi ni yoktsü. Tarshis, Put aser Lud dangi, Tubal aser Yavan dangi talang nung tzüküm linük kobaisa kü nüngsang mangashi mesüra kü sentsüwangshi mangu parnok dangi yoktsü. Parnoki kin rongnung kü sentsüwangshi metetdaktsütsü.

²⁰Nisungtemi nenok adianu ajak nungi anir arutsü, kor nung talungtsü nung, oset abenba kor nung nembanger, gado aser ut manung kü temeshi tenem[13] Yirusalem nung KIBUBA dangi tenla asoshi, Israel chirtemi temerük nung KIBUBA kidangi tenla bener aruba ama, bener arutsü ta KIBUBAi ashir.

²¹Aser item karbo ni putirtem aser Levitem asoshi agitsü ta KIBUBAi ashir.

²²“Kechiyong anüng tasen aser alima tasen koba ni yangludagi kü madang maneni alitsü, ta KIBUBAi ashir, yamaji ne kin aser ne tenüng maneni alitsü.

²³Ita lanu nungi ita lanu tashi, amungnü nungi amungnü tashi shi ajaki kü madang külemtsü arutsü” ta KIBUBAi ashir.

²⁴Aser parnok adoktsü aser ni anema apusor nisung tasü mang dak parnoki reprangtsü; kechiyong parnok mesen masütsü mesüra parnok mi meremseptsü, saka shi ajak madang parnok tesempatsü alitsü.