Read njo ISAIA 7 Bible Online

ISAIA 7 - njo bible

ISAIA 7

¹ Uzzia jabaso Yotham, aser par jabaso Ahaz Yihuda chuba tendak Siria chuba Rezin, aser Remalia jabaso Peka Israel chuba, Yirusalem anema raratsü atu, saka iba anema meraratet.

²Aser kodang Dawid kidong dang, Siria nunger Efraim nunger li nung anena lir, ta ashi, pa mulungjang aser nübur mulungjang arem nung süngdongtem mopungi anokshiba ama anokshidaktsü.

³Idangji KIBUBAi Isaia dang ashi, “Na aser ne chir Shear-Yashub[2] süshir li lenti nung moti temaba nungi tzüla tatemlen jagi tang Ahaz den ajuruteptsü tuang; aser pa dang shiang,

⁴‘Kümdangang, aser süngjem süngjema liang. Rezin, Siria, aser Remalia jabaso tesashi ain adokyongbo, aser item mokozü alongba milungsang tembang ana aliyongbo tsübua teli, aser ne mulung makai teli.’

⁵Kechiaser Siriai Efraim aser Remalia jabaso dener na anema tamajung tasa yanglua ashi,

⁶Yihuda anema asenoki tudi, aser aji jenshidaktsüdi, aser asenok asoshi aser iba tiyong nung Tabeel jabaso chuba kümdaktsüdi.”

⁷Yamai KIBUBA Tsüngremi ashir, “Aji tamakok angutsü, aji oda masütsü.

⁸Kechiyong Siria tekolak Damaska, aser Damaska tekolak Rezin lir aser küm roker pungu tsüngda nung Efraim kin kata ta masütsüsa anüka raksadaktsütsü.

⁹Aser Efraim tekolakji Samaria, aser Samaria tekolakji Remalia jabaso lir. Nenoki mamangli süra nenok takoksa asütsü.”

¹⁰KIBUBAi Ahaz dang tanaben jembia ashi,

¹¹“KIBUBA ne Tsüngrem dang temaitsü ka asüngdangang; Sheol nung mesüra temalen talang nung asüngdangang.”

¹²Saka Ahazi ashi, “Masüngdangtsü, mesüra KIBUBA ni matitangtsü.”

¹³Aser pai ashi, “Tang nenoki angang, Oh Dawid kidong, nisung aniseta kümdaktsütsü ya mapa tila ka ta nenoki bilema, oda ano kü Tsüngrem aniseta kümdaktsütsü no?

¹⁴ Anungji KIBUBAi pa sasa nenok nem temaitsü ka agütsütsü; ajiang tasüngtet aiür[3] ka mashisa akümtsü, aser jabaso ka asotsü, aser pa tenüng “Immanuel”[4] ta ajatsü.

¹⁵“Kodang pai tamajung magizüktsü aser tajung shimtsü meteta kümdir, pa chiyungtsü mamatzü telong aser ninang mojitzü achitsü,

¹⁶kechiyong tanur jagi tamajung magizüktsü aser tajung shimtsü memetet dang, alinük koba nung chuba ana nai sempar aji senzüka toktsütsü.

¹⁷Asiria chuba, oda Efraim nungi Yihuda pilaba anogo nungi tang tashi marudangba anogotem ne madak, aser ne nübur madak, aser nebur kidong madak, KIBUBAi arudaktsütsü.”

¹⁸“Iba anogo nung ya ataloktsü, oda KIBUBAi Ijip ayong apokdak aliba mangatem, aser Asiria lima nung aliba ninang, jatentsü;

¹⁹aser itemji arutsü, aser item ajak lenten, tarok, lung tapok nung, ai ajak nung, aser süngsem ajak nung arua metemtsü.”

²⁰“Iba anogo nungji Ayong atena or aliba kusünok tamshitsü bena aruba jagi oda Asiria chuba dena, tekolak aser tetsüng ku KIBUBAi südoktsütsü; ano aji agi bangsemoa, meyokadoktsü.”

²¹“Iba anogo nung ya oda alitsü, nisung kati nashi tsüla chanu ka, aser san anana metsütsü;

²²aser mamatzü talubosa aliba yong pa pei chiyungtsü asoshi mamatzülong akatsü. Kechiyong linük nung anünga alir shiai mamatzü aser ninang mojitzü achitsü.”

²³“Aser ya ataloktsü, kechi nungsa tsükmenatzü dong meyirijang nung taribi meyirijang alangba liasü aji yi aketba süngsem aser ayi dong dang alitsü.

²⁴Aser nisungi lijakjang aser lijak bener ajagi arutsü, kechiyong linük ajakji ayi aketba süngsem aser ayi dong lir.

²⁵Ayi aketba süngsem aser ayi dong tsübuba agi koterang agi angensa-a alidak ungsem ajak jagi nai marutsü, saka aji nashi rülen aser san jajatsü asoshi alitsü.”