Read njo ISAIA 9 Bible Online

ISAIA 9 - njo bible

ISAIA 9

¹ Saka temulung shisa amsa-a alirtem asoshi joko tejashi malitsü. Akhidang pai Zebulun aser Naftali limai maksütsü bena arudaktsü, saka tesülenbo, Yordan anüolen kintem aliba linük, Galil Tzüyim temeket, pai sentsüwangshidaktsütsü.

² Ammang nung jajaba nüburtemi tesangwa tulu ka nguogo; shir tammang lima alir, parnok dak tesangwa yaloktsüogo.

³Nai kin rendaktsüogo; nai parnok tepela renlokdaktsüogo; parnok ne madang alurudang pelatepba ama pelateper, temakzükba oset lemsatepdang nisungi pelatepba ama pelateper.

⁴Kechiyong süngra koba parnok khuret liasü aser parnok tapubang nung aliba süng, parnok kibur tazükba ajok, Median anogo nung ama nai raksatsüogo.

⁵Kechiyong rongrongshishiba telok nung nok o nü abenba nisung sobutsü ajak, aser azü mezüba süoshi tarongtsü asoshi aser mi asoshi tatsüktsü alitsü.

⁶Kechiyong asenok nem tanur ka soja lir, asenok nem jabaso ka agüja lir; aser yimsüsüba pa tapubang nung alitsü; aser pa tenüng Tesüngmangtsü, Teshisadanger, Tsüngrem Tashi Tulusang, Teti Tatem Maka Tebu, Yimjung Chuba Chir ta ajatsü.

⁷ Pa yimsüsüba aser yimjung züintsü indang, Dawid Chuba menden nung, aser pa yimli madak, aji yanglutsü aser ochiba aser temeshiba agi aji ajungkettsü asoshi Temeranger Telok KIBUBAi tejangraba agi aji inyaktsü.

⁸KIBUBAi Yakob anema o yok, aser aji Israel dak meküploktsü.

⁹Nisung ajaki, Efraim aser Samaria nung alirtemi aji metettsü, saka parnoki mezümeküma aser temulungjang ulua ashir,

¹⁰“Lungrutem tsükogo, saka onoki lung tangentet agi yanglutsü; mungu süng raksaogo. Saka onoki cedar süng agi melentsü.”

¹¹Anungji KIBUBAi pa anema Rezin temerirtem adokdaktsütsü, aser pa tsükchirtem ajongloktsütsü;

¹²tejaklen Siria nunger aser tesülen Filistia nunger; aser parnoki tebang kar Israel meyoktsü, ya ajak asoshi pa ain aitba meyipa mao, saka pa teka ano mekanga lir.

¹³Aji saka shibai nübur dak azük, pa dangi parnoki memeyip mesüra Temeranger Telok KIBUBA mebushi.

¹⁴Anungji KIBUBAi Israel tekolak aser teben, asang süngsang aser tsütok kenüyongi leptoktsütsü.

¹⁵Tambur aser akhümtsübuba nisungji tekolak lir, tiyazü sayuba ainkarji teben lir.

¹⁶Kechiyong shirnoki anishi parnok mashileni odaktsür, aser shirnok parnoki anishiogo parnok meyokadokogo.

¹⁷Anungji KIBUBAi parnok asangurtem dang mepelatsü, mesüra pai parnok tebu malir aser amitsürtem dak aria mebilemtsü; kechiyong nisung shia menena kümogo aser tamajung inyaker lir, aser tebang shiai tamashi o jembir; ya ajak asoshi pa ain adokba meyipa maor, saka pa teka ano mekanga lir.

¹⁸Kechiyong tamajung mapa mi ama jangrur, aji agi ai aser ayi dong meruksadoker, hau, aji agi arem min tanak nung mi kaodaktsür, aser itemji mokozü mepet temelem temaleni nunga atudaktsür.

¹⁹Temeranger Telok KIBUBA ain aitba ajanga alima rongtokgogo; nisungtema mi asoshi tatsüktsü süng amai lir. Nisung shiai pei adianu anünga meyutsütsü;

²⁰Parnoki tajichi teka manung ajeba arutsü, saka yaseta alitsü, aser pai tabelen teka manung achitsü, saka parnok tipmatemtsü; parnok nisung shiai pei teben shi achitsü.

²¹Manase-i Efraim achitsü; aser Efraimi Manase; aser parnok külemi Yihuda anema alitsü. Ya ajak asoshi pa ain aitba meyipa maor, saka pa teka ano mekanga lir.