Read njo LEVI 1 Bible Online

LEVI 1 - njo bible

LEVI 1

¹KIBUBAi sentep süki nungi Mosa aja, aser ashi,

²“Israel nunger dang shiang, kodang nenoki KIBUBA dangi tenla bendir, nenoki san telok nungi mesüra kiset shiruru tulu nungi tenla agüjang.

³“Shiruru telok rongnungi tenla benra, aji nashi tepung tarak maket temeshi ka asütsüla. Pai aji sentep süki kishi züngdang tenlatsüla. Anungji KIBUBAi pa agizüktsü.

⁴Aji pa temenen pungitsü asoshi agizüktettsüsa, pa tarongba tenla dakji tekolak nung pa ket agi nemettsüla.

⁵Ajiser pai nashi pungchiji tepsettsüla, aser Aron jabasotem; putirtemi azüji KIBUBA dang tenlatsüla.

⁶Aser pai tarongba tenla teküpji asatsüla aser anüka alangsatsü.

⁷Aser Aron jabasotem putirtemi tenladak manung mi apur aji arongtsü.

⁸Shiruru shi tanükji aser tekolak o temo dena mi nungji enoktsüla.

⁹Nisung jagi poknüng aser tetsüngji tzü nung shitoktsüla, aser putiri item ajakji tarongba tenla asoshi tenladak arongtsüla. Iba chiyungtsü tenlaba teronemji KIBUBA madang tajung lir.

¹⁰“Tarongba tenlaji san mesüra nabong telok nungi süra, ibaji tarak maket tepung ka asütsüla.

¹¹Pai aji tenladak septsülen tepsettsüla, aser Aron jabasotem putiri iba azüji tenladak meketa rükloktsütsüla.

¹²Aser pai aji anüka, tekolak aser temo den alangsatsü, aser tenladak manung aliba mi nung tiptema süng manung putiri itemji ayutsü.

¹³Poknüng aser tetsüngji tzü agi shitoktsüla, aser putiri tenladak KIBUBA madang item ajakji arongtsüla. Iba chiyungtsü tenlaba teronemji KIBUBA madak tajung lir.

¹⁴“Pai tarongba tenlaji ozü agi tenlara, ibaji posü mesüra guduru asütsüla.

¹⁵Putiri aji tenladaki bener arua tekongji mesendanger iba kolakji tenladak arongtsüla, aser azüji tenladak tipleni yimdaktsütsüla.

¹⁶Pai tezüng den tejitemji agizüker oa tenladak anüdoklen kong aut endoker idakji endoktsüla.

¹⁷Pai aji tashikang nung amer shimatsü, saka bendanga mesadangtsüla, aser aji tenladak süng manung putiri arongtsü. Iba tarongba tenla teronemji KIBUBA madang tajung lir.