Read njo LEVI 13 Bible Online

LEVI 13 - njo bible

LEVI 13

²“Nisung kar temang teküp kar mesonga mesüra komo adoka ibaji temesüng kümra, aser menatepba tashitak kümra, idangji pa Aron putir dangi anir arutsüla.

³Putiri komoji tendanger, komobang nung kuji mesünga aser tanga shi teküp dang nungi komoji tarokba lira, aji menatepba tashitak zütsüra asütsü. Anungji putiri iba nisungji memerük ta sangdongtsüla.

⁴Saka komoji mesünga liaka iba tereprangtsü teküp dang nungi tarokba mesüra, aser kuji mesünga mekümra, putiri iba nisungji anogo tenetnü balaka ayutsüla.

⁵Anogo tenetnü lir putiri ano pa tendangtsü, aser anogo tenetnü iba nisung balaka ayutsü.

⁶Ano putir jagi anogo tenetnübuba nung pa tendangtsü, aser komoji taneber aser temang tanga nung adoka melira, iba nisung temerük aser komo adokba dang ta sangdongtsüla, aser pa merüka alitsü.

⁷Saka putiri pa merüka lir ta sangdonger külen komoji teküp sünga prokshia lira, pai tanaben putir dangi arua sayutsüla.

⁸Putiri pa tanaben tendanger komoji prokshia lira, aji zütsüra asütsü, aser iba nisungji memerük ta sangdongtsüla.

⁹“Kodang nisung ka dak zütsüra adoka lidir, putir dangi arutsüla,

¹⁰aser putiri pa tendangtsü, aser teküp nung mesünga koma adoka aser ajagi kuji mesünga kümdakja shi tasen adoka lira,

¹¹ibaji manebtettsüba zütsüra lir. Putiri pa memerük ta sangdongtsüla; aser iba nisung balaka nung ayutsü menüngdak, kechiaser pa memerük lir.

¹²Zütsüra jagi nisungba tekolak nungi tetsüng tashi adoka lira,

¹³aser putiri iba nisung temang ajak zütsüra agi sünga adoka lir ta ngura; pai iba nisungji memerük ta sangdongtsüla. Pa teküp ajak temesüng dang kümer lira, pa memerük alitsü.

¹⁴Saka kodangsa pa dak komo tasen adokdir, pa memerük alitsü.

¹⁵Putiri pa tanaben tendangtsü aser pa dak komo tasen temai adoka ngura, pai pa memerük ta sangdongtsüla. Komo tasen adokba tetezü aji zütsüra lir anungji nisungbaji memerük alitsü.

¹⁶Saka kodang komoji anebdir aser teküpji mesünga kümdir, pai putir dangi aotsüla,

¹⁷aser putiri pa tendanger, pa komoji mesünga kümer lira, pa merüka lir, aser putiri pa merüka lir ta sangdongtsü.

¹⁸“Kodang nisung kar tepzünu adoka anebdir,

¹⁹aser tepzünu adokdakji mesünga temesong ka adoka mesüra merembena waka lidir, idangji pai putir dang sayutsüla.

²⁰Putiri pa tendangtsü aser tanga teküp dang nungi tarokba aser kuji temesüng küma lira, idangji putiri pa memerük ta sangdongtsüla. Ibaji zütsüra komo tepzünu nung adokba lir.

²¹Saka putiri pa tendanger, kuji temesüng mekümi aser teküp dang tarokba mesüra, putiri pa tenetnü pa balaka nung ayutsü.

²²Komoji teküp nung prokshia lira, putiri pa memerük ta sangdongtsü, aji zütsüra temaitsü lir.

²³Saka aji memelenshi-i lira aji tepzünu tarak dang alitsü, aser pa temerük ta sangdongtsü.

²⁴“Nisung kar temang nung mi agi arongba komo lira, aser aji mesünga mesüra merembena kümra,

²⁵putiri pa tendangtsü. Mesonga alidak kuji temesüng aser tereprangtsü teküp dang nungi tarokba süra aji zütsüra mi komo nung adokba lir. Anungji putiri pa memerük ta sangdongtsüla.

²⁶Saka temesong nung kuji temesüng masü, aser tereprangtsü teküp dang nungi tarokba mesüi ngura, putiri paji anogo tenetnü balaka ayutsü.

²⁷Anogo tenetnü buba nung putiri pa tendangtsü, aser aji teküp tanga nung adoka lira, aji zütsüra asütsü, aser putiri pa memerük ta sangdongtsü.

²⁸Saka temesongji idakjisa lira, aser teküp nung prokshia melira, aji zütsüra masü. Putiri pa temerük ta sangdongtsü, kechiaser aji mi komo dang lir.

²⁹“Kodang tebur süshia tetsür süshia tekolak nung mesüra teküm nung komo lidir,

³⁰putiri aji reprangtsüla, aser tereprangtsü teküp dang nungi tarokba süra, aser iba kuji tenenya aser tenemnem lira, ibaji anakra komo tekolak mesüra teküm nung adokba zütsüra, anungji putiri nisungbaji memerük ta metetdaktsütsüla.

³¹Putiri iba anakra komo dak repranger tereprangtsü teküp dang nungi tarokba mesüra, aser iba nung ku tanak melira; idangji iba nisungji putiri anogo tenetnü balaka nung ayutsü.

³²Tenetnü buba nung putiri komoji reprangtsü, aser aji prokshia moi lira, aser iba nung ku tenenya melira aser aji tereprangtsü teküp dang nungi tarokba mesüra,

³³idangji komo alidakji yutsür pa kuji sütoktsüla aser ano anogo tenetnü balaka nung ayutsüla.

³⁴Tenetnü buba nung putiri komoji reprangtsü, aser aji prokshia moi lira, aser tereprangtsü teküp dang nungi tarokba mesüra, pa merüka lir ta putiri metetdaktsütsüla. Nisung jagi pei süoshi shitoktsü aser merüka alitsü.

³⁵Saka pa merüka lir ta metetdaktsür külen pokloka ora,

³⁶putiri pa tanaben reprangtsü, aser komoji prokshia lira putiri ku tenenya mebushiaka nisungbaji memerük lir.

³⁷Saka pa nükdang komoji kasa dang lira, aser ku tanak meia lira, komoji anebogo, aser pa merüka lir ta putiri metetdaktsütsüla.

³⁸“Kodang tebur süshia tetsür süshia temang nung teküp temesüng poktetdir,

³⁹putiri pa reprangtsüla. Pa teküp nung pokteta alibaji puyia mesünga lira, aji teküp nung tarak adokba dang, anungji pa temerük lir.

⁴⁰“Kodang tebur ka pa tekolak nungi ku tsütoka lemtsü kümaka pa temerük lir.

⁴¹Pa tenütsü nung ku makai lemtsü kümaka, pa merüka lir.

⁴²Saka ku tsütokdak nungi merembena temesüng temaitsü lira, ajibo zütsüra, aser merembena temesüng adoka lira,

⁴³putiri aji reprangtsü, aser pai aji tekolak mesüra tenütsü nungji merembena mesünga komoji zütsüra ama adoka ngura,

⁴⁴paji memerük ta putiri metetdaktsütsüla.

⁴⁵“Zütsüra aketba nisung jagi süoshi teshisa abentsüla, aser pei kolak memesütsüla, pei tebangmechi nembanger, ‘Memerük, memerük!’ ta ayimtentsüla.

⁴⁶Pa komoji maneb tashi pa memerüki alitsü, aser tanendak nungi pila-a alitsüla.

⁴⁷“Kodang süoshi dak zütsüra keta lidir, sü saka kümpa sü saka,

⁴⁸mesüra shiküp aji tezüng mesüra kümpa sü agi atakba, mesüra shiküp agi yangluba saka,

⁴⁹ibaji nakremtoa mesüra meremtoa lira aji zütsüra komo lir aser putir dang sayutsüla.

⁵⁰Putiri aji reprangdanger osetji anogo tenetnü balaka nung ayutsüla.

⁵¹Anogo tenetnübuba nung pai aji reprangdanger aji prokshia lira, osetji memerük,

⁵²Putiri aji rongtoktsüla, kechiaser aji menatepba zütsüra koba mi agi rongtoktsü tim.

⁵³“Saka putiri aji repranger zütsüraji tanga süoshi dak prokshia melira,

⁵⁴pai ibaji shitokdaktsütsüla aser anogo tenetnü balaka nung ayutsüla.

⁵⁵Komo aketdakji shitoker külen putiri aji reprangtsü, aser sentsü memelenshi mesüra prokshia moi liaka aji memerük; zütsüraji kolen lidir liaka aji mi agi rongtoktsüla.

⁵⁶“Putiri aji reprangdanger komoji mena küma lira, süoshi saka shiküp saka pai aji shizüka endoktsüla.

⁵⁷Ano aji süoshi mesüra shiküp nungji adokra kibur jagi osetji mi nung rongtoktsüla.

⁵⁸Osetji pai shitoker külen komoji samar lira, pai aji tanaben shitoker aji merüka alitsü.”

⁵⁹Ibai süoshi nung aketba zütsüra atema ozüngji lir, oda kümpa sü mesüra tezüng sü, tatakba mesüra temechiba mesüra shiküp agi yangluba; item asoshi merük memerük indang telemtetba agütsütsü asoshi temelaba ozüngji lir.