Read njo LEVI 14 Bible Online

LEVI 14 - njo bible

LEVI 14

² “Zütsüra aketba nisung meshitettsüba anogo nung yamai inyaktsüla; pa anebogo ta asüba anogo nungji putir dangi arutsüla,

³aser putiri pa tanendak nungi anir oa komoji aneb asü maneb aji reprangtsü.

⁴Putiri tenla asoshi temerük ozü ana, cedar süng, lisü temerem, aser esop bener arutsü melatsü.

⁵Idangji putiri ozü rongnungi ka ali po nung tzü temerük alidak manung tepsettsüla,

⁶aser ozü kaji cedar süng, lisü temerem, aser esop den külemi ozü ka tepsetba azü nungji pai metentsü.

⁷Zütsüra nungi shiba meshidoktsür, pa dak azüji tenetben rüklokja pa meshitetogo ta metetdaktsütsü, aser ozü kaji moapu nung taküm chioktsüla.

⁸Nisung jagi pei süoshi shitoka ku ajak sütoktsü aser tzü chigutsüla. Aser pa merüka alitsü pa tanendaki aitsü, saka temalen anogo tenetnü alitsüla.

⁹Tenetnü buba nung pa tekolak, bangsemo, aser nüksemo, aser pa temang ku ajak sütoktsüla.

¹⁰“Tinü buba nung tarak maket san tepung chanu ana aser tsüla ka küm ka tain abentsüla, aser chiyungtsü tenla asoshi amzü tanük totzü den meyokteper jangku asem totzü tatazük marok asem bener arutsüla.

¹¹Putiri nisungba dangji item tenlatemji sentep süki-i bener arutsüla.

¹²Putiri san tepungji ka aser totzü tatazük marok asemji KIBUBA nem tayipshiba tenla asoshi agütsütsü.

¹³Pai sanji temeshidak kong temenen tenla aser tarongba tenla asoshi shiruru tepseter idakji tepsettsü, pai yangji inyaktsüla kechiaser temenen tenla ama tai tenlaji putir meyong, aser ibai temeshi lir.

¹⁴Nisung shiba meshitettsü ali, putiri san züji kar agi pa tajichi tenaronglak nung teka tajichi jemtsüba, aser tetsüng tajichi kemtsüba nung mezütsütsü.

¹⁵Ano putiri totzüji tera pa tekabu tabelen nung shioktsütsüla,

¹⁶pai teka tajichi temeyong ka azü nungji metener KIBUBA madang tenetben rükloktsütsüla.

¹⁷Pai shiba meshitettsü ali tekabu nungi totzü tera san zü tera ta agiteter tajichi tenaronglak, teka tajichi jemtsüba aser tetsüng tajichi jemtsüba nung putiri mezütsütsüla.

¹⁸Tekabu nung anünga aliba totzüji pai nisungba tekolak nung mezütsütsü, aser pa asoshi putiri KIBUBA madang temenen pungitsüla

¹⁹“Iba sülen putiri temenen tenlaji agütsütsü, aser meshitetba mapaji inyaktsü. Aser pai tarongba tenla asoshi shiruruji tepsettsü.

²⁰Aser aji chiyungtsü tenla den tenladak agütsütsü. Yamaji putiri nisungba asoshi meshitetba mapaji inyaktsü aser nisungji merüka alitsü.

²¹“Nisungji sensaker aser pai item ajakji, magütsütetra, pai ayipshiba tenla aser temenen pungitsü asoshi san tepung chanu ka, aser amzü jangku totzü tatakzük marok asem den meyokteper bener arutsüla.

²²Pai ano posü ana, mesüra guduru ana, ka temenen tenla asoshi, aser ka tarongba tenla asoshi bener arutsüla.

²³Tinübuba nung KIBUBA madang sentep süki kiküm nung pa meshitettsü asoshi itemji putir dangi bener arutsüla.

²⁴Putiri tai tenla asoshi san chanu, aser totzü agütsür, aser aji KIBUBA dang tayipshiba tenla asoshi agütsütsü.

²⁵Pai san chanuji tepseta iba züji kar agia nisungba tajichi tenaronglak, teka tajichi jemtsüba, aser tetsüng kemtsüba nung mezütsütsü.

²⁶Putiri totzüji pa tabelen nung tera shiloktsütsü,

²⁷aser pa teka tajichi temeyong ka agi aji KIBUBA madang tenetben rükloktsütsü.

²⁸Putiri nisungba teka nungi totzü den ozüngji pa tajichi len tenaronglak, teka tajichi jemtsüba, aser tetsüng tajichilen kemtsüba nung mezütsütsü.

²⁹Pa tekabu nung anünga aliba totzüji nisungba tekolak nung mezütsütsü, aser pai yangji temenen pungiba mapaji inyaktsü.

³⁰Iba sülen pai posü mesüra guduru ana tenlatsü,

³¹ka temenen tenla asoshi, aser ka chiyungtsü tenla den külemi tarongba tenla agütsütsü. Yamaji putir jagi temenen pungiba mapaji inyaktsüla.

³²Ibai zütsüra adoker shirnoki pei meshitetba atema tenla ajak magütsüdir, parnok asoshi ozüng lir.”

³³KIBUBAi Mosa aser Aron dang ashi,

³⁴“Kodang ni nenok nem agütsüba Kanan limai nenok arua lidir, aser iba lima nungji ki ka nung ni zütsüra adokdaktsüdir,

³⁵ki KIBUBA jagi putir dangi oa, ozü dak zütsüra lir ama ni angu ta ashitsüla.

³⁶Kidang aliba ajak memerüki kümalir ta putiri komoji reprangi maidang, parnoki kiji azüngtettsütsü pai ozüng agütsütsüla. Iba sülenang pa ki jagi aotsüla,

³⁷aser zütsüraji reprangtsü. Iba tereprangtsü nakrema mesüra meremtoa jara nungi ngura,

³⁸pai kiji toktsütsü aser anogo tenet shibangtsü.

³⁹Tenetnübuba nung pai tanaben arua reprangtsü, zütsüraji ki jara nung pokloka lira,

⁴⁰lung koba nung putiri zütsüraji angur aji tanendak yimti tezülen memerükba tesem ka nung enoktsü ozüng agütsütsüla.

⁴¹Iba sülen pai ki telunglen okshia shitoktsüla aser parnoki lung menatepba kiji yimti amunglen memerükba tesem ka nung endoktsüla.

⁴²Lung koba pai endok aji melena tanga lungtem agia aji ali tasen agi yangji menateptsüla.

⁴³“Lungji melener külen aser kiji aishia shitoka ali mezür külen, ano komoji adokra,

⁴⁴putiri oa aji reprangtsü, aser komoji adoka lira kiji memerük.

⁴⁵Kiji bensar iba lung, süng aser temenatepba item ajakji yimti nungi pila-a memerükdak tesem kati bener aotsüla.

⁴⁶Kiji shibanga alidang kari ajagi yira, aonung tashi memerüki alitsü.

⁴⁷Kari idakji amdakra mesüra chiyungra pai pei süoshi shitoktsüla.

⁴⁸“Ki dakji ali mezür külen putir arua reprangdang komoji kidang pokloka moi lira, idangji putiri kiji merüka lir ta metetdaktsütsü, kechiaser tashitakji junga anebogo.

⁴⁹Ki meshitettsü asoshi ozü ana cedar süng, lisü temerem aser esop abentsüla.

⁵⁰Pai ozüji ka alipo ka nung tzü temerük lir, iba manung tepsettsüla.

⁵¹Aser pai cedar süng, esop, lisü temerem aser ozü takümji tzü temerük manung tepsetba ozü zü nungji metentsü aser ki dakji tenetben rükloktsütsü.

⁵²Yamaji pai ozü zü, tzü temerük, ozü taküm, cedar süng, esop aser lisü temerem jagi kiji meshitettsüla.

⁵³Iba sülen ozü takümji pai yimti tezülen moapu nung taküm chiyoktsüla, aji oda pai ki meshitettsüla.”

⁵⁴Ibai zütsüra tapu ajak asoshi, aser anakra asoshi ozüng lir.

⁵⁵Süoshi nung mesüra ki dak aliba zütsüra,

⁵⁶shi nung komo adokba, mesüra teküp nung sentsü temesüng adokba,

⁵⁷kodang memerüki, mesüra kodang merüka lir, item ajak indang ozüng lir.