Read njo LEVI 16 Bible Online

LEVI 16 - njo bible

LEVI 16

¹Aron jabaso ana, parnoki memeshiba tenla KIBUBA nem agütsüba yong parnok sür külen KIBUBAi Mosa den jembi.

² Pai ashi, “Pa masütsü asoshi Temeshiba taktang kong Tezüngzüktepba süngden yua lir, iba taochi jakdang mapang tatong nung yiang ta Aron dang shiang, kechiaser taochi menden manung ni mepet nung adoktsü, pai aji mangara pa tepsettsü.

³ Pai Temeshitiba taktang jagi nashi pungchi chanu ka temenen tenla asoshi benerang aitsü akok.”

⁴Idangji KIBUBAi item mela-a ashi, “Aron Temeshitiba taktangi maidang, pa tzü chigutsüla aser pai putir sobutsü: kümpa sü aser semoktsü, teperem naiba aser kolakjen naiba, itemji sobutsüla.

⁵“Israel nungertem telok nungi nabong tepong ana temenen tenla asoshi aser tarongba tenla asoshi san tepong ka agitsü.

⁶Aroni temenen tenla nashi pungchi tepung ka tenlatsüla, aji pa aser par kibong temenen pungitsü asoshi inyaktsüla.

⁷Iba sülen pai nabong tepong anaji sentep süki kiküm nung KIBUBA madang ayutsü.

⁸Idakji pai nabong ana madakji ka KIBUBA asoshi aser ka Azazel asoshi ta zülur an toktangtsü.

⁹Nabong koba dak KIBUBA asoshi an toktangba kao, aji temenen tenla agütsütsü.

¹⁰Nabong ka koba Azazel asoshi shimtet aji taküm dang KIBUBA nem agütsütsü, aser nisungtem temenen pungitsü asoshi ibaji Azazel lisem lima nung chioktsü.

¹¹“Kodang Aroni pa aser par kibong temenen tenla asoshi nashi pungchi tenladir, pungitsü asoshi pai nashi pungchiji tepsettsü,

¹²pai mijang agi sünga aliba susa ka aser teronem tanang menemba tekabu ana sünga, aji bener temeshiba taktangi arutsüla.

¹³Idangji KIBUBA madang mi nung teronem menembaji arongtsü aser iba mokozü jagi Tezüngzüktepba süngtenji aser taochi mendenji nembangtsü, aser pa masütsü.

¹⁴Pai nashi pungchi züji agitsü aser pa temeyong agi taochi menden manung rükloktsütsü, aser azü kar tezüngzüktepba süngden jakdang tenetben rükloktsütsü.

¹⁵ “Iba sülen nisungtem temenen tenla asoshi nabongji tepsettsü, aser iba züji Temeshitiba Taktangi bener arua taochi menden tezüngzüktepba süngden jakdang rükloktsütsü, oda pai nashi pungchi zü rükloktsüba ama.

¹⁶Yamaji pai temeshiba taktangji Israel nungertem memerükba aser parnok temenen nungi meshitettsü, sentep süki asoshia pai kasaji inyaktsüla, kechiaser ibai tanendak tiyong nung koba memerükdak lir.

¹⁷Kodang Aroni Temeshitiba Taktangi yia pa, par kibong aser Israel nunger ajak asoshi yir adokdang nisung shinga süki nungji malitsüla.

¹⁸Iba sülen pai tenladaki oa pa meshitettsü asoshi tarongba tenla agütsütsü, pai nashi pungchi zü tera aser nabong zü tera bener arua tenladak tezülen meketa rükloktsütsü.

¹⁹Pa temeyong agi azüji tera tenladak tenetben rükloktsütsü. Yamaji pai Israel chirtem temenen nungi aji merüktettsü aser aji meshiteta akümtsü.

²⁰“Kodang Temeshitiba taktang, sentep süki, aser tenladakji meshitetdir, Aroni nabong takümji KIBUBA nem agütsütsü.

²¹Pai pa teka agi nabong kolak nungji ataloka yur, Israel nungeri menaba tai ajak, parnok temenen, aser ozüng raksaba nangzüktsüla, aji oda nabong kolak dak aji melenoktsütsü. Iba asoshi shimtetba nisung nem nabongji agüja aji aremi anir oa chioktsüla.

²²Parnok temenen ajak nabong jagi bener azüngmeyakdak lisem lima ka nung aji chioktsü.

²³ “Idangji Aroni sentep süki jagi aotsü aser Temeshitiba Taktangi maidang sobuba putir sobutsüji sepzüka idakji yutsütsü.

²⁴Pai temeshidak tesem ka nung tzü chigutsü aser pai süoshi sobutsüla. Iba sülen pai adoka pei temenen aser nüburtem temenen pungitsü asoshi tarongba tenla agütsütsü.

²⁵Temenen tenlatemji pai tenladak sabang manung arongtsüla.

²⁶Nisung shibai Azazel asoshi lisem lima nung nabongji chiok, tanendaki meyipa meshilangdang pei süoshi shitoktsüla.

²⁷ Temenen tenla asoshi agütsüba nashi pungchi aser nabong zü koba temenen pungitsü asoshi, Temeshitiba Taktang jagi bener aru, aji tanendak tezülen teküp, shi, aser poknüng den külemi arongtsüla.

²⁸Nisung shibai itemji aronger, pai pei süoshi shitoktsü aser tanendaki maidang tzü chigutsüla.

²⁹ “Ibai nenok asoshi teti yimsü ka alitsü: Ita tenetbuba anogo terbuba nung sensopur süshia bendanger amungi arur süshia mapa kecha meinyaki lumitsüla.

³⁰Kechiaser iba anogo nungji nenok meshitettsü, aser nenok menen pungitsü, idangjiang nenok temenen nungi merükteta alitsü.

³¹Ibai nenok asoshi temeshi amungnü koba nung nenoki lumir aser mapa kecha meinyaktsüla. Ibai nenok asoshi teti atema yimsü ka alitsü.

³²Putir shiba tebu melena temaba putir asütsü asoshi bendanga agüja shimtetdir, pai pei temenen pungitsüla, aser putir sobutsü sobur

³³Temeshitiba taktang sentep süki, tenladak sabang, putir, aser nübur telok ajonga asoshi menen pungi inyaktsü.

³⁴Ibai nenok asoshi teti atema yimsü ka amai alitsü, Iba mapa ya nenok küm nung khen alitsü, oda Israel nungertem ajonga atema temenen pungitsü inyaktsüla.” Anungji KIBUBAi ashiba ama Mosai inyak.