Read njo LEVI 9 Bible Online

LEVI 9 - njo bible

LEVI 9

¹Anogo tinübuba nung Mosai Aron aser par jabasotem aser Israel tamburtem aja.

²Pai Aron dang ashi, “Tarak maket nashi pungchi chanu ka temenen tenla asoshi, aser san tepung ka tarongba tenla asoshi KIBUBA nem agüjang.

³Aser Israel nungertem dang shiang, nenoki temenen tenla asoshi nabong tepung ka agiang, tarak maket nashi chanu ka aser san ka küm ka ka tain tarongba tenla asoshi agiang,

⁴aser nashi pungchi ka aser san tepung ka telungjem tenla asoshi agiang. Itemji chiyungtsü tenla den meyokteper KIBUBA nem tenla asoshi agüjang. Parnoki yamaji inyaktsüla, kechiaser tanü parnok dang KIBUBA jungkai adoktsü.”

⁵Mosai ashiba ama parnoki sentep süki-i item ajak bener aru aser telok ajak KIBUBA külemtsü sentep.

⁶Mosai ashi, “Ibai nenoki inyaktsü KIBUBAi melabaji lir, anungji pa sentsüwangshi nenok dangi jungkai adoktsü.”

⁷ Idangji pai Aron dang ashi, “Tenladaki oa temenen tenla aser tarongba tenlaji ne menen aser nüburtem menen pungitsü asoshi agüjang. KIBUBAi melaba amato nüburtem temenen pungitsü asoshi iba tenla ya agüjang.”

⁸Aroni tenladaki arua pa asoshi temenen tenla nashi pungchi chanuji tepset.

⁹Pa jabasotem pa dangi azüji bener aru, aser pai azü nungji pa temeyong metener kar tenladak tezü nung rükloktsü, aser tanüngbaji tenladak züngdang shiloktsü.

¹⁰Idangji Mosa dang ashiba amato pai tenladak temo, tezüngjang, aser temesen shilem tajungdak, itemji arong.

¹¹Saka shi aser teküpji pai tanendak kimalen arong.

¹²Aser pa asoshi tarongba tenlaji pai tepset, aser pa jabasotemi pa dangi azüji bener aru, aser pai aji tanendak meketa rükloktsü.

¹³Parnoki ano pa nem shiruru tekolak aser temang shiji agüja pai aji tenladak arong.

¹⁴Iba sülen pai poknüng aser tetsüngji shitoka, tenladak tematiba manung arong.

¹⁵Iba sülen pai nüburtem tenlaji agütsü. Nüburtem temenen tenla asoshi nabongji tepseta, pa temenen tenla asoshi agütsüba ama ibaji agütsü.

¹⁶Pai ano tarongba tenla asoshi shiruruji bena arua ozüng nung aliba ama tenla.

¹⁷Pai chiyungtsü tenlaji agütsü, aser amzü tekabu ka agia tenladak arung. Aji anogo shia tarongba tenla agütsüba dak alia liasü.

¹⁸ Nashi pungchi aser san tepungji pai tepseta nüburtem asoshi telungjem tenla agütsü. Aser pa jabasotemi pa dangi azüji bener aru aser pai aji tenladak meketa rükloktsü.

¹⁹Saka nashi pungchi temo, aser san tepung temo poknüng, teben temo, poknüng meyiba, temesen shilem tajungdak, tezüngjang meyiba,

²⁰itemji parnoki mamalong den yutsü, aser temoji tenladak arong.

²¹Aser mamalong den tepi tajichiji KIBUBA dangi tenla palaka ama putir nem agütsütsü KIBUBAi Mosa dang mela.

²² Kodang Aroni tenla agütsüba ajak renem, pai nübur tsütsü teka mekanga parnok moatsü aser pa alu.

²³Mosa aser Aron sentep süki-i KIBUBA dangi ao, aser kodang parnok adok, parnoki nüburtemji moatsü, aser KIBUBA sentsüwangshi nüburtem madak adok.

²⁴Aser KIBUBA madang nungi mi adoka tarongba tenla aser temoji meyokadok. Kodang nüburtemi aji angu, parnoki ayimten aser parnok tejak ali nung apudak.