Read njo YERIMIA 1 Bible Online

YERIMIA 1 - njo bible

YERIMIA 1

¹Benjamin lima, Anathot nung putir rongnung Hilkia chir Yerimia otem;

² shiba dangi Yihuda chuba, Amon chir Yosia, chubaba küm terasembuba nung, pa tendak KIBUBA o aru.

³ Ano Yihuda chuba Yosia chir Yehoiakim tendak, Yihuda chuba Yosia chir Zedekia küm terkabuba tatem tashi; ita pungububa nung Yirusalem tepuokdaki anir aoba tashi ibaji aru.

⁴Tang KIBUBA O kü dangi jembia aru,

⁵“Ni na nu menden nung meyangludang na meteta liasü, aser na masodang yongi ni na meshiteta yutsü; kintem dangi ainkar ka asütsü ni na shimtet.”

⁶Idangji ni ashi, “Ah, KIBUBA Tsüngrem! Ajiang, koda jembitsü ni makok; kechiyong ni tanur ka dang.”

⁷Saka KIBUBAi kü dang ashi, “Ni tanur ka dang ta teshi; kechiyong ni shir dangi na yokdir na aotsüla, aser kechisa ni ne dang meladir nai jembitsüla.

⁸Parnok tetsübu, kechiyong na kümzüktsü ni ne den lir,” ta KIBUBAi ashi.

⁹Idangji KIBUBAi pa teka songtok, aser kü bang nung kongshi; aser KIBUBAi kü dang ashi, “Ajiang, ni kü otem ne bang nung enoktsüogo;

¹⁰reprangang, tanü kintem madak aser yimlitem madak, atsütettsü aser raksatsü, samatsütsü aser meküptoktsü, yanglutsü aser atemtsü ni na yutsür.”

¹¹Ano KIBUBA O kü dangi jembia aru, “Yerimia, nai kechi angur?” Aser ni ashi, “Ni almond süngdong mechi ka angur.”

¹²Idangji KIBUBAi kü dang ashi, “Nai junga nguogo, kechiyong jembiba inyaktsü asoshi ni kü o züngzünga repranger.”

¹³Tanaben KIBUBA O kü dangi jembia aru, “Nai kechi angur?” Aser ni ashi, “Jaa atuya aliba po tulu ka ni angur, aser iba tejakji anüolentip nungi lir.”

¹⁴Idangji KIBUBAi kü dang ashi, “Anüdoklentip nungi linük nung alir ajak madak tamajung ataloktsü.

¹⁵Kechiyong angang, anüdoklentip yimli ajak ni jatentsü ta KIBUBAi ashir; aser parnok arutsü, aser meketa aliba jara ajak anema, aser Yihuda yimti ajak anema Yirusalem süngkhümi aitdak pei chuba menden yanglutsü.

¹⁶Parnok majungba indang ni parnok anema obendang ashitsü; kechiyong parnoki ni senzüka toktsü, aser tangar tsüngremtem dang liangmesen arong, aser parnoki pei teka mapatem külem.

¹⁷Saka na! Nangri kangang, aser aramesoang, aser parnok dang ni ne dang melaba ajak jembiang; parnok ngua taoksa, angji ni na parnok madang maoksadaktsütsü.

¹⁸Kechiyong ajiang, ni na tanü linük ajonga anema, Yihuda chubatem anema, iba tongtipur anema, iba putirtem anema, aser linük nübur anema noktanga aliba yimti ka, aser merang tongshi ka, aser yongmenyin jara kümdaktsüogo.

¹⁹Aser parnoki na anema raratsü, saka na anema parnoki makoktsü, kechiyong ni ne den na kümzüktsü asoshi lir,” ta KIBUBAi ashir.