Read njo YERIMIA 10 Bible Online

YERIMIA 10 - njo bible

YERIMIA 10

¹Oh Israel kidong, KIBUBAi nenok dang jembiba oji angang.

²KIBUBAi yamai ashir, “Kintem lenmang tangazük mesüra anüng temaitsü agi taoksa kechiaser kintem item jagi aoksar.

³Kechiyong nisungtem yimsü tiyazü lir. Arem nungi süngdong ka lensüker, aser süng mistri teka aser pu agi inyak.

⁴Nisungtemi aji taribi aser hon agi sobutsür; aji marakzüdaktsütsü asoshi parnoki haduri aser kojal agi angener.

⁵Parnok süngyanglutemji züngi lu nung nisung tanela noksa yangluba mesüka lir, parnoki jembitsü makok; parnoki tebenshiang benshitsüsa lir, kechiyong parnoki jajatsü makok. Parnok tetsübu, kechiyong parnoki tamajung inyaktsü makok, mesüra tajung inyaktsüa parnok dak mali.”

⁶Oh KIBUBA, na mesüka shinga mali, na tulu lir aser ne tenüng nung tashi tulu lir.

⁷ Oh kintem chuba shibai na metsübutsü? Kechiyong aji na asoshi tim lir; kechiaser kintem shisa akar rongnung aser parnok yimli ajak nung na mesük shinga mali.

⁸Parnok khenyongi tamachi aser tamashi lir, süngyanglutem tesayubaji süng dang lir.

⁹Taribi ausu atsüngba Tarshis nungi bener arua lir, aser Efaz nungi hon. Itemji süng mistri mapa aser hon atsünger teka nungi lir; parnok süoshi anüng sentsü aser nakrema meremba, parnok ajak mongyin nisung mapa lir.

¹⁰Saka KIBUBAji atangji Tsüngrem lir, pa taküm aliba Tsüngrem aser teti aliba chuba. Pa ain adokba menoknok anokba amai aser kintemi pa mit metizüker.

¹¹Nai yamai parnok dang shiang; tsüngremtem shirnoki anüng aser alima meyanglu alima nungi aser anüng kübok nungi samatsü.

¹²Shibai alima pei tashi agi yanglu aji pa lir, shibai pei shisatsü agi alima yanger, aser pa tangatetba agi anüngtemji mesang.

¹³Kodang pai pa ola adokdir anüng nung tzütem rongrongshishi lir, aser alima tatem nungi pai tzüsü lunga adokdaktsür. Tzünglu asoshi pai tsüngpret adokdaktsür aser pa jendang nungi pai mopung adokdaktsür.

¹⁴Nisung shia tamachi aser shisa maka, hon atsünger shia pei süngyanglu agi maksüdaktsür; kechiaser pa süngyangluji tiyazü, aser item dak tangula mali.

¹⁵Parnok tagidak maka, aibelen mapa lir, parnok merenshi dang parnok samatsü.

¹⁶Shiba Yakob shilem lir pabo itemi memesük, kechiyong ajak yanglusangji pa lir, aser Israelji pa senmang kin lir, pa tenüng Temeranger KIBUBA lir.

¹⁷Oh na shiba meketbanga lir, ne sülep ali nungi bendenang.

¹⁸Kechiyong KIBUBAi yamai ashir, “Ajiang, iba mapang linük nüburtem ni endokadoktsü, aser parnoki metettsüsa ni parnok dangi timtem tejashi arudaktsütsü.”

¹⁹Ni yiruba yong ni aiatai! Kü zübu ulura. Saka ni ashi, “Atangji ya kü timtem aser ni aji abentsüla.”

²⁰Kü süki raksaogo, aser kü lisü ajak raktangogo; kü chirtem kü dang nungi ogo, aser parnok mali; tanaben kü süki salatsü, aser kü teyindangba ayutsü shinga mali.

²¹Kechiyong sannükertem tamachi lir aser KIBUBA dang parnoki masüngdanger, aji asünung mazükmarur, aser parnok san telok ajak jenshiogo.

²²Angang, olulu kar arur! Yihuda yimtitem azüngmeyakdak shirong amungdak kümdaktsütsü anüdoklentip lima nungi kanga pusateper.

²³Ni metet, Oh KIBUBA, nisung lenmang pei dak mali, oda shibai jajar pei sasa tuyutsüsa ajibo nisung dak mali.

²⁴Ni metongshijang, Oh KIBUBA, saka timi dang sang; nai ni amajok kümdakja lir, na ain adokabo nungma.

²⁵Na memetetba kintem madak, aser ne tenüng nung majaba nübur madak ne terasaba meküplokjangma, kechiyong Yakob meyokogo; parnoki pa meyok aser pa samatsüogo, aser pa alidak raksa-a yutsüogo.