Read njo YERIMIA 11 Bible Online

YERIMIA 11 - njo bible

YERIMIA 11

¹KIBUBA nungi Yerimia dangi o aruba.

²Iba tezüngzüktepba otem angang, aser Yihuda nunger aser Yirusalem alir dang jembiang.

³Parnok dang nai shiang; KIBUBA Israel Tsüngremi yamai ashir, “Iba tezüngzüktepba otem shibai manga pa atakatem sang.

⁴Koba ni nenok tsürabur dang ni parnok Ijip lima merang misem nungi anitetdang mela, aser ashi, kü ola angang, aser ni nenok dang melaba ajak inyakang. Yamaji nenok kü nübur asütsü, aser ni ner Tsüngrem alitsü.

⁵Angji tanü ama ni nenok tsürabur dang parnok nem mamatzü aser ninang mojitzü yima aliba lima agütsütsü nangzükba ni inyaktsütsü.” Idangji ni langzü, “Yamaji sangma, KIBUBA.”

⁶KIBUBAi kü dang ashi, “Yihuda yimti ajak nung aser Yirusalem yimdong nung item o ajak sangdongang. Item tezüngzüktepba otem angang aser itemji inyakang.

⁷Kechiyong nenok tsüraburtem ni Ijip lima nungi anitetdang parnok dang tekümdangtsü agüja oda tanü tashi, Kü ola angang ta shia tekümdangtsü agütsü.

⁸Aji saka parnoki manga aser parnok tenarong maten saka nisung shiai pei menen mulungjang temerang agi jaja. Anungji ni iba tezüngzüktepba o ajak parnok madak bener aru, koba ni parnok dang inyaktsü mela, saka parnoki meinyak.”

⁹Ano KIBUBAi kü dang ashi, “Yihuda nunger rongnung aser Yirusalem alir rongnung tamajung tasa ka lir.

¹⁰Parnoki par tsürabur shirnoki kü o angatsü magizük parnok tai leni meyipa ogo, tangar tsüngremtem dangi parnok tenzüktsü parnok ogo. Israel kidong aser Yihuda kidongi parnok tsürabur den yangluba kü tezüngzüktepba raksaogo.”

¹¹Anungji, KIBUBAi yamai ashir, “Ajiang, parnoki mejenbutettsü parnok dangi ni tamajung bener arudagi; parnoki kü dang ayimtenaka, ni parnok dang mangatsü.”

¹²Idangji Yihuda yimtitem aser Yirusalem alirtemi pa tsüngremtem dang parnoki tarongba tenlaba agüja ayimtentsü, saka parnok timtem mapang nung parnoki parnok mekümzüktsü.

¹³Kechiyong Oh Yihuda, nenok tsüngremtem nenok yimtitem kwi paikaji lir, aser Baal dang liangmesen arongtsü tenladak. Yirusalem yimdong kwi paikaji nenok maksütsü tenladak nenoki yanglua lir.

¹⁴Anungji iba nübur asoshi sarasadem tesü mesüra parnok atema ayimtenba mesüra sarasadem teli, kechiaser parnok timtem mapang nung parnoki ni ajadang ni mangatsü.

¹⁵Kü meimlai mapa tamajung inyak nungji, la kü kidang alitsü kechi tim ali? Azüngashiba aser tenlaba shi agi nenok tesamatsü tia endoktetdi ma? Idangji nenoki pelateptettsü asü?

¹⁶Anungji ne dang oliv süngdong tajem, tobur tajung süngjang tajung atangba ta aja; saka yipru mopung ola tulu agi arua pai iba dak mi senoktsütsü, aser iba kongsangtemji meyoktsü.

¹⁷Temeranger KIBUBA shibai pa atema pai pa anema tamajung kazükogo, kechiaser ni ain adokdakja Israel kidong aser Yihuda kidongi tamajung inyakogo.

¹⁸KIBUBAi ya kü dang metetdaktsü aser ni metet, idangji nai parnok temenen mapa kü dang sayu.

¹⁹Saka ni ajemalu san chanu tetepsetdaki anir aoba mesüka liasü. Parnoki ni anema tasa asa ta ni memeteti ali, kechiaser parnoki ashi, “Asenoki süngjang dena süngdongji samatsüdi, akümlir lima nungi asenoki pa leptokadokdi, angji pa tenüng joko mebilemtettsü.”

²⁰Saka Temeranger Telok KIBUBA, shibai ochishia o bendanger, shibai temulungjang aser tebilemba tendanger parnok madak ne mangyangba ni ngudakjangma, kechiyong kü indangbo ni ne nem agütsüogo.

²¹Anungji KIBUBAi Anathot nunger indang yamai ashir, “Shirnoki ne taküm bushir aser ashir, KIBUBA tenüng nung teshin, mesüra na onok ket nung asütsü.”

²²Anungji Temeranger KIBUBAi ashir, “Ajiang, ni parnok merenshitsü, asangurtem nok agi asütsü; parnok jabaso aser jalatem ayawara agi asütsü;

²³aser shinga anünga malitsü, kechiaser parnok merenshiba küm nung, ni Anathot nunger madak tamajung bener arutsütsü.”