Read njo YERIMIA 12 Bible Online

YERIMIA 12 - njo bible

YERIMIA 12

¹Oh KIBUBA, ni jashia ne dak atongdang, nabo shitak dang lir, aji saka kü o ne madang ni ashishir. Kechiba tamajunger lenmang azükarur? Kechiba külakkübonger ajak junga alir?

²Nai parnok atem, aser parnok tera ayanger, parnok meir aser tejang atanger, parnok tebang anasa na lir saka parnok mulung nungbo na nungi talang nung lir.

³Saka Oh KIBUBA, nai ni metet, nai ni angur aser ne tsütsülen kü mulung tendanger. Tetepsettsü asoshi santem ama nai parnok atsütetang, aser tetepsettsü anogo asoshi parnok bendanga yuang.

⁴Kopiga linüki mang ayimtsü, aser moapu ai ajonga azülatsü? Iba nung shirnok alir parnok majungba asoshi shirurutem aser ozütem remdaktsür, kechiaser nisungtemi ashi, “Onok dak kechi ataloker aji pai mangutsü.”

⁵Nai nisungtem den tetsüng agi asemtepa, parnoki na aniseta kümdaktsüra, ajangla nai kor den koda tokteptsü? Aser lendong malidak ali nung na alangra, ajangla Yordan arem temelem nungbo koda asütsü?

⁶Kechiyong oda ne adianutem aser nübur kibongi ne dang ashikülaka benshi; oda parnoki ne sülen ayimtener, o tajung parnoki jembiaka parnok dang tamang.

⁷Ni kü kidong senzüka yutsüogo, ni kü senmang toktsüogo; kü nelai meimla ni la tsükchirtem ket nung agütsüogo.

⁸Ni asoshi kü meyong senmangji arem nung molusongzü ama lir, lai ni anema ola adokogo; anungji ni la sempar.

⁹Kü senmangji kü madang tsükrapusa ozü tetepsetla mesük asü? La anema tetepsetla ozütem meketa ali asü? Oang, arem shiruru ajak adenshia, chidaktsütsü parnok anitenang.

¹⁰Sannüker aikati kü tsükmenatzü tsüki raksatsüogo, parnoki kü shilem ajemsatsüogo, parnoki kü shilem tajung arem azüngmeyak kümdaktsüogo.

¹¹Parnoki aji azüngmeyakdak kümtsüogo; azüngmeyakdak asünung, kü dang mang ayimer. Linük ajonga azüngmeyak küma lir, saka nisung shingaia temulung magütsür.

¹²Lisem lima ajak nung teraksatsürtem arua lir, kechiyong KIBUBA nok agi linük külen tatem nungi külen tatem tashi meyokadoker; shi kecha tesünep mali.

¹³Parnoki wheat tsük prok aser aitem aru; parnok pei sasa belemset saka kecha majangzük. KIBUBA tetsübutsü ain adokba yong parnok alu aruba indang akseta alitsü.

¹⁴Kü nübur Israel nem amangtsü agütsüba senmang koba dak tamajung kiyonger ajaki kongshir parnok indang KIBUBAi yamai ashir, “Ajiang, ni parnok pei lima nungi atsüdoktsü, aser parnok rongnungi ni Yihuda kidong atsüdoktsü.

¹⁵Aser ni parnok atsüdoker külen, ni ano parnok dang aochitsü, aser parnok shia pei senmangi aser nisung shia pei limai tanaben anir arutsü.

¹⁶Aser ya oda ataloktsü parnoki kü nübur lenmang anebalua angazüka, kü tenüng agi ‘KIBUBA taküm lirji ta azüngashira, oda parnoki kü nübur dang Baal agi azüngashitsü sayuba ama, idangji kü nübur rongnung parnok yanglutsütsü.

¹⁷Saka kin kari mangara idangji ni aji khenyongi atsüdoktsü aser aji samatsütsü” ta KIBUBAi ashir.