Read njo YERIMIA 13 Bible Online

YERIMIA 13 - njo bible

YERIMIA 13

¹KIBUBAi yamai kü dang ashi, “Oang aser kümpa sü ka aliang, aser aji ne teperem nung naiang saka aji tzü nung temeten.”

²Anungji KIBUBA O ama ni teperem sü ka ali, aser aji kü teperem nung nai.

³KIBUBA O tanaben kü dangi aru.

⁴“Nai aliba teperem sü koba ne teperem nung lir aji benang, aser aramesoang. Eufrata-i oang, aser yangji lungpok nung aji miimang.”

⁵Anungji ni ao, aser KIBUBAi kü dang melaba ama, aji Eufrata tzüküm nung miima ayu.

⁶Aser anogo aika lir KIBUBAi kü dang ashi, “Aramesoang, Eufrata-i oang, aser ni ne dang yangji teperem sü koba ni miimang ta ne dang mela, aji idak nungjagi bena arung.”

⁷Idangji ni Eufratai ao, aser atu, aser teperem süji ni miima ayudak nungi agitet, aser ajiang, teperem süji raksar aji kecha sütsüa majung liasü.

⁸Idangji KIBUBA O kü dangi aru,

⁹KIBUBAi yamai ashir, “Yamaji oda ni Yihuda asüküm aser Yirusalem asüküm tulu raksatsütsü.

¹⁰Item tamajung nübur, shirnoki kü o mangali asür, shirnoki tekong meranga pei mulungjang sülen anidaker aser tangar tsüngremtem sülen parnok tenzüktsü aser külemtsü oa ali, iba teperem sü ama alitsü, koba kecha sütsü majung lir.

¹¹Kechiyong teperem sü nisung teperem nung menaloka aliba ama, yamaji ni Israel kidong ajonga aser Yihuda kidong ajonga kü dak azüitdaktsü” ta KIBUBAi ashir. “Yangji ni asoshi nübur ka, tenüng ka, tenüngsang ka, aser sentsüwangshi ka asütsüsa, saka parnoki mangali asür.”

¹²Nai parnok dang iba o jembiang. KIBUBA Israel Tsüngremi yamai ashir, “Mori shia yi agi asüngtsü, aser parnoki ne dang ashitsü, mori shia yi agi asüngtsü ta atangji onoki memetet no?”

¹³Idangji nai parnok dang shiang, KIBUBAi yamai ashir; “Ajiang, iba lima alir ajak ni temesepba agi süngdaktsütsü. Dawid menden nung amenba chubatem, putirtem, ainkartem, aser Yirusalem alir ajak.

¹⁴Aser kati ka dak anema tebutem aser techirtem külemi, ni parnok jerepdaktsütsü” ta KIBUBAi ashir. “Ni parnok samatsütsü, ni aochia, apayua mesüra aria mebilemtsü.”

¹⁵Angang aser tenarong tenang, asü teküm, kechiyong KIBUBAi jembiogo.

¹⁶KIBUBA nenok Tsüngrem nem sentsüwangshi agüjang, mesüra pai ammang bener arutsü, mangsem rürüa tenemtem manung nenok metsüdaktsü, aser nenoki sangwa bushidang pai aji mangsema kümdakja teptepa tammang kümdaktsütsü.

¹⁷Saka nenoki mangali süra kü nela nenok asüküm asoshi miima ajebtsü; kü nüki kanga ajebtsü aser nüktzü yima alutsü, kechiaser KIBUBAr san telok pur oa lir.

¹⁸Chuba aser chubatsür tetsü dang shiang, “Tekübok menden agiang, kechiaser ne tobur tajung chuba korang ne kolak nungi aluadokogo.”

¹⁹Anüolentip yimtitem shibanga lir, item lapoktsü shinga mali. Yihuda ajak pur ogo, oda ajonga pur ogo.

²⁰Nenok tenük rangketa yokang aser anüdoklentip nungi arurtem ajiang. Nenok nem agütsüba, ne tobur tajung san telok kong ali?

²¹Nai ne sasa ne dang tembar asütsü shirnok dang sayu, parnoki ne madak temaba asütsü toktsüra nai kechi shila? Tetsür nuso ashitsü agi kangshi ama ne dak timtem maruli ma?

²²Aser nai ne mulung nung kechiba item yagi kü dak atonger? ta shira, aji ne menen uluba yong na süoshi meküti mangsa lir, aser ne dak tekangshi atonger.

²³Ethiopia nungeri pei sentsü mesüra merok keyii pei pungmen melentetdi ma? Idangji dang nenok shiri tamajung inyaktsü yimya süba-a ali tajung inyaktet.

²⁴Anungji arem mopungi tsüksü yimshia yok ama ni nenok prokshidaktsütsü.

²⁵Ibai ne tia, ni ne nem ozüktsüba shilem lir, ta KIBUBAi ashir, kechiaser nenoki ni amadok aser yazü amang.

²⁶Ni kü sasa ne tejak nung ne süpeti lukettsütsü, aser ne maksü angutsü.

²⁷Ni ne tesempatsütem, ne nüktapangtaba, aser jatepba ola, shi azüabung jabujariba alu nung tenem manung nguogo. Oh Yirusalem, na asoshi aiatai! Na merüka makümtsü, ano kopiga alitsü?