Read njo YERIMIA 14 Bible Online

YERIMIA 14 - njo bible

YERIMIA 14

¹Nükra indang KIBUBA O Yerimia dangi aruba:

²Yihudai mang ayimer aser lar süngkhümtem loksa-a aor; parnoki ali nung mangyim ken atener, aser Yirusalem ayimtenba atur.

³Par tamarenertemi par kilirtem tzütai yoker, parnok tzübu jagi arur, parnoki tzü mangur, parnok tzüshi tazüng bener shilanger; parnok akseta aser bangkaseta lir aser parnok süko meir.

⁴Kechiaser aliji konga lir, linük nungji tzünglu maru yong, aluyimer akseta parnoki süko meir.

⁵Moapu nung mesü tetsütila lai mepuli aliba techanu toktsür aor, kechiaser rem mali.

⁶Arem gadotem tenem moa nung noktaker, shirongtem ama mopung asoshi parnoki satema sashir; parnok tenük chilar kechiaser süngolio maka.

⁷Onok anema onok meneni kuli agüjaka, Oh KIBUBA, ne tenüng atema nai inyakang; kechiyong onok atsüngzüka aoba jenti, onoki na anema temenen menaogo.

⁸Oh Israel teimla, na timtem mapang nung pa kümzüksang, kechiba linük nung na aener mesüka lir, aeni aor konung asoshi anenba ama alir?

⁹Kechiba na temangmangba nisung ka ama, kümzüktsü makokba, temeranger nisung ka ama alir? Aji saka, Oh KIBUBA, na onok rongnung lir, aser ne tenüng agi onok ja-a lir; onok tetoktsüma.

¹⁰KIBUBAi yamai iba nübur indang ashir, parnoki yamai nemzütsü pela-a liogo, parnoki pei tetsüng pela-a mesongtemer; anungji KIBUBAi parnok magizüker, tang pai parnok menen bilemetettsü aser parnok menentem merenshitsü.

¹¹KIBUBAi kü dang ashi, “Iba nübur ajungtsü asoshi sarasadem tesü.

¹²Parnoki lumiaka, ni parnok ayimtenba mangashitsü, aser parnoki tarongba tenla aser chiyungtsü tenla agüjaka ni itemji magizüktsü; saka ni itemji nok agi, aya agi, aser wara agi samatsütsü.”

¹³Idangji ni ashi, “Aia, KIBUBA Tsüngrem, ajiang, ainkartemi parnok dang ashir, ‘Nenoki nok mangutsü, mesüra nenok aya malitsü, saka ni nenok nem iba talidak atangji yimjung agütsütsü.’ ”

¹⁴Aser KIBUBAi kü dang ashi, “Ainkartemi kü tenüng nung yazü shindagi; ni parnok meyok, mesüra ni parnok dang memela mesüra parnok dang mejembi. Parnoki nenok dang tiyazü mangdang, amajok puratetba aser parnoki pei mulung agi tekülak shina jembir.

¹⁵Anungji ainkartem shirnoki ni meyokaka kü tenüng nung shin o jembir, aser shirnoki iba lima nung nok aser ayawara marutsü ta ashir item ainkar nok aser aya agi samatsütsü ta parnok indang KIBUBAi yamai ashir.

¹⁶Aser shir asoshi parnoki shin o jembir parnok Yirusalem yimdong nung, aya aser nok agi, tepsetbatem, merepshidaktsütsü; aser parnok aremtsü shinga malitsü, parnok par kinungtsütem, par chirtem, aser par jalatem, kechiyong parnok majungba parnok madak ni meküploktsütsü.”

¹⁷Nai parnok dang iba o shiang; Mangli-sangwali kü tenüki nüktzü yimdakjang, parnok tanendaktsü, kechiyong kü nübur tasüngtet jala, kanga azükba agi zübu tulu kettsüogo.

¹⁸Ni moapui ora, nok agi tepsetbatemji angur! Aser yimti jagi ni irabang, ayawara tashitaktemji angur! Kechiyong ainkar aser putir anaprongla, parnoki memetetba linük kati nemzüa ao.

¹⁹Nai Yihuda bendanga sentokadok no? Ne nelai Zion dak mesakloker no? Onok asoshi tanebtsü makatsüsa kechiba nai onok dak azük? Onoki yimjung bushi, saka kecha tajung maru; tanebtsü mapang ka bushi, saka ajiang, tetsübutsü.

²⁰Oh KIBUBA, onok majungba aser ozü tsüraburtem temenen onoki meteta arur, kechiyong onoki na anema temenen menaogo.

²¹Ne nüng atema, onok metsütoka tetoktsü, ne sentsüwangshi chuba menden mezüngmeshi tesüma; bilemtetang aser onok den ne tezüngzüktepba teraksama.

²²Kintem tiyazü tsüngrem rongnung tzünglu arudaktsütsü kar lir ma? Mesüra anüngtemi tzünglu yoktetdi ma? Oh KIBUBA ozü Tsüngrem, paji na masü no? Onoki ne dak teimla ayur, kechiyong nai item ajak inyaker.