Read njo YERIMIA 15 Bible Online

YERIMIA 15 - njo bible

YERIMIA 15

¹ Idangji KIBUBAi kü dang ashi, Mosa aser Samuel kü madang noktakaka, aji saka iba nübur tsütsü kü mulung mashitsü. Kü tsüngdang nungi parnok yokadokang, aser parnok odakjang.

² Parnoki ne dang, “Onok koleni aotsü?” ta asüngdangra, nai parnok dang shiang, KIBUBAi yamai ashir, Shir ayawara asoshi lir, ayawara agi asütsü, aser shir nok asoshi lir, nok agi asütsü, aser shir pur aotsü asoshi lir, pur aotsü.

³Ni parnok madak tesamatsürtem pezüsü shimtettsü ta KIBUBAi ashir; tetepsettsü nok, shisatsütsü azütem, meyoktsü aser samatsütsü anüng ozütem aser arem shirurutem.

⁴ Yihuda chuba Hezekia jabaso Manase-i, Yirusalem nung kechi inyak, iba yongji alima yimli ajak dang ni parnok taoksatsü ka kümdaktsütsü.

⁵Oh Yirusalem, shibai ne dang aria bilemtsü? Mesüra shibai ne mang yimtsütsü? Na junga ali mali indang shibai asüngdangtsü meyiptsü?

⁶KIBUBAi ashir, nai ni magizük, nai tesüleni ojen aor, anungji ni kü teka na anema songtok aser na samatsü; ni kü mulung seplasepshiba agi alaker,

⁷Linük süngkhüm nungi ni parnok ber agi apdokogo; ni parnok chirnur agien, ni kü nübur samatsüogo; parnoki pei lenmang nungi memeyip.

⁸Ni parnok amitsürtem tzüyim lisem dang nungi timba kümdaktsüogo; lanurtem tetsü anema, ni anüngdang teraksatsüba ka bener aru; la dak aoksa-a timtem tekangshi aser tetsübutsü ni arudaktsü.

⁹Tanur tenet tetsü lurepa ogo aser süchia ogo; ano anüngdang lia la anüji luogo; la akdaktsü aser maksü ngudaktsüogo; aser parnok tanüngba ni parnok tsükchirtem madang nok nem agütsütsü ta KIBUBAi ashir.

¹⁰Oja, nai ni aso nung ni aiatai, alima ajonga nung, rarabangsen aser mulung machi nisung ka! Ni maputsü, mesüra apuaka magi, saka parnok ajaki ni ataker.

¹¹KIBUBAi ashi, ni na nükjidong tajung ka asoshi chioktsü; timtem aser tekangshi mapang ni ne tsükchiri ne dang mepishidaktsütsü!

¹²Kari merang, oda anüdoklentip merang aser yongmenyin raksatetdi ma?

¹³Ne akaba aser ne rongsen ni jenjang makai, nenok temenen ajak asoshi, nenok li ajak nung terakzükba oset ama agütsütsü.

¹⁴Nenoki memetetba lima ka nung ni nenok tsükchirtem nenoki tenzükdaktsütsü, kechiyong kü mit nung mi ama jangrua lir, koba teti jangrutsü.

¹⁵Oh KIBUBA, nai metet; ni bilemtetang, aser ni semdangang, aser ni asoshi kü rishikangshir dak mang yangang. Na talangka aremzükba ajanga ni bener toudaktsüma; na atema ni tarütsüba angur ta metetangma.

¹⁶Ne otem ngua ni itemji achi, aser ne otem ni asoshi tepelatsü aser kü mulung asoshi jangratemtsü aküm, kechiyong ne tenüng agi ni ja-a lir. Oh KIBUBA, Temeranger Telok Tsüngrem.

¹⁷Lemta-menüteper telok nung ni mamener, mesüra mepelateper; ni kija amen, kechiaser ne teka kü madak liasü, kechiaser nai ni ain adokba agi süngdaktsü.

¹⁸Kechiba kü tekangshi manener, kü zübu manebteter, oda manebli asür? Na kü dangbo ashioktsüba ayong mesüka kongadokba tzü mesüka alitsü no?

¹⁹Anungji KIBUBAi yamai ashir, “Nai meyipdi süra, ni na yanglushitsütsü, aser na kü madang noktaktsü. Aser nai tamajung melen kechi senti lir aji jembira, na kü bang ama alitsü. Parnoki ne dangi meyiptsü, saka nai parnok dangi memeyiptsü.

²⁰Aser ni iba nübur madang na yongmenyin tsüki jara ama kümdaktsütsü; aser parnoki na anema raratsü, saka parnoki na majettsü, kechiyong na kümzüktsü aser na sottsü ni ne den lir.

²¹Aser tamajunger ket nungi ni na kümzüktsü, aser tetsübutsü ket nungi ni na alangzüktsü.”