Read njo YERIMIA 16 Bible Online

YERIMIA 16 - njo bible

YERIMIA 16

¹KIBUBA O kü dangi aru;

²“Nai tetsür tagi, mesüra iba talidak na jabaso jala teli.

³Kechiyong iba linük nung soa aliba jala-jabasotem indang, aser parnok sodaktsüba parnok tetsütem indang, aser iba linük nung parnok jakzükba indang, KIBUBAi yamai ashir;

⁴Tasütsü tashitak tulu agi parnok asütsü. Parnok mang mayimtsü, mesüra parnok maremtsü, parnok ali tema nung jana ama alitsü. Nok agi aser ayawara agi parnok samatsü aser tasümangji anüng ozü aser arem shiruru asoshi chiyungtsü alitsü.”

⁵Kechiyong KIBUBAi yamai ashir, “Mangyimba kidangi tetu, mesüra ajebtsü tuo, mesüra parnok mang teyim; kechiyong iba nübur nungi kü yimjung, oda temeim yimlibilem aser taochi ni bener ogo” ta KIBUBAi ashir,

⁶Iba lima nung tulu tila anaprong asütsü; parnok maremtsü, mesüra nisungtemi parnok asoshi mang mayimtsü, mesüra parnok sasa maleptsü, mesüra parnok asoshi tekolak mesütoktsü.

⁷Shingaia mangyimer asoshi, tasür asoshi parnok süneptsütsü amtsük mesangsatsü; mesüra parnok tebutem aser tetsütem asoshi shingaia tesüneptsü marok parnok nem tajemtsü magütsütsü.

⁸Benjong kidangi parnok den amentsü, achitsü aser ajemtsü nai maitsüla.

⁹ Kechiyong Temeranger Telok KIBUBA Israel Tsüngremi yamai ashir, “Ajiang, ni iba linük nungi nenok nükdang aser nenok tendak menüshishiba ola aser pelatepba ola, kiyimsang ola aser kiyimla ola ni anendaktsütsü.”

¹⁰Aser nai item o ajak iba nübur dang ashidang parnoki ne dang, “Kechiba KIBUBAi onok anema tamajung pataka ya ajak kazük? Onok temenen kechi? KIBUBA asen Tsüngrem anema onoki benshiba temenenji kechi?” ta ashitsü.

¹¹Idangji nai parnok dang shiang, “Kechiaser nenok tsüraburtemi ni senzüka yutsü, aser tangar tsüngrem sülen ogo, aser parnok tenzük aser külem aser ni senzüka toktsü aser kü ozüng mebenshi,

¹²ano nenok tsürabur dang nungi nenoki tamajungba inyak kechiyong ajiang, nenok nisung shia pei temulung temerang tamajung mulungtetba sülen anidaka kü dang mangali asür.

¹³Anungji nenoki mesüra nenok tsüraburi memetetba linük kati ni nenok iba lima nungi mereptoktsü, aser ajiang nenoki mangli-sangwali tangar tsüngremtem tenzüktsü, kechiyong ni nenok dang maongka mesayutsü.”

¹⁴Anungji, ajiang ta KIBUBAi ashir, kodang KIBUBA shibai Israel nüburtem Ijip lima nungi anir adok, “Pa taküm alinungji ta masü;

¹⁵saka, KIBUBA shibai anüdoklentip lima aser pai aridokba lima ajak nungi anir adokba KIBUBA taküm alinungji ta joko ashitsü anogo arudar. Kechiyong ni parnok tsürabur nem agütsüba parnok pei limai anir arutsü.”

¹⁶“Ajiang, ni angopur jenti jatendagi” ta KIBUBAi ashir, “aser parnoki parnok aputsü; aser tesülenbo ni shirishirtem jenti ajatsü, aser parnoki tenem shia nungi aser ungsem shia, aser lungpok nungi parnok arishitsü.

¹⁷Kechiyong parnok aolen ajak kü tenük yoka lir; kü dang nungi parnok miima mali, mesüra parnok temenen kü tenük nungi nembanga mali.

¹⁸Aser ni parnok tai aser parnok menen anasü agi kepzüktsü, kechiaser parnok temokongtsü süngyanglu tasümangtem agi kü linük menentsü, aser kü senmang parnoki tesempatsütem agi süngdaktsüogo.

¹⁹Oh KIBUBA, kü tashi aser kü mitsa, timtem anogo nung kü jenokdak, ne dangisa alima tatem nungi kintem arua ashitsü; Ozü tsüraburtemi tiyazü dak alaka kecha senmang mamang, Oda amajok osettem koba nung tajangzük maka.

²⁰Nisungi pei asoshi tsüngremtem yanglutetdi ma? Itemjibo tsüngremtem masü.”

²¹“Anungji, ajiang, ni parnok nem metetdaktsütsü, ibai khen dang ni parnok nem kü ain aser kü tashi metetdaktsütsü, aser parnoki kü tenüng KIBUBA lir ta metettsü.”