Read njo YERIMIA 17 Bible Online

YERIMIA 17 - njo bible

YERIMIA 17

¹Yihuda temenen merang kolem agi zülua lir, parnok mulungjang lungpak manung aser parnok tenladak tezü manung sentsüprang lung taju agi zülua lir,

²aser süngdong tajem tamak shia aser ungsem talang nung sataka aliba linük tenem manung, parnok chirnurtemi parnok tenladak aser parnok Asherim bilemteter.

³Nenok tenemtem aser moapu ajak nung nenok temenen yong nenok takaba aser nenok rongsen ajak terakzükba oset ama ni agütsütsü.

⁴Ni nenok nem agütsüba senmang nungi nenok teka ni chiokdaktsütsü, aser nenok memetetba linük nung ni nenok tsükchirtem nenoki tenzükdaktsütsü, kechiyong kü mit nung mi jangrua lir, koba teti jangrutsü.

⁵KIBUBAi yamai ashir, “Shibai nisung dak tamang akar, aser shi pei nok o nü kümdaktsür; shiba mulung KIBUBA nungi meyiper, pa atakatem sang.

⁶Pa lisem lima nung süngsem ka mesük aser kecha tajung adokba mangutsü. Pa arem takong linüktem nisung maliba metsü lima nung alitsü.”

⁷“Shibai KIBUBA dak tamang akar, shiba tamangbaji KIBUBA lir, pa temoatsü.

⁸ Pa tzü anasa atemba süngdong mesüka lir, kobai pei teratem ayong leni yanga yoker, aser tatsük arudang metsübur, kechiyong la totem tamak alir, aser nükra küm nung shisa mebulur kechiyong lai tejang atangba manener.”

⁹“Ajak dak alaka temulungjang tekülakba lir, aser onsara majung; shibai aji angatettsü?

¹⁰ Ni KIBUBAi temulung bushir aser temulungjang tendanger, nisung shia nem pei sentong yari, pai inyakbatem nung tajangzük yari agütsütsü asoshi.”

¹¹“Orük-i lai makoba entsü mokaka techanutem merüzükba ama timleni mesüi pei rongsen angusangji yamaji lir, pa arishi telidak nungsa itemi pai toktsütsü aser tatem nungbo pa tamachi ka asütsü.”

¹²Sentsüwangshi chuba menden temalen tetenzük nungi ayubaji onok temeshi talidak li.

¹³Oh KIBUBA, Israel teimla, na senzüka toktsür ajak maksüdaktsütsü; na nungi meyipa oadokertemji alima nung zülutsü, kechiyong parnoki taküm tzü tzüpokdak KIBUBA senzüka toktsü.

¹⁴Ni anebjang, Oh KIBUBA, aser ni anebtsü; ni kümzükang aser ni kümzüktsü, kechiyong na kü nüngsang.

¹⁵Ajiang, parnoki kü dang ashir, “KIBUBA oji kong ali? Aji arudakjang.”

¹⁶Tamajung yoktsü ni ne dang makhang mesüra ni lendong anogo memeshi ta nai meteter; kü bang nungi kechi adok ne jakdang liasü.

¹⁷Kü dang taoksatsü ka telima; tamajung anogo nung na kü jenokdak.

¹⁸Shirnoki ni rishikangshir itemji maksüdakjangma, saka nibo mak tesüdaktsüma; parnok aoksadakjang, saka nibo taoksadaktsüma; parnok madak anogo tamajung tongdakjang; anasü tesamatsü agi parnok samadakjang!

¹⁹KIBUBAi yamai kü dang ashi, “Oang aser nüburtem süngkhüm nungji noktakang, koba agi parnok adoker, aser Yirusalem süngkhüm ajak nung,

²⁰aser parnok dang shiang, KIBUBA o angang, nenok Yihuda chubatem aser Yihuda ajak, aser Yirusalem alir ajak item süngkhümi aitertem.

²¹ KIBUBAi yamai ashir; nenok taküm atema kümdangang, aser amungnü khu teben mesüra Yirusalemi aji bener tei.

²² Aser nenok ki nungi amungnü khu bener tadok mesüra mapa kecha teinyak, saka ni nenok tsürabur dang melaba ama amungnü meshiteta benshiang.”

²³Aji saka parnoki manga mesüra tenarong maten, saka oda tesayuba mangashitsü aser magizüktsü asoshi parnoki tekong merang.

²⁴“Saka nenoki kü dang angadi süra,” KIBUBAi ashir, “Aser amungnü iba yimti süngkhüm ajanga kecha khu bener maitra, saka amungnü meshiteta mungra, aser iba nung kecha mapa meinyakra;

²⁵idangji iba yimti süngkhüm ajanga Dawid chuba menden nung amener chubatem talungtsü aser kortem madak mener, aser parnok chuba chirtem Yihuda nunger, aser Yirusalem alirtem ajagi alitsü; aser iba yimti nung teti asoshi nisung alitsü.

²⁶Aser parnok Yihuda yimtitem nungi aser Yirusalem meketa alidak nungi aser Benjamin lima nungi aser Shepla nungi aser tenem lima nungi, aser Negeb nungi tarongba tenla bener, aser teronem menemtsü bener, aser tenüngsang agütsüba tetepsetba tenla, KIBUBA kidangi bener arutsü.

²⁷Saka nenoki kü dang amungnü meshitettsü mangali süra, aser amungnü Yirusalem süngkhümi khu bener maitsü mangali süra, idangji ni iba süngkhüm nung mi senoktsütsü, aser iba jagi Yirusalem chuba kitem meyokadoktsü, aser aji meremseptsü.”