Read njo YERIMIA 18 Bible Online

YERIMIA 18 - njo bible

YERIMIA 18

¹KIBUBA nungi Yerimia dangi aruba O:

²“Aramesoang, aser poteper kidangi luang, aser yangji ni kü O ne nem angashidaktsütsü.”

³Idangji ni poteper kidangi alu, aser ajiang, pai pa mapa talungtsü nung inyaka liasü.

⁴Aser poteper ket nung pai ajongli agi yangluba poji raksa, aser oda poteperi junger ta bilemba ama pai ano po tanga ka yanglushi.

⁵Idangji KIBUBA O kü dangi aru,

⁶“Oh, Israel kidong, iba poteper amai ni ne den inyaktsü makok no?” ta KIBUBAi ashir. “Ajiang, poteper ket nung ajongli ama, yamaji nenok kü ket nung lir, Oh Israel kidong.

⁷Kechi mapang nung ni kin ka, aser yimli ka atsütoktsü, aser raksatsü aser samatsütsü indang jembidir,

⁸aser ni jembiba iba kin jagi, parnok tamajung inyaktsü bilemba nungi ni temulung meyiptsü.

⁹Aser kechi mapang nung ni kin ka, aser yimli ka yanglutsü aser aji lidaktsütsü indang jembidir;

¹⁰saka ajagi kü madang tamajung inyakra, aser kü ola mangaidokra, idangji koba agi ni parnok jungdaktsütsü bilema ali, iba nungjagi ni temulung meyiptsü.

¹¹Ajangla tang, oang aser Yihuda nunger aser Yirusalem nung alir dang shiang KIBUBAi yamai ashir, ajiang, ni nenok anema tamajung yanglur aser nenok anema tasa tamajung asar: nenok nisung shia tang pei lenmang tamajung nungi meyipang, aser nenok sentong aser nenoki inyakbatem yanglushiang.”

¹²Saka parnoki ashir, “Aji amajok dang! kechiyong onok pei tasa nung jajatsü, aser onok nisung shia pei mulungjang tamajung tashi mangaba ama inyaktsü.”

¹³Anungji KIBUBAi yamai ashir; Tang nenoki kin rongnung shirnoki iba ama angashia ali ta asüngdangang. Tasüngtet aiür Israeli kanga taoksatsü mapa ka inyakogo.

¹⁴Lebanon rürjebji moapu lungbang nungi aenshidi ma? Mesüra talang nungi tzü temokong yima alubaji kongadoktsü asü?

¹⁵Saka kü nüburi ni amadok, parnoki tiyazü süngyanglu nem liangmesen rongtsür, parnoki par lenmang, akhi lenmang nung metsüdakogo; aser lenti-i moi, lenrü leni ogo.

¹⁶Parnok lima tetsübutsü aser teti asoshi teti sentoka yutsüba lima ka kümdaktsür; shibaisa iba anasa süir tsübua süngmanger aser pa tekolak angümtener.

¹⁷Anüdoklen mopungi ama tsükchir madang ni parnok prokshitsü; parnok lendong mapang nung parnok dang ni kü tejak masü terongdong shitsütsü.

¹⁸Idangji parnoki ashi, “Arung, asenoki Yerimia anema tasa asadi; kechiaser putir ozüngji mesamatsü, mesüra shisa akar tesayuba, mesüra ainkar o mesamatsü. Arung, temeli agi asenoki pa lepdi, aser pa o kecha nunga mangali.”

¹⁹Kü dang angangma, Oh KIBUBA, aser kü den toktepba purtem ola angashiangma.

²⁰Tajung asoshi tamajung lepa agütsüdi ma? Aji saka parnoki kü taküm asoshi kangla ka tua lir. Ne madang ni parnok asoshi tajung jembia, ne mit parnok nungi meyipa oadoktsütsü koda ni noktak bilemtetangma.

²¹Aji asünung parnok chirtem ayawara nem bendanga agüjang, aser parnok nok tashi nem agüjang; aser par kinungtsütem tanur malir amitsür kümdakjang, aser par teburtem tasüba agi tepsetdakjang, aser par asangurtem tongbang nung nok agi lepsetdakjang.

²²Kodang nai parnok madak aoksa temeranger telok yokdir, parnok ki nungi ajepba ka angashidakjang; kechiyong ni aputsü parnoki kangla atu, aser kü tsüng asoshi sang mesanger.

²³Aji saka, Oh KIBUBA, ni tepsettsü tasa ajak nai metet; parnok tai nai tetokma, mesüra ne tsüngdang nungi parnok temenen agiteta tendokma. Saka ne madang parnok laodakjang; ne ain adokba mapang nung parnok dak teka yiangma.