Read njo YERIMIA 19 Bible Online

YERIMIA 19 - njo bible

YERIMIA 19

¹KIBUBAi yamai ashir, “Oang, aser poteper ali chipo ka aliang, aser nisungtem nungi tambur kar aser putirtem nungi tambur kar aniang;

² aser Hinnom lenteni oang, koba Pojakrep Süngkhüm anasa lir, aser ne dang ashiba otemji yangji sangdongang,

³aser shiang, Nenoki KIBUBA oji angang. Oh Yihuda chubatem, aser Yirusalem alirtem; Temeranger Telok KIBUBA, Israel Tsüngremi yamai ashir, ‘Ajiang, iba linüki ni oda tamajung bener arur, koba tangashir narongi ting ta asatsü.

⁴Kechiaser nisungtemi ni senzüka toktsü aser iba talidak menendaktsü, aser iba nung tangar tsüngrem nem liangmesen arong, shirnok parnoki aser parnok tsüraburtem aser Yihuda chubatemi memetet; aser tai makar zü agi iba linük süngdaktsü;

⁵ aser parnok jabasotem tarongba tenla ama Baal dang tenlatsü asoshi parnoki tenem tekülemdak koba ni memela, mesüra mejembi, mesüra kü mulung dangi maru.

⁶Anungji ajiang ta KIBUBAi ashir, oda iba linük joko Tofet, mesüra Hinnom jabaso lenten ta majatsü, saka Tepset Lenten ta ajatsü anogo arudar.

⁷Aser iba talidak Yihuda aser Yirusalem tasatemji amajok kümdaktsütsü, aser parnok nüburtem parnok tsükchirtem madang nok agi, aser parnok taküm bushir ket agi laodaktsütsü. Parnok tasümang anüng ozü nem aser alima shiruru nem chiyungtsü asütsü ni agütsütsü.

⁸Aser iba yimti taoksatsü aser tansütsü ka kümdaktsütsü; iba anasa süir shiai iba lendong nungi aoksatsü aser tsüngtsüngtsü.

⁹Ni parnok nem parnok jabaso aser jala shi chidaktsütsü, aser makbangba aser timtem koba agi parnoki tsükchirtem shirnoki parnok timtemdaktsütsü bushir, iba ama alidang nisung shia nem pei kiyonger shi chidaktsütsü.’ ”

¹⁰Idangji ne den aor nisungtem tsüngdang nai chipoji jakrepang.

¹¹Nai parnok dang shiang, “Temeranger Telok KIBUBAi yamai ashir, ‘Yamaji ni iba aser iba yimti poteper po kati raksatsüba ama, tanaben yanglushitsü makoktsüsa raksatsütsü. Nisungtem Tofet nung aremtsü kechiaser taremdak kecha makatsü.

¹²Yamaji iba linük dang aser iba nüburtem dang Tofet ama iba yimti kümdakja, ni inyaktsü.

¹³Yirusalem ki aser Yihuda chubatem ki ajak koba kilem manung aliba telok ajak dang teronem menemtsü arong, aser tangar tsüngremtem dak tajemtsü tenla meküploktsü. Tofet tesem ama menena akümtsü.’ ”

¹⁴Idangji Yerimia Tofet nungi aru, kong KIBUBAi ainkar o jembitsü pa yoka liasü, aser pai KIBUBA ki kilempok nung noktak, aser nisung ajak dang ashi;

¹⁵“Temeranger Telok KIBUBA, Israel Tsüngremi yamai ashir, ajiang, iba yimti madak aser iba kidong ajak madak iba anema ni jembizükba tamajung ajak bener arudagi, kechiaser kü O magizüki parnok tekong meranga aküm.”