Read njo YERIMIA 2 Bible Online

YERIMIA 2 - njo bible

YERIMIA 2

¹KIBUBA O kü dangi jembia aru,

²“Oang, aser Yirusalem tenarong nung ayimtena jembiang, KIBUBAi yamai ashir, ni ne indang ne lanuwa ajungba ne ani asüngba temeimtep bilemteter; koma nai arem nung metsü meproki aliba linük nung kü sülen anidak.

³Pa meyong mezüng atangba süngjang, Israelji KIBUBA madang temeshi liasü; shirisa pa meyok parnoki tai mena, parnok madak tamajung atongtsü,” ta KIBUBAi ashir.

⁴Oh Yakob kidong, aser Israel kidong kinunger ajak, nenoki KIBUBA Oh angang:

⁵KIBUBAi yamai ashir, “Nenok tsüraburtemi kü dak kechi tai anguba agi, parnoki kü dang nungi talangka pila-a ao aser amajok mapa sülen jaja, aser amajok aküm?

⁶Arem ajanga asenok anir aruba, lisem lima aser ongken ajanga, tzünglu marudak lima aser tasü akhüm ajanga, aser shinga mesenzüba lima aser nisung shinga malidak, Ijip nungi onok anitetba KIBUBAji kong lir? ta parnoki tashia mashi.

⁷Ni na jenti akaba linüki, iba süngjang aser iba tajungtem achitsü anir aru; saka kodang nenok ai, nenoki kü lima menentsü, aser kü meyong senmang tesempatsü kümdaktsü.

⁸KIBUBA kong ali? ta putirtemi mashi, aser shirnoki ozüng nung amtaker, parnoki ni memetet; yimsüsürtemia ni anema apuso, aser ainkartemi Baal atemer shin jembi, aser tajangzük magütsüba sülen anidak.”

⁹“Anungji ni nenok den ano kepteptsü aser parnok chirnur den ni kepteptsü” ta KIBUBAi ashir.

¹⁰Saiprus tzükümtem ajanga oang, aser Kedari yokang, aser jungjunga shisadangang; aser iba amai liasü asü masü ajiang.

¹¹Kin kari pei tsüngremtem, oda atangji tsüngrem mesüaka, itemji melenshi asü? Saka kü nüburtemi parnok sentsüwangshi melena koba agi tajangzük magütsür aji melenogo.

¹²Oh anüngtem, iba nung nenok aoksa-a liang, aser kanga tsübuseta liang ta KIBUBAi ashir.

¹³Kechiyong kü nüburtemi tamajung ana inyakogo, parnoki ni, taküm tzü ayong senzüka toktsü, aser parnok asoshi tzüshi, tzü sota melitetba teraksa tzüpongtem angenteta yangluogo.

¹⁴“Israel alar ka asü? Pa kidang asoba alar ka asü? Ajangla kechiba pa tepsettsü ka aküm?

¹⁵Pa anema molusongzü pungtui arrloktsü, aser ola agütsü; aser parnoki par lima teraksa kümdaktsü, par yimtitem nisung melidaktsüi rongtokadok.

¹⁶Ano Memfis aser Tahpanhes nisungtemi ne kolak korang raksatsü.

¹⁷Saka pai na lenmang nung anidang KIBUBA ne Tsüngrem nai senzüka toktsüba yong ya ne madak matong no?

¹⁸Aser tang Nile tzü ajemtsü asoshi Ijip lenmang nung aoba agi na kechi ajangzüktsü? Mesüra Eufrata tzü ajemtsü asoshi Asiria lenmang nung aoba agi na kechi ajangzüktsü?

¹⁹Na pei tamajung agi na merenshitsü, aser na atsüngzükba agi na arütsütsü; aji asünung KIBUBA ne Tsüngrem senzüka toktsütsü aser tsüngken metsübui alitsübaji koma tamajung aser taku lir, aji nai metettsü aser angutsü, ta Temeranger KIBUBAi ashir.”

²⁰“Kechiyong akhidang nai ne süngra raksa aser ne talenba poksa, aser nai ashi, ‘Ni metenzüktsü.’ Kechiyong ungsem talang shia nung aser sangshia aliba süngdong kübok shia nai ne sasa mangadak aser jabujaria ali.

²¹Aji saka ni na teshimtet tsükmenatzü dong ka atem, khenyongi metsü temeja ka liasü, ajangla kechiba na kü madang samesa arem tsükmenatzü dong aküm?

²²Kechiyong nai sabon tzü agi na shitokaka aser sabon jenti agiaka aji saka ne tai menaba kü madang tarak lir, ta KIBUBA Tsüngremi ashir.

²³Ni memeneni lir, ni Baaltem sülen mao ta nai koda shitet? Lisem lima na aolen ajiang, nai kechi inyak metetdang; tekara ut chanu pei lenmang nung meketzüa aobaji na lir;

²⁴arem gado arem yimya sübaba, lai jangra-a mopung asüketa; la tsüngkhüm nungi shibai la meyipa odaktsütsü? Shiri la bushir parnok mebelemtsü, la tsüngkhüm nungbo parnoki la angutsü.

²⁵Ne tetsüng tesa teli, aser ne terok konga tasüm; saka nai ashir, ‘teimlatsü maka, kechiyong ni bendanger tsüngremtem meimer, aser parnok sülen ni aotsü.’ ”

²⁶“Auür putetdang pa akseta aliba ama yamaji Israel kidong aktsü; parnok, parnok chubatem, tongtipur, putirtem, ainkartem,

²⁷shirnoki süngdong ka dang, ‘Kübu ta, aser lung dang nai ni poktetdaktsü’ ta ashir, kechiyong parnok tejak masü, parnoki parnok terongdong kü tsütsü shitsü. Saka parnok timtem mapang nung parnoki ashitsü, ‘Aramesoang, aser onok kümzükangma.’

²⁸Saka nai yangluba ne tsüngremtem kong ali? Ne timtem mapang nung parnoki na kümzüktsü kokra, parnok aramesodakjang; kechiyong Oh Yihuda, ne yimtitem kwi ali paikaji ne tsüngremtem lir.”

²⁹“Ajangla nenoki ni anema kechiba jembir? Nenok ajaki ni anema ozüng raksaogo.

³⁰Amajok nung ni nenok chirtem dak azük, parnoki temulung matang, nenok pei nok agi nenok ainkartem tesamatsüba molusongzüi amato meyokadok.

³¹Oh nüburtem, KIBUBA O nenoki angang. Israel dang ni azüngmeyakdak amato liasü asü? Mesüra ammang lima amato liasü asü? Ajangla kechiba kü nüburtemi, ‘Onok pei meten alir; onoki ne dangi marutsü, ta ashir?’

³²Aiüri pei sobusolemtsü amadi ma? Mesüra kiyimlai pei sobutsü amadi ma? Aji saka kü nüburtemi anogotem mezüngdangteti ni amadok.

³³Temeimertem bushitsü nai ne lenmang koma asameyanger! Oda tamajung tetsürtem danga nai ne lenmangtem sayua lir.

³⁴Ne sü nung tai makaba zü mezüa angur. Nai aji ateta aiba mangu, saka item ajak manung angu,

³⁵aji saka nai ashir, ‘Ni tai mali; atangji pa ain kü dak nungi meyipa ogo. Ajiang, ni temenen mebenshi’ ta nai ashiba yong ni na aitsütsü.

³⁶Kechiba ne lenmang ya oda melenshia senzür? Asiriai na maksüdaktsüba ama na ano Ijipi maksüdaktsütsü.

³⁷Ne kolak nung ne ket ataloker pa nungia na aotsü; kechiyong nai temulung alemba pur KIBUBAi magizük, aser parnok dak na azükaru masütsü.”