Read njo YERIMIA 20 Bible Online

YERIMIA 20 - njo bible

YERIMIA 20

¹Tang putir Pashur, Immer jabaso, shiba KIBUBA kidang tongtiba liasü, Yerimiai item o shinba angashi.

²Idangji Pashuri ainkar Yerimia dak azük aser KIBUBA kidang Benjamin süngkhüm temadak aliba tsüngden chiokdak pa ayu.

³Tasüngji Pashuri Yerimia tsüngden chiokdak nungi chiokdang Yerimiai pa dang ashi, KIBUBAi ne tenüng Pashur majar, saka “Ajaklen Tsübusang” ta ajar.

⁴Kechiyong KIBUBAi yamai ashir, “Ajiang ni na pei asoshi aser ne tembartem asoshi na tetsübutsü ka kümdaktsütsü. Nai repranga alidang parnok tsükchirtem nok agi parnok laotsü. Yihuda ajak ni Babilon chuba ket nung agütsütsü; pai parnok Babiloni pua bener aotsü, aser nok agi parnok tepsettsü.

⁵Ano, ni yimti rongsen, iba tajangzük, iba nung senti oset ajak, hau, Yihuda chubatem rongsen ajak par tsükchir ket nung agütsütsü, parnoki item rakzükraktemtsü, aser agitsü, aser Babiloni itemji bener aotsü.

⁶Aser na Pashur, aser ner kidang alir ajak, tepuokdaki aotsü. Babiloni nenok aotsü, aser yangji na asütsü, aser yangji aremtsü, na aser ne tembar ajak shir dang nai yazü shin.”

⁷Oh KIBUBA, nai ni ashioktsü, aser ni ashiokja liasü; kü dang nungi na tashi taitba, aser nai kokogo. Anogo piyong ni menüdong küma lir; ajaki ni sensamasar.

⁸Kechiyong kodangsa ni jembidir, ni ayimtener, ni ola agütsür, azü tokshiba aser teraksatsü! Kechiyong ni asoshi KIBUBA oji anogo piyong tarütsüba aser sensatsüba ka kümogo.

⁹Ni pa metetshitsü, mesüra pa tenüng nung joko mejembitsü, ta ni shira, kü teret nung mi shibanga ali amato kü mulungjang nung lir, aser ni aji telung nung sottsü aniseta lir, aser ni makoker.

¹⁰Kechiyong aikati, “Ajaklen tetsübutsü lir,” ta shishiba ni angashir. Pa tagizük! Asenoki pa magizükli! Kü taküm laoba ngua kü tembar ajaki ashir. “Ashiko pa ashioktsütsü, idangji asenoki pa akoktsü, aser pa dak mang ayangtsü.”

¹¹Saka KIBUBAji Temeranger tetsübutsü tulu ka ama kü den lir; anungji ni rishikangshirtem metsüdaktsü, parnoki ni makoktsü. Parnok tatem maka maksü kodanga mamatsü.

¹²Oh Temeranger Telok KIBUBA, shibai temeshipur tentanger, shibai temulungjang aser temulung angur, parnok madak ne mangyangba kü nem ngudakjang, Kechiyong kü o ni ne nem bendanga agütsüogo.

¹³KIBUBA dang ken tenang, KIBUBA sangang; kechiyong tamajung inyakertem ket nungi pai leni maor taküm kümzük.

¹⁴ Ni asoba anogoji atakatem sang! Kütsüi ni asoba anogo, aji temoadaktsüma.

¹⁵Temeranger KIBUBA, Israel Tsüngremi yamai ashir, “Ajiang, iba yimti madak aser iba kidong ajak madak iba anema ni jembizükba tamajung ajak bener arudagi, kechiaser kü o magizüki parnok tekong meranga aküm.”

¹⁶Iba nisungji KIBUBAi taochi makai laodaktsüba yimtitem mesüka lidakjang; anepdang ayimtenba ola ka aser anüngdang arürsang ka pa nem angashidakjang.

¹⁷Kechiaser pai nu menden nung ni metepset; yangji kütsü kü lep kümla aser la nu menden tulu lila.

¹⁸Kechiba tokrong aser tejashi angutsü, aser kü arishi maksü nung süitsü nu menden nungi ni adok?