Read njo YERIMIA 22 Bible Online

YERIMIA 22 - njo bible

YERIMIA 22

¹KIBUBAi yamai ashir, “Yihuda chuba kidangi luang, aser yangji iba o jembiang,

²aser shiang, KIBUBA O angang, Oh Yihuda chuba, shibai Dawid chuba menden nung amener, na aser ne tenzükertem, aser ne nübur shiri item süngkhümi aiter.”

³KIBUBAi yamai ashir, “Ochi aser temeshiba inyakang, aser shiba dak rakzükraktem pa tekangshir ket nungi kümzükang; aener, tebu malir, mesüra amitsür dang tim masüba teinyak, mesüra teka tei, mesüra iba talidak tai makaba zü tetokshi.

⁴Kechiyong nenoki atangji ibai inyakra idangji iba ki süngkhümi chubatem shirnok Dawid menden nung amener, parnok aser parnok tenzükertem, aser parnok nüburtem aittsü.

⁵ Saka nenoki item o mangara, ni kü sasa azüngashir, oda iba ki azüngmeyakdak akümtsü” ta KIBUBAi ashir.

⁶Kechiyong Yihuda chuba kidong indang KIBUBAi yamai ashir; kü madang na Gilead ama, Lebanon tenem kolak ama; aji saka ni na lisem lima nisung maliba yimti ka kümdaktsütsü.

⁷Na anema ni teraksatsürtem renemtsü, nisung shia pei nok o nü den; aser parnoki nenok cedar süngdong tawatemji lensüktsü, aser itemji mi nung enoktsütsü.

⁸Kin aika iba yimti ajanga süitsü, aser nisung shiai pei kiyonger dang ashitsü, “Kechiba iba yimti tulu dak KIBUBAi yamai benshi?”

⁹Parnoki langzütsü, “Kechiaser parnoki pei Tsüngrem den tezüngzüktepba sentokadok, aser tangar tsüngremtem külem aser parnok tenzük.”

¹⁰Shiba tasü lir pa asoshi tejeb mesüra mang teyim; saka shiba oadoker pa asoshi kukua jebang, kechiyong pa pei lima reprangi joko meshilangtsü.

¹¹ Kechiyong Yihuda chuba Yosia chir Shallum shibai tebu Yosia melena chuba, aser shiba iba talidak nungi oadok, pa indang KIBUBAi yamai ashir, “Pa yagi joko meshilangtsü;

¹²saka talidak kongi pa pur ao yangji pa asütsü, aser joko iba lima kodanga mangutsü.”

¹³Shibai pei ki memeshiba agi yangludir, aser pei taktang temaba ochi mashiba agi yangludir, aiatai! Shibai pei kiyonger angati tenzükdaktsüdir, aser pa taa magütsür;

¹⁴shibai, “Ni kü sasa ki tulu ka tesadem taktang dena yanglutsü” ta ashir, aser iba asoshi kichiba lapoka, cedar süng agi kichiba yanglur, aser idakji temerem sentsü ateper.

¹⁵Cedar süng nung toktep yong nai naji chuba ta bilemer asü? Nebui ochi aser temeshi inyaka chia majem no? Anungji pa junga liasü.

¹⁶Pai sensaker aser leni maor atsünga o bendang, yongji junga liasü. Aji ni metettsüba masü no? ta KIBUBAi ashir.

¹⁷Saka na ochi mashi tajangzük asoshi dang tai makaba zü tokshitsü asoshi aser tekangshi aser teka iteptsü asoshi nenok tenük aser temulungjang lir.

¹⁸ Aji asü nung Yihuda chuba Yosia jabaso, Yehoiakim indang yamai ashir, “Aia odi!” mesüra “Aia oya” ta shia parnoki pa asoshi mang ayimtsü. “Aia kibur!” mesüra “Aia tamarener!’ ta parnoki pa asoshi mang ayimtsü.

¹⁹Gado ka aremba ama Yirusalem süngkhüm atena atsür oa endoka aremtsü.

²⁰Lebanoni tuang, aser ayimtenang, Bashan nung ne ola yokang; Abarim nungi ayimtenang, kechiyong na meimertem ajak samaja lir.

²¹Na azükarua alidang ni ne dang jembi, saka nai ashi, “Ni mangatsü.” Lanuwa nungi na yamai liasü, oda nai kü tashi manga.

²²Ne sannüker ajak mopungi okdoktsütsü, aser na meimer ajak pur aotsü; idangji ne tamajung mapa yong na aktsü aser süngmangtsü.

²³Oh Lebanon nung alirtem, cedar süngdong rongnung tesep yanglurtem, tetsür nusotsü kangshiba ama kodang ne madak tekangshitsü tongdir koda na anüngtsü!

²⁴ “Ni taküm ali nung” ta KIBUBAi ashir, “Yihuda Yehoiakim chir Konia, kü teka tajichi angoti liasü, aji saka ni na septoka endoktsü.

²⁵Shirnoki ne taküm bushir parnok ket nung, nai shirnok tsübua lir parnok ket nung, oda Babilon chuba Nebukadnezzar ket nung, aser Kaldi nunger nem na agütsütsü.

²⁶Na aser na asola netsü, tanga lima kati endoktsü; kong na maso, yangji na asütsü.

²⁷Saka koba limai parnok meyipa arutsü yongya, aji agi parnok meyipa marutsü.”

²⁸Iba nisung sensamasatsüba Konia, po tejakrep, shingai anebalu masüba po asü? Kechiba pa aser par chirtem parnoki memetetba lima kati endoktsü aser endok?

²⁹Oh alima, alima, alima, KIBUBA O angang.

³⁰Yamai KIBUBAi ashir; “Iba nisung tanur mali ta züluang, pa tendak temelener malitsü; kechiyong Dawid chuba menden nung amentsü, aser Yihuda nung tanaben yimsü asütsü par chir shinga matatsü.”