Read njo YERIMIA 23 Bible Online

YERIMIA 23 - njo bible

YERIMIA 23

¹Kü chiyimdak santem samatsüba aser prokshidaktsüba sannükertem asoshi aiatai! ta KIBUBAi ashir.

²Yamai kü nübur anebaluba sannükertem indang ashir, “Nenoki kü san telok prokshidaktsü, aser parnok aridokadok, aser nenoki parnok mereprang. Ajiang, nenok tamajung inyakertem asoshi ni nenok mereprangtsü ta KIBUBAi ashir.

³Idangji kü san telok tanüngba, ni parnok koleni aridok, linük ajak nungi ni anitentsü, aser ni parnok kidangi tanaben anir arutsü. Aser parnok soyapokyatsü aser renloktsü.

⁴Ni parnok madak sannükertem ayutsü, shirnoki parnok anebalutsü, aser joko parnoki metsübutsü, mesüra pusatepa malitsü, mesüra kata mesamatsü” ta KIBUBAi ashir.

⁵ Ajiang, Dawid asoshi temeshi Kongsang ka adokdaktsütsü anogo arudagi ta KIBUBAi ashir, aser pa chuba ama chubatsü aser shisa ka-a benshitsü, aser linük nung ochi aser temeshi inyaktsü.

⁶Pa tendak Yihuda kümzüka alitsü, aser Israel lendong makai alitsü, aser pa dang ajatsüba tenüngji ya “KIBUBAJI ASEN TEMESHIBA LIR.”

⁷Anungji, “Ajiang, Ijip lima nungi Israel pur anir adoksang, KIBUBA taküm ali nungji” ta masü.

⁸Saka “anüdoklentip lima aser pai parnok koleni aridok ajak nungi anir adoksang aser Israel chirtem anir arusang KIBUBA taküm ali nungji” ta joko nisungi ashitsü anogo arudar ta KIBUBAi ashir. Idangjiang parnok pei lima nung alitsü.

⁹Ainkartem indang kü telunglen kü mulung raksa-a lir, kü teret ajak atentener; KIBUBA tsüngdang aser pa temeshi otem madang, ni yi pur ka dang mesüka, yi agi mesepba nisung ka mesüka lir.

¹⁰Kechiyong nüktapangtartem agi linük sünga lir; atakatemba yong linüki ajeber, aser arem chiyimdak konga lir. Parnok lenmang tamajung, aser parnok tashi shitak masü.

¹¹Ainkar aser putir anapronglai Tsüngrem metsübur; oda kü kidanga parnok majungba ni nguogo ta KIBUBAi ashir.

¹²Anungji parnok asoshi pei lenmangji ammang nung lenmang tanüla mesüka alitsü, kobai parnok arioktsütsü aser laotsü; kechiyong parnok merenshiba küm nung ni parnok madak tamajung bener atutsü ta KIBUBAi ashir.

¹³Samaria ainkartem dak ni mashimalu ka angur, parnoki Baal atemer shin aser kü nüburtem mashileni ani.

¹⁴ Saka Yirusalem ainkartem dak ni tetsübutsü ka angu; parnoki nüktapangta benshi aser tiyazü nung jajar, tamajung inyakertem teka parnoki tashi itdaktsü anungji shingai pei tamajung mapa nungi memeyiper, parnok ajak kü madang Sodom mesüka küma lir, aser iba nübur Gomora ama lir.

¹⁵Anungji Temeranger Telok KIBUBAi ainkartem indang yamai ashir, “Ajiang, ni taku agi parnok mesütsü aser parnok nem tajemtsü mim tzü agütsütsü; kechiaser Yirusalem ainkartem nungi alinük ajaki Tsüngrem metsübuba prokshidaktsüogo.”

¹⁶Yamai Temeranger Telok KIBUBAi ashir, “Ainkartem o, shirnoki nenok amajok teimla agi süngdakja nenok dang shiner, parnok o tanga; KIBUBA bang nungi masü, saka pei mulungjang nung anguba mangdang parnoki jembir.

¹⁷Shirnoki KIBUBA O mezüngmeshir item dangji parnoki maneni ashir, nenok junga alitsü; aser nisung shibai pei mulung teküprak sülen anidaker, pa dang parnoki ashir, ne dak tamajung kecha marutsü.”

¹⁸Kechiyong parnok rongnung KIBUBA mungdang nung shibai noktak aser pa o angatettsü, mesüra pa o nung shibai temulung agütsü aser anga?

¹⁹Ajiang, KIBUBA terasaba yipru adokogo, Tsüngrem mopung ka; tamajunger kolak nung aji pokreptsü.

²⁰KIBUBA ain adokbaji pai pei mulung inyaknüba meinyak tashi aser merenem tashi meyipa maotsü. Tesülen anogo nung nenoki aji jangjaa metettsü.

²¹Ni ainkartem meyok, aji saka parnoki asem; ni parnok dang mejembi, aji saka parnoki shin.

²²Parnok kü mungdang dak noktak asübo parnoki kü otem kü nübur dang sangdonger lila, aser parnok tamajung lenmang nungi aser parnok temenen inyakba nungi parnok meyipdaktsür lila.

²³“Ni ana nung aliba Tsüngrem ka aser talang nung aliba Tsüngrem kabo masü asü? ta KIBUBAi ashir.

²⁴Ni mungutettsüsa nisung pei sasa miima litetdima?” ta KIBUBAi ashir, “Ni anüng aser alima masünger no?” ta KIBUBAi ashir.

²⁵“Ainkartem shirnoki kü tenüng nung tiyazü ‘Ni pungmangogo, Ni pungmangogo’ ta shiner, ni angashiogo.

²⁶Ainkartem shirnoki tiyazü shiner, shirnoki pei mulungjang külakkübong agi shiner, parnok mulungjang nung ibai kopiga alitsü?

²⁷Shirnoki pei pungmang koba parnoki kati ka dang ashir, oda parnok tsüraburtemi Baal asoshi kü tenüng amadokba amato parnok pungmang agi kü tenüng kü nübur nem amadaktsütsü bilemer.

²⁸Ainkar shiba pungmang ka lir pungmangji shidakjang, saka shiba kü o aka, pai temulung lema kü o jembidakjang. Tsük den monü kechi nung kasa enjema lir?” ta KIBUBAi ashir,

²⁹“Kü o mi memesük no?” ta KIBUBAi ashir, “aser lung anüka raksaba yintem ka memesük no?”

³⁰“Anungji, ajiang, ni ainkartem anema lir, shirnoki kü O kati ka nungi auyar” ta KIBUBAi ashir.

³¹“Ajiang, ni ainkartem anema lir” ta KIBUBAi ashir, “Shirnoki pei temeli amshir aser ashir, ‘KIBUBAi ashir’

³²Ajiang, shirnoki tiyazü pungmang agi shiner parnok anema” ta KIBUBAi ashir. “Shirnok ni parnok meyokdang, memeladang parnok dang ashir aser parnok mang-mariba agi KIBUBA nübur mashileni anir; anungji iba nübur kecha parnoki majangzükdaktsür” ta KIBUBAi ashir.

³³“Kodang iba nübur kati mesüra ainkar kati, mesüra putir kati nenok dang, ‘KIBUBA khuret kechi?’ ta asüngdangdir, nenoki parnok dang ashitsü, ‘Khuretji nenok lir, aser ni nenok endokadoktsü’ ” ta KIBUBAi ashir.

³⁴“Aser ainkar, putir, mesüra nübur rongnung shibai ‘KIBUBA khuret’ ta ashir ni iba nisung aser par kibongtem merenshitsü.

³⁵Yamai nenoki nisung shiai pei kiyonger dang, aser nisung shiai pei adianu dang ashitsüla, ‘KIBUBAi kechi langzü’ mesüra ‘KIBUBAi kechi jembi?’

³⁶Saka ‘KIBUBA khuret’ ta joko nenoki metetshitsüla, kechiyong khuretji nisung shia pei o, aser nenoki taküm Tsüngrem Temeranger Telok KIBUBA asen Tsüngrem otem paizüka toktsür.

³⁷Yamai nenoki ainkar dangji shiang, ‘KIBUBAi nenok dang kechi langzü?’ mesüra ‘KIBUBAi kechi jembi?’

³⁸Saka nenoki ‘KIBUBA Khuret’ ta shira, yamai KIBUBAi ashir, ‘Kechiaser nenoki KIBUBA khuret’ ta mashitsüla ta ni nenok dangi shia yokdang, nenoki ‘KIBUBA khuret’ ta item oi ashi.

³⁹Anungji, ajiang, atangji ni na ajunga arutsü aser kü tsüngdang nungi nenok mereptoktsü, nenok aser yimti koba ni nenok nem aser nenok tsürabur nem agütsü.

⁴⁰Ni nenok madak tatem maka tarütsüba aser teti maksü bena arutsütsü, kodanga mamatsüsa.”