Read njo YERIMIA 24 Bible Online

YERIMIA 24 - njo bible

YERIMIA 24

¹ Babilon chuba Nebukadnezzari Yirusalem nungi Yihuda chuba, Yehoiakim jabaso Yekonia Yihuda tongtipur, kasenshirtem, yintsüngertem pur parnok Babiloni bener arur külen, KIBUBAi iba mangdang kü dang sayu. Ajiang, KIBUBA tenla ki madang mungozünu molok ana yua liasü.

²Mungozünu molok ka kanga tajung, mezüng amenba mungozünu mesüka, saka mungozünu molok kaji kanga tamajung, anungji itemji mechitettsüsa liasü.

³KIBUBAi kü dang ashi, “Nai kechi angur, Yerimia?” Ni ashi, “Mungozünu, mungozünu tajungji kanga tajung, tamajung mungozünuji achitsü makoktsüsa, kanga majung.”

⁴Idangji KIBUBA O kü dangi aru;

⁵KIBUBA, Israel Tsüngremi yamai ashir; “Item mungozünu mesüka, Yihuda nungi tepuokertemji ni züngshitsü, shirnok iba lima nungi Kaldi limai yok.

⁶Tajung atema ni kü tenük parnok dak yoktsü, aser ni parnok iba limai meyipa bener arutsü. Ni parnok yanglutsü, aser meraksadaktsütsü; ni parnok atemtsü, saka parnok tera matsütettsü.

⁷Ni KIBUBA lir ta metettsü ni parnok nem temulungjang agütsütsü; aser parnok kü nübur alitsü aser ni parnok Tsüngrem alitsü, kechiyong parnok temulungjang ajaki kü dangi meyiptsü.”

⁸Saka KIBUBAi yamai ashir, “Mungozünu tamajungji mesüka koba mechitettsüsa mejungi lir, yamaji ni Yihuda chuba Zedekia, par tongtipurtem, Yirusalem nung tanüngba iba lima nung alir, aser shirnok Ijip lima nung alir parnok dang benshitsü.

⁹Ni koleni parnok aridokdir ajaklen, alima yimli ajak madak tetsübutsüka, tatalatsü ka, teshintsü ka, taoksatsü ka, aser atakatem ka asütsüsa parnok kümdaktsütsü.

¹⁰Parnok aser parnok tsürabur nem agütsüba linük nungi parnok meshimeshia mesamatsü tashi ni nok, ayawara, aser wara parnok madak yoktsü.”