Read njo YERIMIA 25 Bible Online

YERIMIA 25 - njo bible

YERIMIA 25

¹ Yihuda chuba, Yosia jabaso Yehoiakim yimsüsüba küm pezübuba nung Yihuda nübur ajak indang Yerimia dangi aruba o, aji Babilon chuba Nebukadnezzar mezüngbuba küm liasü.

²Koba ainkar Yerimiai Yihuda nübur ajak dang aser Yirusalem alir ajak dang jembi;

³Yihuda chuba Amon jabaso Yosia küm terasembuba nungi tanü tashi, item küm metsür asem, KIBUBA O kü dangi aru, aser ni nenok dang atentena jembi, saka nenoki manga.

⁴KIBUBAi pei tenzükertem ainkar ajakji tena-tena nenok dangi yok, saka nenoki manga mesüra tenarong meyok.

⁵Tang meyipang, nenok nisung shia pei tamajung lenmang aser tai inyakba nungi, aser KIBUBAi nenok aser nenok tamajung lenmang aser tai inyakba nungi, aser KIBUBAi nenok aser nenok tsürabur nem akhidang nungi aser teti asoshi agüja aliba lima nung liang;

⁶tangar tsüngremtem sülen tenzüktsü aser külemtsü tuo, nenok teka mapatem agi ni ain adoktsüsa tejashidaktsü; idangji ni nenok kecha mekangshitsü ta ashi.

⁷Aji saka nenok pei majungtsü nenok teka mapa agi ni ain adoka jashidaktsütsüsa, nenoki kü dang manga ta KIBUBAi ashir.

⁸Anungji yamai Temeranger Telok KIBUBAi ashir, “Nenoki kü otem manga nungji,

⁹ajiang, ni anüdoklentip kin ajak ajatsü ta KIBUBAi ashir, aser kü tenzüker, Babilon chuba Nebukadnezzar ajatsü aser iba lima aser iba nübur aser item kin meketa alir ajak anema ni parnok yoktsü; aser ni parnok meshimeshia samatsütsü, aser parnok taoksatsü ka, aser tesempatsü ka, aser teti azüngmeyakdak kümdaktsütsü.

¹⁰ Ano menü ola, aser pelaba ola, kiyimsang ola aser kiyimla ola, semki tsüksenba aser milen tesangwa, ni parnok nungi agiadoktsü.

¹¹ Iba linük ajonga teraksa aser azüngmeyakdak akümtsü aser item kintemi Babilon chuba küm neter tenzüktsü.

¹²Idangji küm neter abensar, Babilon chuba aser iba kinji Kaldi lima, parnok temenen asoshi linükji teti asoshi azüngmeyakdak kümdakja, ni merenshitsü ta KIBUBAi ashir.

¹³Kü o ajak koba iba anema jembi iba kaket zülua aliba ajak, koba Yerimiai kin ajak anema shinogo, ni iba linük madak arudaktsütsü.

¹⁴Kechiyong kintem aser chuba tulu aikati oda parnok alar kümdaktsütsü; aser parnok mapa yari lepa agütsütsü.”

¹⁵KIBUBA, Israel Tsüngremi yamai kü dang ashir; “Kü ket nungi iba terasaba yi marok agiang, aser shir kintem dangi ni na yok ajak nem jemdakjang.

¹⁶Ni parnok dangi nok yok nungji parnoki ajemtsü aser yiamata-a mangazütsü.”

¹⁷Anungji ni KIBUBA ket nungi marokji agi, aser KIBUBAi shir dangi ni yok aji jemdaktsü.

¹⁸Yirusalem aser Yihuda yimtitem, iba chubatem tongtipur, parnok azüngmeyak aser tejenokdak, tesempatsü aser atakatem ka, tanü aliba amai kümdaktsütsü.

¹⁹Ijip chuba Farao, pa tenzükertem, pa tongtipur, pa nübur ajak,

²⁰aser parnok rongnung bendanger pur; Uz lima chuba ajak aser Filistia nunger lima chuba ajak, Ashkelon, Gaza, Ekron, aser Ashdod tanüngba;

²¹Edom, Moab aser Ammon chirtem;

²²Tair chubatem ajak, Sidon chuba ajak aser tzüyim ajanga tzüküm linük chubatem;

²³Dedan, Tema, Buz, aser shirnok tezülen ku südoker ajak;

²⁴Arabia chubatem ajak aser lisem lima nung alir temeyoktep kin chubatem ajak;

²⁵Zimri chubatem ajak, Elam chubatem ajak, aser Media chubatem ajak;

²⁶anüdoklentip chubatem ajak, talang aser ana nung, ka sülen ka, aser ali jak nung alima yimli ajak, aser parnok sülen Babilon chubai ajemtsü.

²⁷Idangji nai parnok dang shiang; KIBUBA, Israel Tsüngremi yamai ashir; “Jemkanga jemang aser saktsüang, laoang aser joko teshishi, nok koba ni nenok rongnung yokdagi iba yongji lir.”

²⁸Parnoki ne ket nungi marokji ajemtsü magizükra, idangji nai parnok dang ashitsü, yamai Temeranger Telok KIBUBAi ashir; “Nenoki ajemtsü tim.

²⁹Kechiyong ajiang, yimti koba kü tenüng agi ja-a lir yangji ni tamajung inyaktsü tenzüker, aser nenok memerenshi-i odaktsüdi ma? Nenok memerenshi-i modaktsütsü, kechiyong alima alir ajak anema ni nok ka mekangdagi” ta Temeranger Telok KIBUBAi ashir.

³⁰Anungji, item o ajak parnok anema nai shiang, aser parnok dang shiang; KIBUBA temalen nungi arutsü, aser pa temeshidak nungi pa ola adoktsü; pai tashi tulu agi pa chiyimdak anema, alima alir ajak anema tsükmenatzü anetdang ama washitsü.

³¹Alima tatembang tonga ola metangtsü, kechiyong kintem anema KIBUBA O ka lir; shi ajak den pa o bendangi idagi, aser tamajunger dak nok yoktsü ta KIBUBAi ashir.

³²Yamai Temeranger Telok KIBUBAi ashir; “Ajiang, kin ka nungi kin kati tamajung odagi, aser alima tatembanglak nungi yipru-mopung tulu ka adokdagi.”

³³Iba anogo nung KIBUBAi tepsetbatemji alima külen tatembang nungi külen tashi aotsü. Parnok mang mayimtsü, mesüra meshitentsü, mesüra maremtsü; ali tema nung parnok rüja asütsü.

³⁴Jeptepang, nenok sannükertem, aser ayimtenang; aser aut nung longzüang, nenok san telok kiburtem; kechiyong nenok tepsetba aser prokshiba anogo tongogo, aser nenok teshimtet san tepung ama nenok laotsü.

³⁵Sannükertem asoshi jenokdak anünga malitsü, san telok kiburtem asoshi tejenbulen malitsü.

³⁶Angang sannükertem ayimtenba aser san telok kiburtem ajepba! Kechiyong KIBUBAi parnok chiyimdak raksatsüdagi.

³⁷Süngjem süngjema aliba moapu raksadagi, kechiaser KIBUBA tetsübutsü ain adoka lir.

³⁸Molusongzü ka mesüka pei lungpok toktsüogo, kechiyong parnok linük azüngmeyak küma lir, kechiaser KIBUBA nok, aser pa tetsübutsü ain adokbayong lir.