Read njo YERIMIA 26 Bible Online

YERIMIA 26 - njo bible

YERIMIA 26

¹ Yihuda chuba Yosia jabaso Yehoiakim chubaba tetenzük nung, iba o ya KIBUBA nungi aru,

²KIBUBAi yamai ashir; “KIBUBA ki kima noktakang, aser KIBUBA kidang külemtsü aruba Yihuda yimti ajak dang ni ne dang parnok den jembitsü melaba o ajak jembiang; o kata sota teyu.

³Aji parnoki angatsü südi, aser nisung shia pei tamajung lenmang nungi meyiptsü, oda parnok tamajung inyakba yong ni parnok dang tamajung inyaktsü bilema aliba nungi nia temulung meyipa adoktsüa kar.”

⁴Nai parnok dang shiang, KIBUBAi yamai ashir, “Kü ozüng koba ni nenok madang yutsü iba nung jajatsü,

⁵aser kü tenzüker ainkartem shirnok ni nenok dangi nentak nentaka yok, parnok otem temulung agütsütsü nenoki kü dang mangali süra,

⁶ ajangla iba ki Shilo mesüka kümdaktsütsü, aser iba yimti alima kin ajak asoshi atakatem ka ni kümdaktsütsü.”

⁷Putir, ainkar o nübur ajaki KIBUBA kidang item o Yerimiai jembiba angashi.

⁸Kodang KIBUBAi nisung ajak dang jembitsü melaba ajak Yerimiai jembima, idangji putir, ainkar aser nüburtem ajaki pa dak sot, aser ashi, “Na asütsü.”

⁹Kechiba nai KIBUBA tenüng nung, “iba ki Shilo mesüka alitsü, aser iba yimti nisung meli-i azüngmeyaka alitsü ta shin?” Aser nisung ajak KIBUBA kidang Yerimia meketa sentep

¹⁰Kodang Yihuda tongtipurtemi item angashi, parnoki chubar ki nungi KIBUBA kidangi atu aser KIBUBA ki Süngkhüm Tasen tailen amen.

¹¹Idangji putir aser ainkartemi tongtipur o nisung ajak dang ashi, “Iba nisung tasütsü tetemsü, kechiaser nenok narong agi angashia pai iba yimti anema shiogo.”

¹²Idangji Yerimiai tongtipur aser nisung ajak dang jembia ashi, “Nenoki angashiba o ajakji iba ki aser iba yimti anema jembitsü KIBUBAi ni yok.

¹³Anungji tang nenok lenmang aser nenoki inyakbatem yanglushiang, aser KIBUBA nenok Tsüngrem ola angang, aser KIBUBAi tamajung koba pai nenok anema kazüka yok aji atsüshitsü.

¹⁴Saka ni asoshibo, ajiang, ni nenok ket nung lir. Nenok madang tajung aser shitak ta bilemba kü dak inyakang.

¹⁵Nenoki ni südaktsüra ya dang atangji metetang, nenoki tai makaba zü taiji nenok pei madak aser iba yimti aser iba nübur madak bena arutsü, kechiyong KIBUBAi nenok narong nung item o ajak jembitsü ni nenok dangi yok.”

¹⁶Idangji tongtipur aser nisung ajaki putir aser ainkartem dang ashi, “Iba nisung tasütsü metemsü, kechiyong pai KIBUBA asen Tsüngrem tenüng nung asenok dang jembiogo.”

¹⁷Linük tambur kari aramesoa aser adenshia alir ajak dang jembia ashi,

¹⁸ Moreshit nunger Mikai Yihuda chuba Hezekia anogo nung shin, aser Yihuda nübur ajak dang ashi, yamai Temeranger Telok KIBUBAi ashir, Zion alu ama tensa-a alitsü; Yirusalem teraksa tamajung ka akümtsü, aser ki tenemji min tenem akümtsü.

¹⁹Yihuda chuba Hezekia aser Yihuda ajaki pa südaktsü asü? Pai KIBUBA tsüngken tsübua KIBUBA yimli sayutsü memepishi no? Aser KIBUBAi tamajung koba pai parnok anema kazüka yok aji matsüshi no? Saka asenokbo tamajung tulu asen sasa bena tarur dang lir.

²⁰Ano tangar ka shibai KIBUBA tenüng nung shin, Kiriath-jearim nungi Shemia jabaso Uria, pai iba yimti aser iba lima anema Yerimia o mesüka shin.

²¹Kodang Yehoiakim chubai, pa temeranger ajak aser tongtipur ajak dena, pa otem angashi, chubai pa südaktsütsü bushi; saka kodang Uriai iba indang angashi, pai tsübu aser Ijip nung jenok.

²²Idangji Yehoiakim chubai Ijipi nisung kar yok,

²³aser parnoki Ijip nungi Uria ania aru aser Yehoiakim dangi bener aru, shibai pa nok agi tepset aser pa tasü mangji yimkong aremdak enoktsü.

²⁴Saka Shafan chir Ahikam teka Yerimia den liasü, aji asü nung nisungtem nem südaktsütsü pa bendanga magütsüi liasü.