Read njo YERIMIA 27 Bible Online

YERIMIA 27 - njo bible

YERIMIA 27

¹ Yihuda chuba Yosia jabaso Zedekia chubaba tetenzük nung, iba o Yerimia dangi KIBUBA nungi aru.

²Yamai KIBUBAi kü dang ashi, “Ne sasa mijepru aser süngra yangluang, aser itemji ne tekong nung azükang.

³Edom chuba, Moab chuba, Ammon chirtem chuba Tair chuba, Sidon chuba dangi, Yihuda chuba Zedekia dangi Yirusalemi arurtem o tongtartem ket agi o yokang.

⁴Parnok nem ibai parnok kibur nem shidakjang. Temeranger Telok KIBUBA Israel Tsüngremi yamai ashir, nenok kiburtem dang nenoki kechi tashitsü lir aji ya,

⁵Kü ain tulu agi aser kü tepen songtokba agi ni alima nisung, aser alima aliba shirurutem yanglu, aser aji ni kü madang junga bilemer nem agütsür.

⁶Tang ni item linük ajak kü tenzüker Babilon chuba Nebukadnezzar nem agüja lir, aser ano ni pa nem moapu shirurutem pa tenzüktsü agüja lir.

⁷Pa pei lima mapang matong tashi kin ajaki pa aser par chir aser par semchir tenzüktsü; aser aji ser kin aikati aser chuba tulutemi pa parnok lar kümdaktsütsü.”

⁸“Saka kin kari iba Nebukadnezzar, Babilon chuba metenzükra aser pei tekong Babilon chuba süngra kübok meyura, iba kinji ni nok agi, ayawara agi, aser wara agi, pa ket agi aji mesamatsü tashi ni merenshitsü ta KIBUBAi ashir.

⁹Anungji nenoki ainkartem dang, mesüra temezüngertem dang mesüra nenok pungmang pungmanger dang, mesüra nenok süli aor, mesüra arasentsür dang tanga, shirnoki ne dang, ‘Nenoki Babilon chuba metenzüktsü’ ta ashir parnok dang tanga.

¹⁰Kechiyong nenok linük nungi nenok talang kati aenshidaktsütsü, aser ni nenok aridokadoktsü aser nenok samatsütsü, parnoki nenok dang tiyazü shiner.

¹¹Saka kin kobai pei tekong Babilon chuba süngra kübok bener arudir aser pa tenzükdir iba kinji parnok pei lima nung lidaktsütsü ta KIBUBAi ashir; aser parnoki iba lu ayimtsü aser yangji alitsü.”

¹²Yihuda chuba Zedekia dang ni yamai jembi, “Babilon chuba süngra kübok nenok tekong aitdakjang, aser pa aser par nübur tenzükang, aser taküm liang.

¹³KIBUBAi koba kini Babilon chuba metenzüker iba kin indang jembiba ama, kechiba na aser ne nübur nok agi, ayawara agi, aser wara agi asütsü?

¹⁴Ainkartem shirnoki nenok dang nenoki Babilon chuba metenzüktsüla ta ashi, parnok o nenoki tanga, kechiyong nenok dang koba shindagi aji tiyazü lir.

¹⁵Ni parnok meyok ta KIBUBAi ashir, saka tiyazü agi kü tenüng nung parnoki shindagi, aji agi ni nenok aridokadoktsü aser nenok samadaktsütsü, nenok aser ainkartem shirnoki nenok dang shindagi.”

¹⁶Idangji ni putirtem aser nisung ajak dang jembia ashi, Yamai KIBUBAi ashir, nenok ainkartem shirnoki nenok dang, “Ajiang, KIBUBA kidang aliba marok ausutem tang kopi meli-i Babilon nungi meyipa bener arutsü” ta shindagi parnok o tanga, kechiyong nenok dang parnoki shinbaji tiyazü lir.

¹⁷Parnok dang tanga, Babilon chuba tenzükang aser taküm liang. Kechiba iba yimti azüngmeyaka akümtsü?

¹⁸Parnok ainkartem sürabang, aser KIBUBA o parnok den lira, ajangla Temeranger Telok KIBUBA dang, KIBUBA kidang marok ausutem tokja alibaji, Yihuda chuba kidang aliba aser Yirusalem nung alibaji Babiloni modaktsütsüsa mepishidakjang.

¹⁹Kechiyong tongshitem, tzüyim, tamendaktsü, aser tanüngba marok ausutem koba iba yimti nung yua lir,

²⁰koba Babilon chuba Nebukadnezzari Yirusalem nungi Babiloni Yihuda chuba, Yehoiakim jabaso Yekonia, aser Yihuda aser Yirusalem tamarener ajak pai tepuokdaki anir aoba mapang nung bener moi liasü.

²¹KIBUBA kidang marok ausu tokja aliba, Yihuda chuba kidang, aser Yirusalem nung aliba indang Israel Tsüngrem Temeranger Telok KIBUBAi yamai ashir;

²²itemi Babiloni bener aotsü aser ni parnok semdangba anogo matong tashi yangji parnok alitsü ta KIBUBAi ashir; idangji ni itemji meyipa bener arutsü aser iba talidak itemji tanaben yutsütsü.