Read njo YERIMIA 28 Bible Online

YERIMIA 28 - njo bible

YERIMIA 28

¹ Pakümjisa, Yihuda chuba Zedekia chubaba tetenzük nung küm pezü ita pungububa nung Gibeon nungi ainkar Azzur chir Hananiai KIBUBA kidang putirtem aser nisung ajak tsüngdang kü dang jembia ashi,

²Israel Tsüngrem, Temeranger Telok KIBUBAi yamai ashir, “Ni Babilon chuba süngra raksatsüogo.

³Küm ana tsüngda nung Babilon chuba Nebukadnezzari yang nungi agiba aser Babiloni bener aoba KIBUBA kidang aliba marok ausu ajak ni yagi tanaben bener arutsü.

⁴Ni ano yagi Yihuda chuba Yehoiakim chir Yekonia aser Babiloni aortem, Yihuda nungi pur aor ajak tanaben anir arutsü ta KIBUBAi ashir; kechiyong ni Babilon chuba süngra raksatsütsü.”

⁵Idangji putirtem tsüngda aser KIBUBA kidang noktaka alir ajak tsüngdang ainkar Yerimiai ainkar Hanania dang ashi;

⁶oda ainkar Yerimiai ashi “Amen, KIBUBAi yamaji inyakangma; o kobasa nai shin KIBUBAi atalokdakjangma aser KIBUBA kidang aliba marok ausutem aser tepuoker ajak Babilon nungi yagi meyipa arudakjangma.

⁷Aji saka tang iba o koba nenoki angashia aser nisung ajaki angashia ni jembir aji angang.

⁸Alemli nungi ainkartem shirnok nenok aser kü dang tama liasü parnoki rara, ayawara aser wara alinük aika aser yimli tulutem anema shinogo.

⁹Kodang iba ainkar o ataloka arudir, idangjiang KIBUBAi atangji ainkarji yok ta meteta akümtsü.”

¹⁰Idangji ainkar Hananiai Yerimia ainkar tekong nungi süngraji agi aser aji raksa.

¹¹Hananiai nisung ajak madang jembia ashi, KIBUBAi yamai ashir: “Oda yamaji ni küm ana tsüngda nung kin ajak tekong nungi Babilon chuba Nebukadnezzar süngra raksatsütsü.” Saka ainkar Yerimiaibo pei lenmangi ao.

¹²Ainkar Hananiai Yerimia ainkar tekong nungi süngra tarüdangtsüji raksatsür kenpiga lir KIBUBA O Yerimia dangi aru.

¹³Oang, Hanania dang shiang, KIBUBAi yamai ashir; “Nai süng süngra raksaogo, saka item melena ni merang süngra yanglutsü.

¹⁴Kechiyong Israel Tsüngrem, Temeranger Telok KIBUBAi yamai ashir; item kin ajaki parnoki Babilon chuba Nebukadnezzar tenzüktettsü, ni merang süngra parnok tekong nung enoktsüogo; aser parnoki pa tenzüktsü; aser ni pa nem moapu shirurutema agütsüogo.”

¹⁵Idangji ainkar Yerimiai ainkar Hanania dang ashi, “Tang angang, Hanania; KIBUBAi na meyok, saka nai iba nübur yazü ka nung amangdaktsü.

¹⁶Anungji KIBUBAi yamai ashir, ‘Ajiang, ni na alijak nungi endoktsü. Na takümsa asütsü, kechiaser nai KIBUBA anema tashi mangaba jembiogo.’ ”

¹⁷Anungji Hanania ainkarji pakümjisa ita tenet buba nung asü.