Read njo YERIMIA 29 Bible Online

YERIMIA 29 - njo bible

YERIMIA 29

¹ Itemi Yerimia ainkari Yirusalem nungi tepuoker tamburtem, putirtem, ainkartem aser nisung ajak shirnok Yirusalem nungi Babiloni tepuokdaki Nebukadnezzari bener ao, parnok dangi züluba shiti o ya lir.

²Ibai Yekonia chuba, chubatsür tetsü, teyangluba nisungtem, Yihuda aser Yirusalem tongtipurtem, süng mistritem aser yintsüngertem Yirusalem nungi pila-a or külen liasü.

³Shafan chir Elasa aser Hilkia chir Gamaria, shirnok Yihuda chuba Zedekiai Babilon chuba Nebukadnezzar dangi yok parnok ket agi shitiji yoka ashi;

⁴Israel Tsüngrem, Temeranger Telok KIBUBAi yamai ashir, “Tepuoker ajak shirnok ni Yirusalem nungi Babiloni tepuokdaki yok,

⁵kitem yangluang aser yangji liang; atsükitem yangluang aser item nungi adokba chiang;

⁶nenok tetsür agiang, aser jabaso jala liang, aser nenok jabasotem asoshi tetsür agidakjang, aser nenok jalatem ki-i odakjang, angji parnoki jabaso aser jalatem asotsü, aser yangji nenok soyapokya-ang, aser ajema teküm.

⁷Saka yimti koleni ni nenok pur yok, iba yimti yimjung bushiang, aser iba asoshi KIBUBA dang sarasademang; kechiyong iba yimjung madak nenok tesünep akatsü.

⁸Kechiyong Temeranger Telok KIBUBA Israel Tsüngremi yamai ashir; ‘Nenok rongnung aliba nenok ainkartem aser nenok teshitetertemi nenok tekülakokdaktsü, mesüra pungmang koba parnoki pungmanger aji nenoki tanga.

⁹Kechiyong parnoki kü tenüng nung yazü shiner,’ ni parnok meyok” ta KIBUBAi ashir.

¹⁰ Kechiyong KIBUBAi yamai ashir, “Kodang Babilon asoshi küm neter abensadir, ni nenok semdangtsü, aser kü tenangzükba ni atalokdaktsütsü, aser nenok meyipa yagi tanaben anir arutsü.

¹¹Kechiyong nenok asoshi kü sentong ni meteta lir, oda tamajung asoshi masü, tesülen nenok nem teimla agütsütsü, yimjung indang tebilemba” ta KIBUBAi ashir.

¹²“Idangji nenoki ni ajatsü aser arua kü dang sarasademtsü, aser ni nenok dang angatsü.

¹³ Nenoki ni bushitsü aser ni angutsü, kodang nenok temulung ajak agi bushidir,

¹⁴nenoki ni angutsü” ta KIBUBAi ashir, “Aser ni nenok tia tanaben yanglushitsü; aser kin ajak nungi aser alinük ajak koleni ni nenok aridok iba nungi ni nenok anitentsü” ta KIBUBAi ashir, aser talidak koba nungi ni nenok pur yok ajagi ni nenok anir shilangtsü.”

¹⁵Kechiaser nenoki ashi, “KIBUBAi asenok asoshi Babilon nung ainkartem adokdaktsü.”

¹⁶Chuba shiba Dawid menden nung amener, aser iba yimti alir nisung ajak nenok kidang-kimang shirnok nenok den pur mao, parnok indang KIBUBAi yamai ashir.

¹⁷Temeranger Telok KIBUBAi yamai ashir, “Ajiang, Ni nenok madak nok, ayawara, aser wara yokdagi, aser mungozünu tayila koba mechitettsüsa kanga majung, ibaji mesüka ni parnok kümdaktsütsü.

¹⁸Ni nok, taya, aser wara agi parnok arishitsü, aser alima yimli ajak asoshi taoksatsü, atakatem ka, tetsübutsü ka, tesempatsü ka, aser ni koleni parnok aridok kin ajak rongnung sensamasatsüba ka asütsü.

¹⁹Kechiaser parnoki kü o manga” ta KIBUBAi ashir, “koba ni nentak nentaka kü tenzüker ainkartem ajanga yok, saka nenoki mangali asü” ta KIBUBAi ashir.

²⁰KIBUBA oji angang, “Nenok pur aor ajak shirnok ni Yirusalem nungi Babiloni yok.”

²¹Temeranger Telok KIBUBA Israel Tsüngremi yamai ashir, “Kolaia chir Ahab aser Maasei chir Zedekia shirnoki kü tenüng nung nenok dang yazü shindagi parnok indang ashir. Ajiang, ni parnok Babilon chuba Nebukadnezzar nem bendanga agütsütsü, aser parnok nükdang pai parnok tepsettsü.

²²Babilon nung Yihuda nungi pur aor ajak parnok meji iba atakatem amshitsü. KIBUBAi na Zedekia aser Ahab mesüka kümdaktsütsü, shirnok Babilon chubai mi nung arongtsü.

²³Kechiaser parnoki Israel nung tamashi benshi, parnoki pei kiyonger kinungtsütem den nüktapangta benshi, aser parnoki kü tenüng nung ni parnok dang memelaba yazü o jembi; shibai meteter aji ni lir, aser ni kuli lir” ta KIBUBAi ashir.

²⁴Nehelam nunger Shemaia dang nai shiang;

²⁵Temeranger Telok KIBUBA Israel Tsüngremi yamai ashir; “Nai ne tenüng nung Yirusalem alir ajak dangi aser Zefania Maaseia chir putir dangi aser putir ajak dangi, ya oda shia yokang.

²⁶KIBUBAi Yehoiada putir melena na putir kümdaktsü, KIBUBA kidang yiar shibaisa shiner, pa tsüngden chiokdak aser tekong pungokdak ayutsü asoshi,

²⁷tang Anathot nunger Yerimia, shibai pei sasa tang nenok madang ainkar küma lir, kechiba marütsü?

²⁸Kechiyong pai Babilon nung asenok dangi yoka ashi, nenok tepuokdak talangka alitsü, ki yangluang, aser item nungji liang aser atsükitem atsüa tzünüang aser item nungi adokba chiang.”

²⁹Putir Zefaniai iba shiti ainkari angashia azüng.

³⁰Idangji KIBUBA O Yerimia dangi aru;

³¹Pur aor ajak dangi yokang, aser shiang, “Nehelam nunger Shemaia indang KIBUBAi yamai ashir; kechiaser ni meyokaka Shemaiai nenok dang shin, aser nenok yazü ka nung amangdaktsü,

³²anungji yamai KIBUBAi ashir, ajiang Nehelam nunger Shemaia aser pa nungi jakzükbatem ni merenshitsü; ni kü nübur dang tajung inyaktsü alibaji iba nübur rongnung angutsüsa kata pa asoshi taküm malitsü ta KIBUBAi ashir, kechiyong pai KIBUBA anema tashi mangaba jembiogo.”