Read njo YERIMIA 3 Bible Online

YERIMIA 3 - njo bible

YERIMIA 3

¹“Nisung kati pei kibutsü balara aser lai pa nungi oadokra; aser tangar kibutsü kümra, pai la dangi tanaben meyipa odi ma? Iba limaji kanga menena mekümli ma? Nai temeimer jenti den jabujari inyakaka ano nai tanaben kü dangi arudi ma?” ta KIBUBAi ashir.

²Tenem moalen jagi ne tenük yokang, aser reprangang kong na ontaka malidak ali? Arab nungeri arem nung amen ama, lenmang nung nai meimertem asoshi mena ali; aser ne nüktapangta mapa agi aser ne tamajung agi nai linük menentsü?

³Anungji tzünglu sot, aser tsükla tzünglu maru; aji saka na nüktapangtar jakten tener maki alir.

⁴Iba mapang nungi nai kü dang, “Oba na kü lanuwa medemer” ta mayimtentsü no?

⁵Pai teti ain adoka lidi ma? Pai aji tatem tashi lidi ma? Ajiang, nai jembiogo, saka koktetba tashi nai temenen inyakogo.

⁶ Yosia chuba tendak KIBUBAi kü dang ashi; “Tamang makaba Israeli kechi inyak nai nguogo ma? Lai tenem talang shiai tua aser sangshia aliba süngdong kübok shiai ao, yangji jabujari inyak.

⁷Aser lai item ajak inyaker, la kü dangi meyiptsü ta ni bilem; saka lai memeyip; aser aji adianu tashioktsür Yihudai angu.

⁸Kodang tamang makaba Israeli nüktapangta benshi, ni la endokadok, aser la nem tepalaba kaket agütsü ta lai angu, aji saka tashioktsür Yihuda la adianu lai metsübu, saka ano la-a ao aser nüktapangta benshi.

⁹La jabujari nung züzüa aliba ajanga linükji menen aser lai lung den aser süngdong den nüktapangta inyak.

¹⁰Ya ajak atalokaka, temulung matangba la adianu Yihudai, la mulungjang ajak agi kü dangi meyipa maru, saka temulung tezüba agi liasü” ta KIBUBAi ashir.

¹¹Idangji KIBUBAi kü dang ashi, “Tesüleni atsünga aoba Israeli yazüba Yihuda dang nungi tali medena sayuogo.

¹²Oang, aser item anüdoklentip tsütsü sangdongang, aser shiang, ‘Tesüleni atsünga aoba Israel, meyipang’ ta KIBUBAi ashir, ‘ni ne dak ain adoka mereprangtsü, kechiyong ni yimlibilem lir, ni tetibo ain adoka malitsü’ ta KIBUBAi ashir.

¹³Nai ne KIBUBA ne Tsüngrem anema ozüng raksa, aser Bendangertem madang süngsang sanga aliba süngdong kübok nai ne lenmangtem prokshidaktsü aser nai kü ola manga, ne tai nangzükang” ta KIBUBAi ashir.

¹⁴KIBUBAi ashir, “Meyipang, Oh tamang makaba chirtem, kechiyong ni ne KIBUBA lir; aser ni nenok yimti nungi ka aser kibong nungi ana agitsü, aser ni nenok Zioni bener arutsü.

¹⁵Ni nenok nem kü mulung asüba sannükertem agütsütsü shirnoki nenok temetetba shisatsü aser tangatetba agi mesütsü.”

¹⁶Aser item anogo nungji, KIBUBAi ashir, kodang linük nung nenok soyapokya-a aser renloka kümdir, parnoki KIBUBA tezüngzüktepba Ozüng Süngden, ta joko mashitsü; mesüra parnoki aji mebilemtettsü, mesüra parnoki aji mesemdangtsü; mesüra aji tanaben meyanglutsü.

¹⁷Iba mapang nung parnoki Yirusalem dang KIBUBA chuba menden ta ajatsü; aser kin ajak yangji KIBUBA tenüng nung Yirusalemi senteptsü; mesüra parnoki joko parnok temulungsentsü tamajung sülen mejajatsü.

¹⁸Item anogo nungji Yihuda kidongi Israel kidong den jajatsü, aser parnoki anüdoklentip lima nungi ne tsürabur nem ni senmangtsü agütsüba lima jagi külemi arutsü.

¹⁹Saka KIBUBAi ashi, “Techirtem rongnung ka na koda yutsütsü, aser ne nem alinük tajung kin telok senmang tajung koda agütsütsü?” Aser ni ashi, “Nenoki kü dang kübu ta ajatsü; aser kü sülen anidakba nungi meyipa maotsü.

²⁰Atangji tamang makaba kinungtsüi pei kinungpu ashiokja pilaba ama yamaji nenoki ni ashiokja benshi, Oh Israel kidong” ta KIBUBAi ashir.

²¹Tenem moa nung ola ka angashir, Israel chirtemi ajepba aser mepishiba ola, parnoki pei lenmang belensa nung parnoki KIBUBA parnok Tsüngrem amadok.

²²Meyipang, nenok atsüngzüka oadokba chirtem, nenok atsüngzüka aoba ni anebtsütsü. “Ajiang, onok ne dangi arur; kechiyong na KIBUBA ozü Tsüngrem lir.

²³Atangji tenem ungsem nungi teyari bushiba, aser tenemti nung rongrongshishiba amajok nung lir. Atangji KIBUBA asen Tsüngrem dak Israel tekümtet lir.

²⁴Asenok lanuwa nungi maksütsü mapa agi asen tsüraburi inyaktetba meyokadok, parnok san telok aser nashi telok, parnok jabaso aser parnok jalatem.

²⁵Asen maksü nung asenok ontaka lidi, aser asen mezüngmeshiba agi asenok jak miimbangjang; kechiyong KIBUBA asen Tsüngrem anema asenoki aser asen tsüraburtemi, asenok lanuwa nungi tanü tashi temenen benshiogo; aser asenoki KIBUBA asen Tsüngrem ola manga.”