Read njo YERIMIA 30 Bible Online

YERIMIA 30 - njo bible

YERIMIA 30

¹KIBUBA nungi Yerimia dangi aruba o:

²KIBUBA, Israel Tsüngremi yamai ashir; “Ni ne dang jembiba o ajak kaket ka nung züluang,

³Kechiyong, KIBUBAi ashir, ajiang, kü nübur Israel o Yihuda tia yanglushitsü anogo arudagi ta KIBUBAi ashir, aser ni parnok tsürabur nem agütsüba linüki ni parnok tanaben anir arutsü, aser aji parnoki amangtsü.”

⁴KIBUBAi Israel aser Yihuda indang jembiba otemji ya;

⁵KIBUBAi yamai ashir, Onoki pusatepba, tetsübu, aser tesünep makaba ola angashiogo.

⁶Tang asüngdangang, aser ajiang, tebur kari nu sodi ma? Ajangla kechiba tebur shia pei teperem nung pei teka, tetsür nuso dang ama nemeter ni angur? Kechiba tejak ajak pakpaka alir?

⁷Aiatai! Iba anogo kanga tulu, ibai mesüka kecha mali, Yakob asoshi tuokrongtsü, saka iba nungjagi pa kümzüktsü.

⁸Iba anogo nungji ya ataloktsü ta Temeranger Telok KIBUBAi ashir, oda ni parnok tekong nungi süngraji raksatsütsü, parnok talenba ni poksatsütsü, aser bendangertemi joko parnok kilir mekümdaktsütsü.

⁹Saka parnoki KIBUBA parnok Tsüngrem aser Dawid parnok chuba, shiba ni parnok asoshi adokdaktsütsü tenzüktsü.

¹⁰ Ajangla tetsübu, Oh Yakob kü tenzüker ta KIBUBAi ashir, mesüra tsübua aoksa-a teli, Oh Israel, kechiyong ajiang, ni na talang nungi kümzüktsü aser parnok pur aoba lima nungi ne metsü kümzüktsü; aser Yakob meyipa arutsü, aser ajemajema aser sadoksadoka alitsü, aser shingaia pa metsübudaktsütsü.

¹¹Kechiyong na kümzüktsü asoshi ni ne den lir ta KIBUBAi ashir; kin ajak shirnok rongnung ni na prokshidaktsü, ajak tatem kümdaktsütsü, saka nenokbo ni ajak tatem mekümdaktsütsü. Ni na ochiba agi arütsütsü, aser ni na kodaka-ang memerenshi-i metoktsütsü.

¹²Kechiyong yamai KIBUBAi ashir; “Na yiruba manebtsütettsü, aser ne zübu tulu ka lir.

¹³Ne indang ajungmesotsü shinga mali, ne zübu asoshi mozü kecha maka, na asoshi tanebtsü maka.

¹⁴Na meimer ajaki na amaogo; parnoki na mebushir; kechiyong tsükchir zübu agi ni na yaritsü, aser taochi maka tsükchir temerenshi agi merenshi, kechiaser ne tai tulu lir. Kechiaser ne temenen jenti lir.

¹⁵Na yirubayong kechisütsü ayimtener? Ne tekangshi anebtsü makok. Kechiaser ne tai tulu, kechiaser ne temenen jenti aküm nungji ni itemi ne dak inyak.

¹⁶Anungji na meyoker ajak meyokadoktsü, aser ne tsükchir ajak parnok nisung shia pur aotsü; shirnoki na rakzükdir terakzüktsü asoshi kümdaktsütsü, aser ne dak rakzükraktemer ajakji rakzükraktemdaktsütsü asoshi ni agütsütsü.

¹⁷Kechiyong ni na tanaben anema kümdaktsütsü, aser ne zübutem ni anebtsütsü ta KIBUBAi ashir, kechiaser parnoki ne dang tejendok ta aja aser ashi, nisung shingai mezüngshiba, aji Zion lir.”

¹⁸KIBUBAi yamai ashir, “Ajiang, Yakob süki tiaji ni tanaben yanglushitsütsü, aser pa talidak taochi akatsü; yimtiji pa pei tenem manung yanglutsü, aser chuba kiji kong liasü yangji noktaktsü.

¹⁹Parnok nungi tenüngsang ken aser shirnoki pelateper parnok olatem adoktsü. Ni parnok züindaktsütsü aser parnok ishika mesüi alitsü; ni parnok sentsüwangshitsü aser parnok tila makümtsü.

²⁰Parnok chirtem alemli amato alitsü; aser parnok lokti kü tsüngdang tentettsü aser parnok kangshir ajak ni merenshitsü.

²¹Par chubaji parnok rongnungi ka alitsü, par yimsüsürji parnok rongnungi adoktsü; ni pa anasa arutsü, kechiyong shibai pei sasa kü dangi tasü ita arutsü? ta KIBUBAi ashir.

²²Nenok kü nübur alitsü aser ni nenok Tsüngrem alitsü.

²³KIBUBA yipru mopungji ajiang; terasaba ogo, Tsüngrem mopung yipru ka; aji tamajunger kolak nung pokreptsü.

²⁴KIBUBA mit tesashiji pai mulungtetba pai meinyak tashi aser merenem tashi meyipa maotsü. Tesülen anogo nungbo nenoki ya angatettsü.