Read njo YERIMIA 31 Bible Online

YERIMIA 31 - njo bible

YERIMIA 31

¹Iba mapang nungji KIBUBAi ashir, “Israel kidong ajak Tsüngremji ni alitsü, aser parnok kü nübur alitsü.

²KIBUBAi yamai ashir, nübur shir nok nungi jentet, lisem lima nung taochi angu; oda kodang Israeli anisüngzük bushi,

³KIBUBAi talang nungi pa dangi adok. Ni teti tatem maka temeim agi na meim; anungji ne dang temulung alemba maneni lir.

⁴Tanaben ni ya yanglutsü, aser na yanglua alitsü, Oh, Israel tasüngtet aiür! Tanaben nai ne sasa asüm amtsü, aser lungsotepa pelateper tsüngsangba nung aotsü.

⁵Ano nai Samaria tenemtem nung tsükmenatzü lu ayimtsü, tatemertemi atemtsü, aser iba süngjangji achitsü.

⁶Kechiyong Efraim tenem lima nung mitertemi kenü anogo ajatsü, ‘Apusoang, aser asenoki Zioni tudi, KIBUBA asen Tsüngrem dangi.’ ”

⁷Kechiyong KIBUBAi yamai ashir, “Yakob asoshi tashi agi tepela ken tenang, aser kintem tongtiba asoshi ola agüjang; sangdongang, tenüngsang agüjang, aser shiang, ‘KIBUBAi pei nübur, Israel tanüngba kümzükogo.’

⁸Ajiang, ni parnok anüolentip linük nungi bener arutsü, aser parnok alima tatem len nungi anitentsü parnok rongnung nükpoker aser tsüngtsüker, mashisa aliba tetsür aser la asotsü kangshia aliba den külemi telok tulu ka parnok yagi meyipa arutsü.

⁹Jeba parnok arutsü, aser temepitemba agi ni parnok meyipa anitsü, ni parnok ayongtem tzü anasa jajadatsütsü, lenmang temetong koba nung parnok memetsüdaktsü; kechiyong ni Israel madang tebudi lir, aser Efraim kü mezüng jabaso lir.”

¹⁰KIBUBA Oji angang, Oh kintem, aser aji tzüküm lima talang nung metetdakja shiang, “Shibai Israel prokshidaktsü pai anitentsü, aser sannükeri pei san anükba ama pai anüktsü.”

¹¹Kechiaser KIBUBAi Yakob alizük, aser pa asoshi onsara tashi tait teka nungi pa alangzük.

¹²Parnok arutsü aser Zion tenem nung ola tulu agi ken atentsü, aser KIBUBAi ajungba madak, tsük madak, yi madak, totzü aser san aser nashi pungtu telok madak parnok sentsüwangshia alitsü; parnok takümji tzü agütsüba atsüki ka mesüka alitsü, aser parnok joko shisa mamsatsü.

¹³Idangji aiür chanutemi tsüngsangba nung pelateptsü, aser asangur aser tamburtem lungsotepa alitsü. Ni parnok mangyimba melen tepela kümdaktsütsü, sünepdaktsütsü, aser tejashi melen tepela agütsütsü.

¹⁴Putirtem taküm talubosa ni mesütsü aser kü nübur ni ajungba agi tipatemtsü ta KIBUBAi ashir.

¹⁵ KIBUBAi yamai ashir, “Rama nung ola ka angashir, menungra ken aser kanga ajepba. Racheli pei chirtem asoshi jebdagi; lar chirtem asoshi la mesüngzükteter, kechiaser parnok mali.

¹⁶KIBUBAi yamai ashir, Ajepba nungi ne ola anenang; kechiyong ne mapa tajangzük ngudaktsütsü ta KIBUBAi ashir, aser parnok tsükchir lima nungi meyipa arutsü.

¹⁷Na tarutsü nung teimla lir ta KIBUBAi ashir, aser ne chirtem parnok pei limai shilangtsü.”

¹⁸Atangji Efraim pei sasa yamai anüngba ni angashiogo, Na temerenshi kechiaser mazüokba nashi chanu amato, ni merenshia liasü; ni tanaben yanglushitettsü ni tanaben meyipa bener arungma, kechiyong na KIBUBA kü Tsüngrem lir.

¹⁹Kechiyong ni meyipa or külen ni temulung meyip; aser kü dang sayur külen, ni kü teku manung atsüng; ni akseta liasü, ni bangkaseta liasü, kechiaser kü lanuwa maksü ni aben.

²⁰Efraim kü meimba jabaso asü? Pa kü temeim chir asü? Kechiyong kwiben ni pa anema jembidir, ni ano pa bilemteter; anungji kü mulungjangi pa asoshi yongyar; ni atangji pa dak yimlibilem akatsü ta KIBUBAi ashir.

²¹Nai lenmang temaitsü yuang, ne sasa lenitsü süng songang, na koba lenmangi aotsü lentiji kanga junga shisadangang. Meyipang, Oh Israel tasüngtet aiür, ne yimtitemi meyipang.

²²Kopiga na sepla-sepshitsü, Oh tamang makaba jala? Kechiyong KIBUBAi alima nung mapa tasen ka poktetdaktsüogo. Tetsüri tebur kümzüker.

²³Temeranger Telok KIBUBA, Israel Tsüngremi yamai ashir, “Kodang ni parnok tia yangludir, tanaben parnoki item o ya Yihuda lima nung amshitsü; KIBUBAi pa moajang, Oh temeshiba talidak, Oh temeshi tenem!

²⁴Yihuda aser pa yimti ajak, aser aluyimertem aser shirnok pei san telok den nemzür yangji külemi alitsü.

²⁵Kechiyong aniseta alibatem ni tiptemdaktsütsü, aser zürepa alirtem shia ni moshia süngdaktsütsü.”

²⁶Ajiser ni sak aser reprang, aser ni nangnanga amua or liasü.

²⁷KIBUBAi ashir, ajiang, anogotem arudagi, oda ni Israel kidong aser Yihuda kidong nisung metsü den aser shiruru metsü den proktsü.

²⁸Ya ataloktsü, oda ni koma parnok madak agizüktsü aser raksatsütsü, endoktsütsü aser samatsütsü, aser tamajung bener arutsü repranga ali, yamaji ni parnok madak yanglutsü aser atemtsü repranga alitsü ta KIBUBAi ashir.

²⁹ Item anogo nungji joko parnoki mashitsü, “Tsüraburtemi tsükmenatzü tasen achi, aser chirnur tepu mejemer.”

³⁰Saka nisung shia pei temenen asoshi asütsü; shibai tsükmenatzü tasen chidir pa tepu mejemtsü.

³¹ Ajiang, anogotem arudagi ta KIBUBAi ashir, oda ni Israel kidong aser Yihuda kidong den tezüngzüktepba tasen ka yanglutsü,

³²tezüngzüktepba koba ni par tsüraburtem den parnok teka nung amer Ijip lima nungi ni anitetdang yanglu; kü tezüngzüktepba koba, ni parnok kinungpu saka, parnoki raksa iba tezüngzüktepba amajibo masütsü ta KIBUBAi ashir.

³³ Saka tezüngzüktepba ibaibo item anogotemji süir külen Israel kidong den ni yanglubaji lir. Ni kü ozüng parnok dak enoktsütsü, aser ni aji parnok mulungjang nung zülutsü; aser ni parnok Tsüngrem, aser parnok kü nübur alitsü.

³⁴ Joko nisung shiai pei kiyonger dang aser nisung shia pei adianu dang, “KIBUBAji metetang” ta mashitsü, kechiyong parnok ajaki ni metettsü, parnok tilatiba nungi tulutiba tashi ta KIBUBAi ashir; kechiyong ni parnok tai atoktsü, aser parnok tai joko ni mebilemtettsü.

³⁵KIBUBAi yamai ashir, Shibai anüngdang tesangwa asoshi anü agütsür; aser aonung asoshi ita aser petinutem nem tetaktet ozüng agütsür; shibai tzüyim ajungmesor angji iba tzüsem arrür, pa tenüng Temeranger Telok KIBUBA lir;

³⁶KIBUBAi ashir, kü madang nungi iba yimsü ozüng pila-a aor, idangjibo Israel dak jakzükba kü madang, teti kin ka akümtsüba nungi anenadoktsü.

³⁷KIBUBAi yamai ashir, Temalen anüngtem asadangtsü kokra, aser teküboklen alima kimung bushitsü kokra, idangji ni Israel nungi jakzükba ajak parnoki inyakba ajak, asoshi ni jendokadoktsü ta KIBUBAi ashir.

³⁸Ajiang, anogotem arudagi ta KIBUBAi ashir, oda yimtiji KIBUBA asoshi Hananel lungki nungi Kinük Süngkhüm tashi yanglushitsü.

³⁹Tasadangba lisü tali adoktsü, Gareb tenem tashi indangindanga aser ajiser Goai meyiptsü.

⁴⁰Tasümangtem aser aut lenten ajongaji aser moapu ajak Kidron ayong tashi anüdoklen Kor Süngkhüm tashi, KIBUBA madang temeshi asütsü; ibaji teti asoshi joko tera matsütettsü mesüra melaotsü.