Read njo YERIMIA 32 Bible Online

YERIMIA 32 - njo bible

YERIMIA 32

¹ Yihuda chuba Zedekia küm terbuba nung KIBUBA nungi Yerimia dangi aruba o, aji Nebukadnezzar küm tertibuba liasü,

²Iba mapang nungji Babilon chuba kidang tanüker aliba ki nung shibanga liasü.

³Kechiyong Yihuda chuba Zedekiai pa puoka yua ashi, “Kechiba nai shiner ‘yamai KIBUBAi ashir’ ta jembir? Ajiang, iba yimti ni Babilon chuba ket nung agütsüdagi, aser pai aji agitsü;

⁴aser Yihuda chuba Zedekiaji Kaldi nunger nungi mejenbutsü, saka atangji Babilon chuba ket nung agüjadoktsü, aser pa den tejak o tejak na aser tenük o tenük na ajurutepa jembitsü;

⁵aser pai Zedekia Babiloni bener aotsü, aser yangji ni pa mesemdang tashi alitsü ta KIBUBAi ashir. Kaldi nunger anema nenoki makoktsü.”

⁶Yerimiai ashi, KIBUBA O kü dangi aru;

⁷Ajiang, nebu tanubu Shallum chir Hanamel ne dangi arutsü aser ashitsü, “Anathot nung aliba kü lu aliang, kechiaser alizüka alangzüktsübaji na-ang lir.”

⁸Idangji kübu tanubur chir Hanamel tanüker aliba kidangi KIBUBA O amato kü dangi aru, aser kü dang ashi, “Kü lu aliang, ni ne dang mepishir, aji Anathot nung lir, koba Benjamin linük nung lir; kechiyong agitsüba aser alangzüktsübajibo na-ang lir; na atema aji aliang.” Idangji ibai Tsüngrem O liasü ta ni metet.

⁹Ni Anathot nung kübu tanubur chir Hanamel nungi aluji ali, aser pa nem taribi senji shekel tertenet ozüka agütsü.

¹⁰Ni terenemba nungji kü nüng zülu, ibaji ajenbang aser kulitem aja, aser senji seret nung odang.

¹¹Idangji talizükba kuli züluba ajener aliba anaprongji, aser koba lapoka liasü, ozüng aser yimsü amato, itemji dena ni agi;

¹²aser talizükba kuli zülubaji, kübu tanubur chir Hanamel tsüngdang, talizükba kuli züluba nung tenüng züluoker kulitem tsüngdang, aser Yihuda nunger shirnok tanüker kidang mena liasü ajak tsüngdang, Maaseia chir Neria, jabaso Baruk nem agütsü.

¹³Parnok tsüngdang ni Baruk nem agüja ashi,

¹⁴Yamai Temeranger Telok KIBUBA, Israel Tsüngremi ashir, “Item kuli züluba agiang, iba talizükba kuli züluba shibanga aliba aser iba lapoka aliba kuli zülubaji agiang, aser itemji ali po ka nung enokang, angji itemji mapang talangka alitsü.

¹⁵Kechiyong Temeranger Telok KIBUBA Israel Tsüngremi yamai ashir, Ki aser alutem aser tsükmenatzü lutem tanaben iba linük nung alizüktsü.”

¹⁶Talizükba kuli zülubaji ni Neria chir Baruk nem agütsür külen ni KIBUBA dang sarasadema ashi,

¹⁷“Aia KIBUBA Tsüngrem! Na ain tulu aser ne tepen songtokba agi anüngtem aser alima yanglua aliba ya na lir. Na asoshi kecha tasak masü;

¹⁸nai meyirijang dang akang akanga temeim sayur, saka tsürabur tai parnok chirnur dangi parnok sülen arudaktsür; tulu aser tashi tait Tsüngrem, Temeranger Telok KIBUBA, aji pa tenüng lir.

¹⁹Shisatsü nung tulu aser teinyakba nung tashi tulu; shiba tenük nisunger sentong ajaklen lapoka lir, nisung shia nem pei sentong yari aser pei-i inyakba yari ajangzüktsür;

²⁰shibai Ijip lima nung temaitsü aser sayatenya sayu, aser tanü tashi Israel nung aser meimchir ajak rongnung, aser tanü ama na tenüng ka adokdakja lir.

²¹Nai ne nübur Israel Ijip lima nungi temaitsü aser tesüngmangtsü agi tashi tait teka aser tepen songtokba agi, aser tetsübu taoksa tulu agi anir aru;

²²aser Nai iba lima koba nai parnok tsürabur nem agütsütsü azüngashi, mamatzü aser ninang mojitzü yima aliba lima, parnok nem agütsü;

²³aser parnok ai aser aji agi, saka parnoki ne ola manga mesüra ne ozüng nung mejaja; nai parnok dang inyaktsü melaba parnoki kecha meinyak; anungji nai parnok madang item tamajung ajak arudaktsü.

²⁴Ajiang, telungbangtsü sabang yimti jagi aji agitsü tim keta lir, aser nok aser ayawara aser wara alibayong yimtiji iba anema raraba Kaldi nunger ket nung agüja lir. Nai kechi jembi ataloka aruogo aser ajiang, aji nai angur.

²⁵Aji saka nai Oh KIBUBA, yimliji Kaldi nunger ket nung agüja liaka, sen yong aluji aliang aser kulitem bena arung ta nai kü dang shiogo.”

²⁶KIBUBA O Yerimia dangi aru;

²⁷Ajiang, Ni KIBUBA, shi ajak Tsüngrem lir; ni asoshi langka kanga tasak ali asü?

²⁸ Anungji KIBUBAi yamai ashir, ajiang, ni iba yimti Kaldi nunger ket nung aser Babilon chuba Nebukadnezzar ket nung agütsüdagi, aser pai aji agitsü.

²⁹Iba yimti anema rarartem Kaldi nunger arutsü aser iba yimti nung mi senoktsütsü, aser kitem koba kilem manung parnoki Baal nem teronem menemtsü tenla-a ali, aser aji jashia ain adokdaktsütsü tangar tsüngremtem nem tajemtsü tenla shilokja lir aji dena arongtsü.

³⁰Kechiyong Israel chir o Yihuda chirtemi kü tsüngdang kechi majung aji dang parnok lanuwa nungi inyakogo; kechiaser Israel chirtemi ni jashia ain adokdaktsütsü dang parnok teka mapa agi inyakogo ta KIBUBAi ashir.

³¹Kechiyong iba yimti yangluba anogo nungi tanü tashi, ni atema kü ain adokba aser terasaba adokdaktsüogo, aji asünung ni ibai kü tsüngdang nungi agientsü.

³²Israel chirtem aser Yihuda chirtem, par chubatem aser par tongtipur, par putir aser par ainkartem, Yihuda nunger aser Yirusalem alirtemi, tamajung ajak agi ni jashidakja ain adokdaktsü.

³³Parnoki parnok tejak masü terongdong kü tsütsü shitsüogo; aser ni parnok dang nentaka sayuaka parnoki tesayuba agizüktsü manga.

³⁴ Kü tenüng agi ajaba ki, aji menendaktsütsü parnoki tesempatsütem ayu.

³⁵ Parnok jalajabasotem Molek nem tenla agütsütsü, ni parnok dang memela, mesüra iba tesempatsü parnoki inyaktsü, Yihuda temenen menadaktsütsü kü mulung nung ia meliaka parnoki Hinnom jabaso lenten nung Baal asoshi tenem tekülemdak yanglu.

³⁶Tang aji asünung iba yimti koba indang nenoki, ibai Babilon chuba ket nung nok agi, aya agi, aser wara agi agüja lir, ta jembia ta KIBUBA Israel Tsüngremi ashir:

³⁷“Ajiang, kü ain adokdang, kü mit adoka jashidang, aser kanga rasaba mapang nung kolenisa ni parnok aridok, linük ajak nungi ni parnok anitentsü; ni parnok tanaben iba linüki bener arutsü aser ni parnok lendong makai lidaktsütsü.

³⁸Parnok kü nübur alitsü, aser ni parnok Tsüngrem alitsü.

³⁹Parnoki teti kü dang tsübutsü asoshi, ni parnok nem temulungjang ka aser lenmang ka agütsütsü; parnok ajungtsü asoshi, aser parnok sülen parnok chirtem asoshi.

⁴⁰Parnok dang ajungba nungi meyipa maotsü asoshi ni parnok den teti aliba tezüngzüktepba yanglutsü; aser parnoki kü dang nungi meyipa maotsüsa ni tsübuba parnok mulungjang nung ni enoktsütsü.

⁴¹Parnok dang tajung inyakba nung ni pelatsü, aser iba linük nung ni parnok temulung agi, aser kü mulungjang ajak aser kü nela ajak agi tamang katetba nung noktakdaktsütsü.”

⁴²Kechiyong KIBUBAi yamai ashir, “Iba nübur madak ni tamajung tulu bener arudaktsüba ama, yamaji ni parnok ajak madak ni parnok dang nangzükba tajung bener arutsü.

⁴³Ya azüngmeyakdak, nisung mesüra shiruru mali, ya Kaldi nunger ket nung agüja lir ta koba indang nenoki shidagi iba linük nung ali alizüktsü.

⁴⁴Ali sen yong alizüktsü, aser kuli zülutepba nung tenüng zülutsü, aser kuli anemtsü, Benjamin linük nung Yirusalem meketa Yihuda yimtitem nung, tenem lima yimtitem nung, Shefela yimtitem nung, aser Negeb yimtitem nung, kechiyong ni parnok tia yanglushitsütsü” ta KIBUBAi ashir.