Read njo YERIMIA 33 Bible Online

YERIMIA 33 - njo bible

YERIMIA 33

¹Yerimia anosa obendangdak kidang shibanga lia KIBUBA O pa dangi tanaben aru.

²KIBUBA shibai alimaji yanglu, shibai itemji akanga ayur, pa tenüng KIBUBAji lir, pai yamai ashir,

³“Kü dang ja-ang aser ni ne dang langzütsü, aser miim mapa tulu koba nai memeteti ali ne dang ashitsü.

⁴Kechiyong KIBUBA Israel Tsüngremi, iba yimti kitem aser Yihuda chuba kitem koba nok madang telungbangtsü sabang yangluba anema tenokdangtsü yangluba bensa-a liasü, item indang yamai ashir;

⁵Kaldi nunger raratsü asoshi, aser nisung tasü mang agi parnok süngdaktsütsü aitdagi, shirnok ni kü ain adokba aser terasaba agi azüktsü, kechiyong iba yimti nungi ni kü tejak parnok majungbayong miimadokogo.

⁶Ajiang, ni ajagi tajungtsü aser tanebtsü bener arutsü, aser ni parnok anebtsütsü, aser parnok dangi yimchiyimjung aser tekümzükba jungkai adoktsü.

⁷Ni Yihuda tia aser Israel tia tanaben yanglushitsütsü, aser tamasa amato parnok tanaben yanglutsü.

⁸Ni anema parnok temenen tai ajak nungi ni meshitettsütsü aser ni anema noktakba aser menaba tai ajak atoktsü.

⁹Aser alima kintem shirnoki ni parnok asoshi tajung inyaktsü aliba ajak angashitsü ali, parnok ajak dang, iba yimti ni atemabo tepelatsü tenüng ka, tenüngsangtsü ka aser sentsüwangshitsü ka asütsü; iba asoshi tajung ajak aser yimjiyimjung ajak ni bener arutsüba yong parnoki tsübutsü aser atententsü.”

¹⁰KIBUBAi yamai ashir, “Iba talidak koba indang nenoki ashir, ibai nisung mesüra shiruru mali tejendok, Yihuda yimtitem aser Yirusalem yimdong azüngmeyaka aliba nisung mesüra talir nisung mesüra shiruru mali,

¹¹pelatepba ola aser kiyimla ola, shirnoki KIBUBA kidangi tenla bener arur parnok ken atenba ola, ‘Temeranger Telok KIBUBA nem tenüngsang agüjang, kechiyong KIBUBA tajung lir, kechiyong pa mechiokba temeim teti lir!’ Kechiyong tamasa ama ni linük tia tanaben yanglushitsü” ta KIBUBAi ashir.

¹²Temeranger Telok KIBUBAi yamai ashir, “Iba talidak koba yimtok lir nisunga, shirurua mali, aser iba yimti ajak nung, sannükertem talidak parnok san telok mejangdakja alitsü.

¹³Tenem lima yimtitem nung, Shefela yimtitem nung, aser Negeb yimtitem nung, aser Benjamin lima nung, aser Yirusalem temeket nung, aser Yihuda yimtitem nung, san teloktem shibai parnok züngdanger pa teka kübok tanaben ajanga aotsü” ta KIBUBAi ashir.

¹⁴ KIBUBAi ashir, “Ajangla Israel aser Yihuda kidong dang nangzükba ataloktsü anogotem arudagi.

¹⁵Item anogo aser iba tensa nungji Dawid asoshi ni temeshiba Kongsang ka adokdaktsütsü; aser pei linük nung ochiba aser temeshiba inyaktsü.

¹⁶Item anogo nungji Yihuda kümzüktsü aser Yirusalem kümzüka alitsü. Iba tenüngji ibai ajatsü, KIBUBAji onok temeshiba lir.”

¹⁷ Kechiyong KIBUBAi yamai ashir, “Israel kidong chuba menden nung mendaktsütsü Dawid kodanga nisung agi anünga malitsü;

¹⁸ aser Levi putirtem kü madang tarongba tenla agütsütsü, chiyungtsü tenla arongtsü, aser teti asoshi tetepsetba tenla renemtsü kodanga nisung agi anünga malitsü.”

¹⁹KIBUBA O Yerimia dangi aru.

²⁰KIBUBAi yamai ashir, “Ni kü tezüngzüktepba anüngdang raksatetdi süra aser aonung kü tezüngzüktepba raksara iba anüngdang aser aonung parnok tatakzük mapang nung madoktsü,

²¹idangji kü tenzüker Dawid den kü tezüngzüktepba raksatettsü, yangji pa chuba menden nung yimsü asütsü pa jabaso kata malitsü, aser Levi putirtem kü tenzükertem kü tezüngzüktepba malitsü.

²²Anungji petinu züngdangtsü makok ama aser tzüyim lisem asadangtsü makok ama, yamaji kü tenzüker Dawid chirtem, aser Levi putirtem shirnoki kü dang tenzüker ni soyapokyadaktsütsü.”

²³KIBUBA O Yerimia dangi aru.

²⁴Item nüburi kechi shidagi, KIBUBAi kidong ana koba pai shimtet aji magizük no? Yamaji parnoki kü nübur sensaja parnok tsüngdang joko kin ka masü ta züngshi.

²⁵KIBUBAi yamai ashir, Anüngdang aser aonung den kü tezüngzüktepba meyanglu asübo, aser anüng aser ali yimya ozüng ni metentettsü asübo;

²⁶aji oda Yakob aser kü tenzüker Dawid metsü katia Abraham, Isak aser Yakob chirtem madak yimsüsütsü magitsüla. Kechiyong ni parnok tia yanglushitsütsü, aser parnok madak yimlibilem akatsü.