Read njo YERIMIA 34 Bible Online

YERIMIA 34 - njo bible

YERIMIA 34

¹ Babilon chuba Nebukadnezzar aser pa temeranger telok ajak, pa yimli kübok alima yimli ajak, aser nisung ajak Yirusalem aser iba yimti ajak anema raraba mapang nung KIBUBA nungi Yerimia dangi oji aru.

²KIBUBA, Israel Tsüngremi yamai ashir, “Oang aser Yihuda chuba Zedekia dang jembiang aser pa dang shiang, KIBUBAi yamai ashir, ajiang, iba yimti ni Babilon chuba ket nung agütsüdagi, pai aji mi agi rongdoktsü.

³Pa ket nungi na mejenbutsü, saka atangji aputsü aser na pa ket nung agütsütsü; nai Babilon chuba den tenük o tenük na ranglokteptsü aser pa den tejak jitepa jembiteptsü; aser na Babiloni aotsü.

⁴Aji saka KIBUBA O angang, Oh Yihuda chuba Zedekia! KIBUBAi ne indang yamai ashir, na nok agibo masütsü;

⁵na yimjung nung asütsü. Ne tsüraburtem ne dang tama aliba mezüng chubatem asoshi teronem menemtsü arongba ama, yamaji nisungtemi na asoshi teronem menemtsü arongtsü aser na asoshi, Aiatai, kibur! ta shia menungratsü, kechiyong ni oji kazükogo” ta KIBUBAi ashir.

⁶Idangji Yerimia ainkari item o ajak Yirusalem nung Zedekia chuba dang jembi.

⁷Babilon chubai Yirusalem aser Yihuda yimti ajak anünga aliba, Lakish aser Azeka anema raraba mapang; kechiyong anünga aliba Yihuda yimtitem noktanga alibabo itemi dang liasü.

⁸Zedekia chubai, Yirusalem nung aliba ajak den, parnok dang techiokba sangdongtsü tezüngzüktepba yanglur külen, KIBUBA nungi Yerimia dangi o arubaji;

⁹oda nisung shia pei Ibri lartem tebur süshia tetsür süshia chioktsü, oda shingai Yihuda nunger pei adianu kata alar mekümdaktsütsü.

¹⁰Tongtipur ajak aser nisung ajak shirnok nisung shiai pei lar tebur süshia tetsür süshia chiokdi ta züngzüktepa liasü, parnoki tashi anga, yangji tanaben parnok alar mekümdaktsütsü; parnoki anga, aser parnok chiok.

¹¹Saka tesülenbo parnoki meyipa aru aser tebur aser tetsür alartem parnoki chiokba meyipa agi, aser parnok kübok alar kümdakja bener aru.

¹²KIBUBA O Yerimia dangi KIBUBA nungi aru.

¹³KIBUBA Israel Tsüngremi yamai ashir, “Ijip lima alar tia nungi parnok anir adokdang ni nenok tsürabur den tezüngzüktepba ka yanglua ashi,

¹⁴ Küm trok tatembang nung nenok nisung shiai medemer Ibri nunger shiba ne dangi yoka ali, aser küm trok na tenzüka ali, pa ner mapa nungi nai chioktsü tim. Saka nenok tsüraburtemi kü dang manga mesüra kü dang parnok tenarong maten.

¹⁵Nenok tawa-ang temulung meyip, nisung shiai pei kiyonger dang nüji tia sangoktsüba agi kü nükdang koba shitak lir aji inyak; aser kü tenüng agi ja-a aliba kidang kü madang nenoki tezüngzüktepba ka yanglu;

¹⁶Saka nenoki meyipadok aser nenoki parnok mulungba ama chiokba tetsür tebur alartem nenok nisung shiai meyipa agi nung kü tenüng menüktsü, aser parnok nenok lar akümtsü nenoki inyak.”

¹⁷Anungji KIBUBAi yamai ashir, “Nisung shiai pei adianu dang aser pei kiyonger dang nüji sangdongba agi nenoki kü dang tashi manga; ajiang, nok dangi, wara dangi, aser ayawara dangi chiokba ni nenok dang sangdonger” ta KIBUBAi ashir, “Ni nenok alima yimli ajak madang tetsübutsü ka kümdaktsütsü.

¹⁸Shirnoki kü tezüngzüktepba raksa aser kü madang tezüngzüktepba o renemba parnoki mebenshi, nashi chanu koba parnoki ana küma zükma aser iba telemdangbatem tsüngdai süiba mesüka ni kümdaktsütsü.

¹⁹Yihuda tongtipurtem Yirusalem tongtipurtem teyangluba nisungtem, putirtem, aser linük alir ajak shirnoki telemdangba tetsüngdai süia ao;

²⁰aser ni parnok tsükchirtem ket nung aser parnok taküm bushirtem ket nung parnok agütsütsü. Parnok tasü mangtemji anüng ozütem aser arem shirurutem asoshi chiyungtsü asütsü.

²¹Yihuda chuba Zedekia aser par tongtipur parnok tsükchirtem shirnoki parnok taküm bushir parnok ket nung aser Babilon chuba temeranger telok koba nenok nungi meyipa oa ali parnok ket nung agütsütsü.

²²Ajiang, ni melatsü” KIBUBAi ashir, “Aser parnok iba yimti-i meyipa arudaktsütsü, aser parnoki iba anema raratsü, aser aji agitsü, aser aji mi agi rongtoktsü. Ni Yihuda yimtitem nisung meli-i azüngmeyakdak ka kümdaktsütsü.”