Read njo YERIMIA 35 Bible Online

YERIMIA 35 - njo bible

YERIMIA 35

¹ Yihuda chuba Yosia chir Yehoiakim tendak KIBUBA O Yerimia dangi aruba.

²“Rekab kidong dangi oang, aser parnok den jembitepang, aser parnok KIBUBA kidangi, taktang kati anir arung; aser parnok nem yi tajemtsü agüjang.”

³Anungji ni Habbazinia jabaso Yerimia chir Yazania aser pa adianutem, aser par jabaso ajak aser Rekab kidong ajonga anir ao.

⁴Ni parnok KIBUBA kidangi anir arua Tsüngrem nisung Igdalia chir Hanan jabasotem taktangi anir aru, koba tongtipur taktang den atongtepa, Shallum jabaso Maaseia, kima anüker taktang temalen liasü.

⁵Idangji ni Rekab nunger madang yi agi sünga meso aser maroktem yutsü; aser ni parnok dang “Yi jemang” ta ashi.

⁶Saka parnoki langzü, “Onoki yi majemtsü, kechiyong Rekab chir Yonadab, onok tebui onok nem ozüng agütsü; nenoki yi majemtsü mesüra nenok aser nenok chirtemi kodanga tejem;

⁷nenoki ki kata meyanglutsü; nenoki metsü meproktsü; nenoki matemtsü mesüra tsükmenatzü lu makatsüla; saka nenok koba linük nung semloka lidir nenok arishia alitsüsa süki nung nenok arishi tepiyong alitsüla.

⁸Onoki Rekab chir Yonadab, onok tebu ola angaogo, pai onok dang melaba ajak nung, onok arishi tepiyong yi majemtsü, onok, onok kinungtsürtem, onok jabasotem mesüra onok jalatem,

⁹aser talitsü ki meyanglutsü; mesüra onok tsükmenatzü lu mesüra metsü maka;

¹⁰saka onok süki nung lia aruogo, aser nenok tebou Yonadabi onok dang melaba ajak anga aser inyak.”

¹¹Saka kodang Babilon chuba Nebukadnezzar linük anema atu, onoki ashi, “Arung Kaldi temeranger telok aser Siria temeranger telok tsüburji Yirusalemi odi.” Anungji onok Yirusalem nung lidagi.

¹²Idangji KIBUBA O Yerimia dangi aru;

¹³Temeranger Telok KIBUBA, Israel Tsüngremi yamai ashir, “Oang aser Yihuda nunger aser Yirusalem alir dang shiang, nenoki tesayuba magizüktsü aser kü o mangatsü no?” ta KIBUBAi ashir.

¹⁴Rekab chir Yonadabi par chirtem dang yi majemtsü melaba, aji benshiogo; aser tanü tashi parnoki kecha majemer, kechiyong parnoki tebu temelaba angaogo. Ni nenok dang nentaka jembiogo, saka nenoki kü o manga.

¹⁵Ni nenok dangi kü tenzüker ainkar ajak parnok nendaka yoka shiogo, Tang nenok nisung shia pei tamajung lenmang nungi meyipang aser nenoki inyakbatem yanglushiang, aser tangar tsüngremtem sülen parnok tenzüktsü tuo, aser idangji nenoki ni nenok aser parnok tsürabur nem agütsüba linük nung alitsü. Saka nenoki kü dangi nenok tenarong magütsü mesüra manga.

¹⁶Rekab chir Yonadab, par chirtemi parnok tebui parnok nem agütsüba temelaba benshi saka iba nüburi kü dang manga.

¹⁷Anungji Temeranger Telok KIBUBA, Israel Tsüngremi yamai ashir, “Ajiang, ni Yihuda aser Yirusalem alir ajak madak parnok anema o agütsüba tamajung ajak bener arudagi; kechiaser ni parnok dang jembiogo, aser parnoki manga, ni parnok dang aja aser parnoki melangzü.”

¹⁸Saka Rekab nunger kidong dang Yerimiai ashi, Temeranger Telok KIBUBA Israel Tsüngremi yamai ashir, “Nenoki nenok tebu Yonadabi melaba anga aser pa ozüng ajak benshi aser pai parnok dang melaba ajak benshi.

¹⁹Anungji Temeranger Telok KIBUBA Israel Tsüngremi yamai ashir, Rekab chir Yonadabi kü madang noktaktsü asoshi nisung agi kodanga anünga malitsü.”